Isa. 59 - Bhaibheri Rakachena muChindau

Muprofeti Unoshoora Zvishaishi zveVanhu

¹ Ringira, nyara yaMambo Mwari aizi kunyanya kufupiswa, kuti iponese, nokuti nzee yake aizi kunyanya kuita dziiranzee, kuti izwe.

² Asi zvishaishi zvenyu ndizvo zvakamuparadzanisa imwimwi kubva kunaMwari wenyu, nezvishaishi zvenyu zvafisha hope yake kubva kwomuri, kuitira kuti asazozwa.

³ Ngokuti nyara dzenyu dzakasvipiswa ngengazi, nezvinwe zvenyu ngokushaisha; miromo yenyu yaereketa manyepo, norurumi rwenyu rwaereketa kushata.

⁴ Apana naumwe unomangarira umweni ngokururama, apanazve unopota ngepamusoro pegwinyiso; vanogonda zvisina shwiro, vechiereketa manyepo; vanoronga kuangarara, vechibereka kushaisha.

⁵ Vanotsotsonya mazanda ebuura, nokuruka dande redande-mutande; kunyazwi ndiani unodya mazanda awo unofa, neiro rinopwanyika rinobuda roambira.

⁶ Madande awo aazoiti zvokufuka, avazodzifukidzi ngezvevanoita. Mishando yavo mishando yokushaisha, nomunyara dzavo munekuparadza.

⁷ Tsoka dzavo dzinorumbirira zvakashata, navo vanokasira kuparadza ngazi isina ndaa; mipinimidzo yavo mipinimidzo yokushaisha; kushakera nokuparadza zviri munjira dzavo.

⁸ Njira yokunyarara avaizii; nokururama akuna munjira dzavo. Vakadziitira njira dzakashongoroka; akuna naumwe unohamba ndidzo unozia kunyarara.

Vanhu Vanotenderuka Zvishaishi zvavo

⁹ Ndizvo kutonga kwakanaka kuri kuretu kubva kwetiri, nokururama akutigumiri; tinogarira kujeka, nemwi ringirai! Kunechidima; tinotsvaka kujeka, asi tinohamba muchidima.

¹⁰ Tinoambamira kutsvaka rukumbati kudai ngebofu, nesu tinoambamira kudai ngouwo usina madziso; tinopumhunwa masikati kudai ngousiku; tiri pakati pevakagwinya tinodai ngavanhu vakafa.

¹¹ Teshe tinorira kudai ngemabheya, nokuchema kakurutu kudai ngemagora: tinogarira kutonga kwakanaka, asi akuna; tinogarira ruponeso, asi ruri kuretu nesu.

¹² Ngokuti zvishaishi zvedu zvawanda pamberi pako, nezvishaishi zvedu zvinotiitira ndaa. Zvishaishi zvedu ngegwinyiso zvinesu, nesu tinozia zvishaishi zvedu:

¹³ kupauka nokuramba Mambo Mwari, nokupauka kubva mukuteera Mwari wedu, kuereketa zvinodzasa pashi nezvokumukira, nokuronga kuereketa mazwi okunyepa nokuareketa kubva mumwoyo.

¹⁴ Kutonga kwakanaka kunopetudzwa sure, nokururama kunoema kuretu; ngokuti gwinyiso rapumhunwa mupato redhorobha, nokururama akungapoterimwo.

¹⁵ Gwinyiso rinotamika; nouwo unosiyana nokushata unoitwa wakachakatwa. Mambo Mwari wakazviona; nazvo zvakamusvipidza mwoyo, ngokuti inga pasina kutonga kwakanaka.

Mambo Mwari Unonasirira Kuponesa Vanhu vake

¹⁶ Wakaona kuti paiya pasina naumwe, akashama kuti paiya pasina wakapindira; ndizvo muoko wake wakaunza kwaari ruponeso, nokururama kwake kwakamugwinyisa.

¹⁷ Wakapfeka kururama kudai ngechihlangu chepaditi, chiqoko choruponeso pasoro rake; wakapfeka machira okuunzidzira nokudziputira ngokugwinyisira kudai ngebhachi.

¹⁸ Kudai ngezviito zvavo, unozohwirinzira kwevari, ushungu kunemagaa ake, kuunzidza kunemagaa ake; kuzviwi unozohwirinzira kuthuswa.

¹⁹ Ndizvo avo vari kumabirirazuva vanozotya zina raMambo Mwari, neavo vari kumabvazuva uthende hwake; ngokuti unozouya kudai ngerwizi rwazarisa, runosundwa ngomweya waMambo Mwari.

²⁰ “Naye unozouya kuZioni kudai ngoMuripiri, kwevari avo vari munaJakobe vanotenderuka kubva kuzvishaishi,” unoronza Mambo Mwari.

²¹ “Kudai ndini,” unoronza Mambo Mwari, “Ichi ndicho chitenderano changu navo: mweya wangu uwo uri padera pako, nemazwi angu endakaisa mumuromo wako, azvizobvi kumuromo wako, nokuti kubva kumiromo yevana vako, nokuti kubva kumiromo yevana vevana vako, kubvira zvinopano mhera nariini,” unoronza Mambo Mwari.