Isa. 6 - Bhaibheri Rakachena muChindau

Mwari Unodaidza Isaya Kuita Muprofeti

¹ Mugore raakafa mambo Uzia, ndakaona Mambo Mwari akagara padendemaro, rakareba nokukwirira, nemipendero yemachira ake yakazadza temperi.

² Padera pake pakaema maserafimu; rimwe ngarimwe rawo raiya nemaphaphiro matanhatu: ngemairi rakafukidza hope yaro, ngemairi rakafukidza tsoka dzaro, ngemairi rakambururuka.

³ Nerimwe rakadaidzira kunerimweni rechiti, “Wakachena, wakachena, wakachena, Mambo Mwari wehondo; nyika yeshe yakazara ngouthende hwake.”

⁴ Nemadzeyo emadimba akazungunyiswa ngeizwi reawo akadaidzira, nemhatso yakazara ngechiushi.

⁵ Apo ndakati, “Ihehe kwendiri! Ngokuti ndofa; ngokuti ndiri munhu unemiromo isikazi kusukika, ndinogara pakati pevanhu vanemiromo isikazi kusukika; ngokuti madziso angu aona Mambo, Mambo Mwari wehondo.”

⁶ Zvino rimwe remaserafimu rakamburukira kwendiri, rinesimbe rinobaka munyara mwaro rerakatora ngembato kubva padera pearita.

⁷ Naro rakagwama muromo wangu ndiro rechiti, “Ringira zvino, iri ragwama miromo yako; nokushata kwako kwabviswa, nokushaisha kwako kwaripirwa.”

⁸ Zvino ndakazwa izwi raMambo Mwari rechiti, “Ndiani wendinozotuma, ndiani unozotihambira?” Neni ndakati, “Ndiri pano, nditumei.”

⁹ Naye wakati, “Enda, uronzere vanhu ava: ‘Angirai kupurutana, asi amuzwisisi; angirai kuringira, asi amuonisisi.’

¹⁰ Kodza mwoyo yevanhu ava, utsiire nzee dzavo, upofomadze madziso avo; kuti vasaona ngemadziso avo, nokupurutana ngenzee dzavo, nokuzwisisa ngomwoyo yavo, vatenderuke, vatambiswe.”

¹¹ Zvino ndakati, “Mambo Mwari, mukuwo wakadini?” Naye wakati, “Metsa madhorobha aita matongo asina unogaremwo, nemhatso dzisina vanhu, nenyika iite shango yaamho;

¹² metsa Mambo Mwari abvisa vanhu kuvaisa kuretu, kuti kusare ndau isina chiro mukati mwenyika.

¹³ Kunyazwi rupande rumwe rwegumi rwechisara mukati mwayo runozopishwazve, kudai ngomutherebhinti nokudai ngomuokhi, uwo guri rawo rinosara rakaema apo unowisirwa pashi. Mbeu yakachena ndiyo guri rawo.”