Isa. 60 - Bhaibheri Rakachena muChindau

Uthende Uchauya hweJerusarema

¹ Miruka, ujeke, ngokuti kujeka kwako kwaguma, nouthende hwaMambo Mwari hwakakwira padera pako.

² Ngokuti, ringira, chidima chinozofukidza nyika, nechidima chikuru chakakora chinozofukidza vanhu; asi Mambo Mwari unozomiruka padera pako, nouthende hwake hunozooneka padera pako.

³ Madzinza anozouya mukujeka kwako, nemadzimambo mukujekisisa kwemambakwedza.

⁴ Mirudza madziso ako apo naapo, uone; avo veshe vanodziunganidza pamwepo, vanouya kwouri; vakororo vako vanozobva kuretu, nevanasikana vako vanozobatwa parutii mumaoko.

⁵ Zvino unozoona nokujeka; mwoyo wako unozodzara ngokudakara, ngokuti uwandu hwezvoruandhle zvinozounzwa kweuri, upfumi hwemadzinza hunozouya kweuri.

⁶ Marumbu emangamera anozozadza nyika yako, mangamera madoko akabva Midhiani neEfa; awo eshe anobva Shebha anozouya. Vanozounza mukore nomutombo unegwema rakanaka unopishwa; navo vanozoteketesa kukudzwa kwaMambo Mwari.

⁷ Zveshe zvifuyo zveKhedha zvinozounganidzwa pamwepo kweuri, magondohwe eNebhaiothi achakushandira, midiro inozoashirika paarita rangu, neni ndinozoirikidza mhatso youthende hwangu.

⁸ Ndiani avo vanombururuka kudai ngegore, nokudai ngegora kumafasitera adzo?

⁹ Chokwadi zviwi zvinozondigarira, ngarava dzeTharshishi dzinozoita dzokutanga kuunza vana vako kubva kuretu; vanazvo zveshe zvavo, sirivha nomukore kuisira zina raMambo Mwari, Mwari wako, noUwo Wakachena waIsuraeri, ngokuti ndiwe wakakukurisa.

¹⁰ “Vapara vanozoakisa marukumbati ako, nemadzimambo avo achakushandira; ndakakuchaya muushungu hwangu, asi munyasha dzangu ndakakuitira nyasha.

¹¹ Misiwo yako inozogara yakabeuka; ayizokonyiwi masikati nokuti usiku, kuti madzinza aunze kweuri upfumi hwawo, nemadzimambo avo vaunzwe vechitungamirirwa mukufora.

¹² Ngokuti dzinza nokuti umambo husikazokushandiri hunozopera; madzinza awo anozoparadzwa yaamho.

¹³ Uthende hweRebhanoni hunozouya kweuri; muti womusaiprusi, mupraini nomuti womupayini, kuti izonakisa ndau yetemperi rangu; neni ndinozoita kuti ndau yetsoka dzangu iite ndau inouthende.

¹⁴ Mibarirwana yeavo vakakutambudza vanozouya kweuri vechikugwadamira; naavo veshe vakakushoora vanozogwadama pashi patsoka dzako, vechikududza kuti, ‘Dhorobha raMambo Mwari, Zioni roUwo Wakachena waIsuraeri.’

¹⁵ Ngokuti wakasiiwa, wakanyenywa, pasina naumwe waihamba pakati pako, zvino ndinozokuita unokudzwa mhera nariini, kudakarirwa kunobva kumazero mazhinji.

¹⁶ Unozoamwa mukaka wevemadzinza, unozoamwazve pamaditi emadzimambo; newe unozozia kuti inini Mambo Mwari ndini Muponesi wako, noMuripiri wako, Uwo Unesimba waJakobe.

¹⁷ Pandau yethusi ndinozounza mukore, pandau yesimbi ndinozounza sirivha, nepandau yematanda ndinozounza thusi, pandau yemapuwe simbi. Ndinozoemesa kunyarara kuita mutungamiriri, kururama kuita nduna yomushando.

¹⁸ Kugebenga akuchazozwiki munyika mwako, kurashwa nokuparadzwa, nokuti kushakera mukati mwemigano yako; unozodaidza marukumbati ako kuti, ‘Ruponeso,’ nemisiwo yako kuti, ‘Kukudza.’

¹⁹ Zuva arichazoiti kujeka kwako masikati, nomwedzi auchazojekiswi kweuri usiku; asi Mambo Mwari ndiye unozoita kujeka kweuri mhera nariini, naMwari wako ndiye uthende hwako.

²⁰ Zuva rako arizobiri, nomwedzi wako auzofi; ngokuti Mambo Mwari ndiye unozoita kujeka kwako kwemhera nariini, nemazuva okutsumba kwako anozopera.

²¹ Vanhu vako vanozoita vakarurama veshe; vanozogara nhaka yenyika mhera nariini, miningwi yomunda wangu wendakasima, mushando wenyara dzangu, kuti ndiirikidzwe.

²² Umwe mudoko unozoita gumi remazana (1,000), nomudoko wokupedzisira unozoita dzinza rinesimba. Inini ndini Mambo Mwari; munguva yacho ndinozochiita ngokukasira.”