Isa. 58 - Bhaibheri Rakachena muChindau

Kuera Kudya kweGwinyiso

¹ “Daidza ngeizwi guru, usarekera! Daidza ngeizwi rako guru kudai ngegwama! Teketesa kuvanhu vangu kumukira kwavo, kumhatso yaJakobe zvishaishi zvavo.

² Asi vanonditsvaka mazuva eshe nokudakarira kuzia njira dzangu, kudai ngedzinza rinoita zvakarurama, nokudai ngevasikazi kusiya mipango yaMwari wavo; vanokumbira kwendiri kutonga kwakarurama, vanodakara ngokukwedzera pasinde naMwari.

³ Vanoti, ‘Ngenyi techiera kudya, asi auoni? Ngenyi techidzipfaisa pachedu, asi auringiri ndizvo?’ ‘Ringira, ngemazuva okuera kwenyu kudya munodzidakadza pachenyu, mwechitambudza vashandi venyu.’

⁴ Ringira, munoera kudya, kuti muite hasha nokurwisana, nokuchaya ngechibhakera chokushata. Kuera kudya kwakadai ngezvomunoita nyamashi, kunoita kuti izwi renyu risazwika mudenga.

⁵ Uku ndikwo here kuera kudya kwendakatsanangura, zuva rokuti munhu adzipfaise pachake? Ndiko kukotamisa pashi soro rake kudai ngejekacheka, nokuchinga pashi jira resaka nemarota here? Mungadaidza uku kuti kuera kudya, zuva rinoashirika kunaMambo Mwari here?

⁶ “Uku andikwopi kuera kudya kwendatsanangura: kusunungura zvisungo zvokutonga kusikazi kururama, kusunhura mitwaro inorema, kuita kuti vanotambudzwa vasunhurike, nokuti kugura majoka eshe?

⁷ Andikwopi kukowerana kudya kwenyu nevane nzara, nokuunza varombo, vasina pokugara, mumhatso yenyu; apo munoona uri mutitinini kumufukidze, nokudzifisha pachenyu kubva kune vemhuri yenyu here?

⁸ Zvino kujeka kwenyu kunozobuda kudai ngamambakwedza, nokurapwa kwenyu kunozokwira ngokukasira; nokupembedzwa kwenyu kunozomutangira, uthende hwaMambo Mwari hunozoita mungwariri wenyu wesure.

⁹ Zvino munozodaidza, naMambo Mwari unozomupingura; munozodaidzira kuti mudetserwe naye unozoti, ‘Ndiri pano.’ Kudai mwechidusa joka kubva pakati penyu, nokukhomba kwechinwe, kuereketa ngezvakashata,

¹⁰ dai mwechipa kudya kwenyu kunevanenzara, nokugutisa mweya wouwo unotambudzika, zvino kujeka kwenyu kunozobuda pandau inechidima, nechidima chenyu chinozodai ngemasikati.

¹¹ Mambo Mwari unozomutungamirira nguva dzeshe, echigutisa zvidisiso zvomweya mundau dzakaoma, nokugwinyisa magodo enyu; nemwi munozodai ngomunda wakadiridzirwa, kudai ngechinyuka chemvura, icho mvura yacho isikazopwi.

¹² Matongo enyu ekaretu anozoakiswa; munozoaka matsikiro emibarirwana mizhinji; nemwi munozodudzwa kuti, ‘Vaakisi verukumbati rwakapwanyika, Vanasiri venjira dzendau dzavo dzokugara.’

Musharo woKungwarira Sabatha

¹³ “Kudai mwechidusa tsoka dzenyu kubva mukutsikatsika zuva reSabatha, kubva mukuita zvomunoda ngezuva rangu rakacheneswa; kudai mwechidaidza zuva reSabatha kuti izuva rokudakara, rakacheneswa raMambo Mwari, rinoremeredzeka; kudai mwechiriremeredza, usikahambi munjira dzenyu, mwechiita zvidisiso zvomwoyo yenyu, nokuti kuereketa mazwi enyu,

¹⁴ zvino munozodzidakadzisa munaMambo Mwari; neni ndinozomuita kuti mukwire kundau dzakakwirira padera penyika, ndinozomugutisa ngenhaka yaJakobe baba enyu,” ngokuti muromo waMambo Mwari wakazviereketa.