Isa. 62 - Bhaibheri Rakachena muChindau

¹ Ngendaa yeZioni andizonyarari, nendaa yeJerusarema andizozorori, metsa kururama kwaro kubude kudai ngokujeka kwemambakwedza, noruponeso rwaro kudai ngechivheneko chinobaka.

² Madzinza anozoona kururama kwako, nemadzimambo eshe uthende hwako; newe unozodaidzwa ngezina idzva, iro rinozodudzwa ngomuromo waMambo Mwari.

³ Unozoita dzungudza rounaku munyara yaMambo Mwari, neroumambo munyara yaMwari wako.

⁴ Auchazodaidzwizve kuti “Wakasiiwa,” nenyika yako aichazoronzwizve kuti, “Matongo,” asi unozodaidzwa kuti “Hefizibha,” nenyika yako inoroorwa. Ngokuti Mambo Mwari unodakara mweuri nenyika yako inozoroorwa.

⁵ Ngokuti kudai ngejaha rinoroora mhandwe, ngokudaro vakororo vako vanozokuroora: nokudai ngomukwambo unodakara ndimakhoti wake, ndizvo zvinozoita Mwari unozodakara ndiwe.

⁶ Ndakaemesa varindi padera pemarukumbati ako, O Jerusarema; vasikanyarari masikati nousiku; imwimwi munokumbira kunaMambo Mwari, musanyarara.

⁷ Musatendazve kuti azorore metsa aemesa Jerusarema, nokuita kuti rikudzwe kweshe munyika.

⁸ Mambo Mwari wapika ngenyara yake yokumudyo nomuoko wake wesimba: “Chokwadi andichazopi zviyo zvako kuita kudya kwemagaa ako, nevapara avachazomwi vhini idzva, rewakadzishandira.

⁹ Asi vakazviunganidza ndivo vanozozvidya, navo vechikudza Mambo Mwari; naavo vakariunganidza ndivo vanozorimwa mumaruwanze emhatso yangu yakacheneswa.”

¹⁰ Pindai, pindai ngomumisiwo, nasirirai njira yevanhu; itsai, itsai pato guru, dusai mapuwe; emeserai vanhu mujeki.

¹¹ Ringirai, Mambo Mwari waziisa kumagumo enyika; ronzai kumwanasikana weZioni kuti, “Ringira, ruponeso rwako runouya; wona, muthuso wake unawo, nomuripo wake uri pamberi pake.”

¹² Vanozodaidzwa kuti, “Vanhu vakacheneswa, vakaripirwa vaMambo Mwari:” nemwi munozodaidzwa kuti, “Rakatsvakwa,” “Dhorobha risikazi kusiiwa.”