Isa. 64 - Bhaibheri Rakachena muChindau1 O, kudai ungabaura matenga, udzake pashi, kuti mitunhu izungunyike ngokuapo kwako. 2 Kudai ngomuriro unopisha tsotso, nomuriro unoita kuti mvura yiire, kuitira kuti zina rako riziikanwe kumagaa ako, kuitira kuti madzinza ahute ngokuapo kwako! 3 Apo wakaita zviro zvinoshamisa zvetisikazi kukarira, iwewe wakadzaka pashi, mitunhu iakazungunyika ngokuapo kwako! 4 Kubvira karetu apana ngeumwe wakazwa, apana nzee yakazwisisa, apana dziso rakaona Mwari umweni ngepabanze pako, uwo unoshandira avo vanomugarira. 5 Unoshongana navo avo vanodakara ngokuita zvakarurama, avo vanokukarakadza munjira dzako. Asi iwewe waiya wakatseneka, nesu takashaisha; ngokuti wakafisha hope yako, tingaita maponeserwenyi? 6 Isusu teshe taita kudai ngaumwe usikazi kusukika, nokuita kwedu kwakarurama kweshe kwakadai ngemitsoto inonyangadza. Teshe tinofota kudai ngeshakani; nezvishaishi zvedu zvatirashira kuretu kudai ngedutu. 7 Akuna naumwe unodaidza zina rako, nokudzimusirira mukati mwake kuti akubate; ngokuti wafisha hope yako kubva kwetiri nokutipedza ngendaa yezvishaishi zvedu. 8 Asi O Mambo Mwari, ndiwe baba edu; isusu tiri dongo, newe uri muumbi wedu; teshe tiri mushando wenyara dzako. 9 Usanyanya kutseneka, O Mambo Mwari, zve, usachakarakadza ngokushaisha mhera nariini. Ringira, uone, tinokupota; teshe tiri vanhu vako. 10 Madhorobha ako akachena aita rubaya, Zioni raarubaya, Jerusarema raadongo. 11 Mhatso yedu yakachena yakanaka, apo pevakakuirikidza madzibaba edu, yapishwa ngomuriro, nendau dzedu dzeshe dzinodakadza dzaita matongo. 12 Ngesure kweizvi zveshe unozodzibata here, A Mambo Mwari? Unozonyarara here nokutiorora kakurutu? |