Isa. 61 - Bhaibheri Rakachena muChindau

Mashoko Akanaka oKusunhurwa

¹ Mweya waMambo Mwari, Mwari, uri padera pangu, ngokuti Mambo Mwari wakandidzodza; wakandituma kuteketesa mashoko akanaka kunevakatsikirirwa; wakandituma kuti ndirape avo vanokutambudzika mumwoyo, kuteketesa kusunhurwa kwemabhanditi, kusunhurwa kuneavo vakasungwa;

² kuteketesa gore rinoashirika raMambo Mwari nezuva rokuunzidza kwaMambo Mwari wedu; kuembedzera veshe vanotsumba;

³ kunasirira izvi avo vanotsumba muZioni; kuvapa dzungudza pandau yemarota, mafuta okudakara pandau yokuchema, jira rokukudza pandau yomweya wokusvipo mwoyo. Vanozodaidzwa kuzwi miokhi yokururama, zvisimwa zvaMambo Mwari, zvinoonisa kuirikidzwa kwake.

⁴ Vanozoakisa matongo ekaretu, vanozoakisazve matongo akaparadzwa okutanga, vanozoakisa madhorobha akaputswa, emibarirwana yakawanda.

⁵ Vapara vanozoema nokuusha zvifuyo zvenyu, vapara vanozoita varimi venyu, nevanasiriri vemivhini yenyu.

⁶ Asi imwimi munozoduzwa kuti vapristi vaMambo Mwari, munozodaidzwa kuti vashandi vaMwari wedu; munozodya upfumi hwemadzinza, mwechidziganzisa ngouthende hwavo.

⁷ Pandau yokutsverudzwa kwavo vanhu vangu vanozoashira chikoaniswa chakapetwa; nepandau yokushoorwa vanozodakara ngenhaka yavo; ndizvo vanozogara nhaka yakapetwa munyika yavo; nokudakara kusikaperi kunozoita kwavo.

⁸ “Ngokuti inini Mambo Mwari ndinoda kutonga kwakanaka, ndinonyenya mibairo yakabvukwa nokuita kwakashata; ngokugondeka ndinozovapa kuripirwa kwavo, ndinozoitazve chitenderano navo chemhera nariini.

⁹ Mibarirwana yavo inozoziikanwa pakati pemadzinza, nemibarirwana yavo pakati pevanhu; naavo veshe vanozovaona, vanozopupura kuti rudzi rwakafumiswa ndiMambo Mwari.”

¹⁰ Ndinozodakara kakurutu munaMambo Mwari, mweya wangu unozodakara ndiMwari wangu; ngokuti wandifukidza ngejira roruponeso, wandifukidza ngejira rokururama, kudai ngomukwambo unodzinemesa ngezvinemeso, kudai ndimakhoti unonema zvinemeso zvake.

¹¹ Ngokuti kudai ngenyika inomerisa mhurikirwa dzayo, nokudai ngomunda unomerisa izvo zvakasimwa kwouri, ngokudaro Mambo Mwari unozoita kuti kururama nokukudzwa zvibude mukuona kwemadzinza eshe.