Isa. 63 - Bhaibheri Rakachena muChindau

Kunyisa kwaMambo Mwari padera peMadzinza

¹ “Ndiani uyu unobva Edhomu, unobva Bhozira uri mumachira akatsvuka? Ndiani uyu unouthende muzvokufuka zvake, unohamba muukuru hwesimba rake?” “Ndini, uwo unoereketa zvakarurama, unesimba rokuponesa.”

² “Ngenyi zvokufuka zvako zvakatsvuka, nemachira ako akadai ngouwo unokamura vhini mundau yokukamurira?”

³ “Ndatsikatsika chokukamura vhini ndega, paiya pasina naumwe kubva kuvanhu waiya neni; ndakatsikatsika mukutseneka kwangu, ndakaaputisa muushungu hwangu; muto wawo ukatsenenekera machira angu, ukasvipisa machira angu eshe.

⁴ Ngokuti zuva rokuunzidzira raiya mumwoyo mwangu, negore romushando wangu wokuripira raguma.

⁵ Ndakaringira, asi paiya pasina naumwe wokundidetsera; ndakashama ngokuti paiya pasina wokundigwinyisa; ndizvo muoko wangu wemene wakandiunzira kunyisa, noushungu hwangu hwakandigwinyisa.

⁶ Ndakatsikatsika pashi vanhu muushungu hwangu, nokuita kuti varadze ngoushungu hwangu; ndakadurura pashi ngazi yokupona kwavo panyika.”

Unaku hwaMambo Mwari kunaIsuraeri

⁷ Ndinozopupura ngemishando yenyasha yaMambo Mwari, nokukudzwa kwaMambo Mwari ngeizvo zveshe zvaakatiitira Mambo Mwari, nokunaka kwakakura kwaakaita kunevemhatso yaIsuraeri kwaakavaonisa kudai ngenyasha dzake dzakawanda dzinorudo.

⁸ Ngokuti wakati, “Chokwadi vanhu vangu, vana vasikazonyepi;” ndizvo wakaita Muponesi wavo,

⁹ mukutambudzika kwavo. Haiwa mutumwa nokuti ngirosi, asi ngokuapo kwake kwakavaponesa; murudo rwake nokukungurira kwake wakavaripira; wakavamirudza, akavatwara kumazuva eshe ekaretu.

¹⁰ Asi vakamumukira, vakatsenesa Mweya wake Wakachena; ndizvo wakavapandukira kuita gaa ravo, iye pachake wakarwisana navo.

¹¹ Zvino wakakarakadza mazuva ekaretu, aMosi, nevanhu vake; “Uri pari uwo wakavabudisa kubva muruandhle nomuushi wezvifuyo zvake? Uri pari uwo wakaisa Mweya wake Wakachena pakati pavo,

¹² uwo wakaita kuti nyara yake inouthende igwinyise nyara yokumudyo yaMosi, uwo wakaparadzanisa mvura pamberi pavo, kuti adziitire zina rinogara mhera nariini,

¹³ uwo wakatungamira mukati mwakadzama mworuandhle?” Kudai ngehachi murubya, avazi kupumhunwa.

¹⁴ Kudai ngen'ombe dzinodzaka mubani, Mweya waMambo Mwari wakavapa kuzorora. Ngokudaro wakatungamira vanhu vako, kuti udziitire wemene zina rinoremeredzwa.

Mukumbiro woKuda Nyasha noKudetswa

¹⁵ Ringira pashi uri mudenga, uone, kubva muugaro hwako hwakacheneswa nohwouthende hwako. Kuripari kugwinyisira kwako nesimba rako? Kuangirira kwomwoyo wako nenyasha dzako zviri kuri? Zvatsiirwa kubva kwendiri.

¹⁶ Chokwadi uri baba edu, kunyazwi Abrahama asingatizii, naIsuraeri aatizii; iwewe, O Mambo Mwari, uri baba edu; Muripiri wedu kubvira karetu zina rako rindoripo.

¹⁷ Ngenyi, O Mambo Mwari, unotiita kuti tipauke kubva munjira dzako, nokukonzisa mwoyo yedu, kuitira kuti tisakutya? Petuka sure ngendaa yevaranda vako, ngendaa yemadzinza awo ari nhaka yako.

¹⁸ Vanhu vako vakacheneswa vakagara kwekamukuwo kadoko, asi zvino magaa edu atsikatsika ndau yako yakacheneswa.

¹⁹ Taiya takadai ngeavo mukuwo wakareba avo vomusaitonga, kudai ngeavo vasikadaidzwi ngezina rako.