Isa. 65 - Bhaibheri Rakachena muChindau

Kuorora kwaMwari kuneavo Vanomukira

¹ “Ndinotsvakwa ndivo vasikazi kubvunza ndini; ndinooneka ndivo vasikazi kunditsvaka. Ndakati, ‘Ndiringirei ndini ndiri pano, ndiringirei ndini ndiri pano,’ kudzinza risikazi kudaidza zina rangu.

² Ndakatambanudza nyara yangu zuva reshe kunevanhu vokumukira, avo vanohamba munjira isikazi kunaka, kuteera mipinimidzo yavo;

³ vanhu vanondiambira pamberi pehope yangu mikuwo yeshe kuti nditseneke; vanopira mudiro muminda, nokupisha mutombo unegwema rakanaka padera pemaarita ezvidhina;

⁴ avo vanogara pakati pemaiba, vanoata mundau dzakafishika dzemitunhu; avo vanodya nyama yenguruwe, nomuto wezviro zvinonyangadza uri muzvidziyo zvavo;

⁵ avo vanoti, ‘Gara wega, usakwedzera kwendiri; ngokuti ndakachena kupinda iwewe.’ Ava chiushi mumiro mwangu, muriro unobaka zuva reshe.

⁶ “Ringira zvakanyorwa pamberi pangu: Andizonyarari, asi ndinozounzidzira; ngegwinyiso ndinozounzidzira pazvizva zvavo,

⁷ zvishaishi zvenyu, nezvishaishi zvemadzibaba enyu pamwepo,” unoronza Mambo Mwari. “Ngokuti avo vakapisha mutombo unegwema pamutunhu, nokundituka padera pezvimitunhu, ndinozopima muzvizva zvavo muthuso wakaperera wemishando yavo.”

⁸ Unoronza izvi Mambo Mwari, “Kudai ngevhini idzva rinooneka pachikore, noumweni unoti, ‘Usachiparadza, ngokuti chifumiso chiri mukati mwacho;’ ndizvo ndinozoita kudaro ngendaa yevaranda vangu kuti ndisavaparadza veshe.

⁹ Ndinozobudisa dzinza kubva kunaJakobe nokubva kunaJudha, mugari wenhaka yemitunhu yangu; nevakatsanangurwa vangu vanozoigara nhaka, nevaranda vangu vanozogaremwo.

¹⁰ Sharoni rinozoita mafuro emakwai neBani reAkho rinozoita ndau yokutiza zvifuyo, zvevanhu vangu avo vanonditsvaka.

¹¹ Asi imwimwi munosiya Mambo Mwari, munoriyarwa mutunhu wangu wakachena, munonasirira matafura kuti muuyirwe, nokuzadza tsani ngevhini rakabvengedzerwa magumo;

¹² ndinozomugumisira pashoti, nemwi mweshe munozogwadama pashi kuurawa; ngokuti, apo pendakadaidza, amuzi kupingura, naapo pendakaereketa, amuzi kupurutana; asi mwakaita zvakashata pamberi pemadziso angu, mwakatsanangura izvo zvendisikazi kudakara ndizvo.”

¹³ Ndizvo izvi zvinoronza Mambo Mwari, Mwari, “Ringira, varanda vangu vanozodya, asi imwimwi munozopera ngenzara; ringira, varanda vangu vanozomwa, asi imwimwi munozofa ngenyota; ringira, varanda vangu vanozodakara, asi imwimwi munozotsverudzwa.

¹⁴ Ringira, varanda vangu vanozoemba ngokudakara kwomwoyo, asi imwimwi munozochema ngokurwadziwa kwomwoyo, nokugwimba ngokutambudzika kwomweya.

¹⁵ Munozosiya zina renyu kunevakatsanangurwa vangu kuti riite chituko, naMambo Mwari, Mwari, unozomuuraya, asi varanda vake vanozodaidzwa ngezina rimweni.

¹⁶ Zvino kunyazwi ndiani uwo unokumbira kufumiswa munyika unozofumiswa ndiMwari wokugondeka; kunyazwi ndiani unopika munyika, unozopika ndiMwari wokugondeka; ngokuti madambudziko ekare ariyarikanwa, nawo afishwa kubva kumadziso angu.”

Kusikwa Kutsva

¹⁷ “Ngokuti, ringirai, ndinosika matenga matsva nenyika itsva; zviro zvokutanga azvichazokarakadzwi nokuti kupinimidzwa.

¹⁸ Asi imwimwi dakarai, mudakadzwe mhera nariini ngeizvo zvendinosika; ngokuti, ringira, ndaa kuda kusika Jerusarema kuita kudakara nokudakadzwa kwevanhu varo.

¹⁹ Ndinozodakara muJerusarema, nokudakara muvanhu vangu: neizwi rokuchema arichazozwiki mukati mwaro nokuti izwi rokubonda.

²⁰ Akuchazoapozve ruchiya runopona mazuva mashomani, nokuti harahwa isikazozarisi mazuva ayo; ngokuti ruchiya aruzofi metsa rwaa nezana remakore; asi uwo unokorera kuguma zana remakore unozoerengwa kuita wakatukwa.

²¹ Vanozoaka mhatso nokugaremwo; vanozosima minda yemivhini nokudya michero yayo.

²² Avazoaki kuti umweni agaremwo; avazosimi kuti umweni adye; ngokuti kudai ngemazuva omuti, ndizvo zvinozoitawo mazuva evanhu vangu, nevakatsanangurwa vangu vanozogara mukuwo wakareba vechidakara ngomushando wenyara dzavo.

²³ Avazoshandi pasina chiro, nokuti kubereka vana vanokasira kuparadzwa; ngokuti vari rudzi rwevakafumiswa ndiMambo Mwari, nemibarirwana yavo nayo.

²⁴ Vasati vakumbira ndinozopingura; vasati vaereketa ndinozozwa.

²⁵ Thika nekakwai zvinozofura pamwepo, mhondoro inozodya mwenje kudai ngekabi; asi bukuta rinozoita kudya kwenyoka. Azvizoremadzi nokuti kuparadza pamutunhu wangu weshe wakachena,” unoronza Mambo Mwari.