Isa. 57 - Bhaibheri Rakachena muChindau

Miedzaniso yoKudira yaIsuraeri Inoitirwa Ndaa

¹ Vakarurama vanopera, apana naumwe unopinimidza ndizvo; vanhu vanoda Mwari vanotorwa, pasina naumwe unozwisisa. Ngokuti vakarurama vanotorwa kubva mukushata,

² vanopinda mukunyarara avo vanohamba mukururama kwavo. Vanozozorora mumibhedhi yavo.

³ Asi imwimwi, kwedzerai pasinde pano, imwimwi vana vomukadzi unokamba, imwimwi mibarirwana yehure nemhombo.

⁴ Ndiani womunoita chishekedzo? Ndiani womunoshamira miromo yenyu, mwechibudisa rurumi? Andimwipi here vana vedzinza rokupauka, rudzi rwokunyepa?

⁵ Imwimwi munotsva ngokuemura pashi pemiti yomuokhi, pashi pomuti weshe wakasvipirika, imwimwi munouraya vana venyu mumapani pashi pemawere emapuwe.

⁶ Chikoaniswa chenyu chiri pakati pemapuwe akaserera omubani; awo, awo, ndiwo chikoaniswa chenyu; kwaari mwadurura midiro yenyu yokumwa, mwaunza mudiro wezviyo. Ndingaashira kuembedzerwa ngeizvi here?

⁷ Padera pakakwirira, nepadera pomutunhu wakareba mwanasira mibhedhi yenyu, mwakakwireyo koopira mibairo.

⁸ Sure kwechivhayo nesika dzomusiwo mwakaemesa miedzaniso yenyu; ngokuti mukunditiza kwenyu, mwafukura mibhedhi yenyu, mwakwira mweiri, mwaipamhamisa; mwaita chitenderano navo pachenyu; mwada mibhedhi yavo, maringira utitinini wavo.

⁹ Mwakaenda kunamambo nemafuta, mwakawanza mafuta enyu emakha; mwakatuma vatumwa venyu kuretu, nokudzidzasa pashi kunyazwi kuguma muSheori.

¹⁰ Mwakarembeswa ngokureba kwerwendo rwenyu, asi amuzi kuronza kuti, “Azvidetseri.” Ngokuti mwakaona kudisisa kwenyu kwechimusirirwa, ndizvo auzi kupera simba.

¹¹ Ndiani vemwakatya nokukaruka zvakaita kuti munyepe, nokurekera kundikarakadza nokuti kupinimidza ndini mumwoyo mwenyu? Andizi kunyarara kwenguva yakareba, nemwi amundityi here?

¹² Ndinozoteketesa kururama kwenyu nemishando yenyu, asi azvizomudetseri.

¹³ Naapo pomunodaidzira, miedzaniso yenyu yemwakaunganidza ngaimusunhure! Dutu rinozoitora, femero rinozoitora kuenda kuretu. Asi iye unoisa kugonda kwake mwendiri unozogara nhaka yenyika, naye unozogara nhaka yomutunhu wangu wakachena.

Chigondiso chaMwari choKudetsera noKurapa

¹⁴ Zvinozozwi, “Akai, akai, nasirirai njira, muduse zvinopumhuna kubva munjira yevanhu vangu.”

¹⁵ Ngokuti izvi ndizvo zvinoronza uwo uri padera newakakwirira, uwo unogara mumhera nariini, uwo zina rake Rakachena: “Ndinogara mundau yakakwirira neyakachena, nouwo unomweya unotambudzika, wakapfaa mumweya, kumusirira mumweya wouwo wakapfaa, nokumusira mwoyo yaavo vanotenda ngomwoyo.

¹⁶ Ngokuti andingaangiri kuitira ndaa nokuti kuangira kunyaradzwa, ngokuti zvino mweya ungazopera simba pamberi pangu, kunyazwi nemweya yendakasika.

¹⁷ Ngendaa yokushaisha kwokuemura kwake ndakamutsenekera; ndikamuchaya, ndakahwara ndakatseneka; asi wakaangira kupetuka sure munjira yokuda kwomwoyo wake.

¹⁸ “Ndaona njira dzake, asi ndinozomurapa; ndinozomutungamira nokumuunzidzira ngokuembedzera.

¹⁹ Ndinosika michero yemiromo yevachemi muIsuraeri; kunyarara, kunyarara kunouwo uri kuretu, nokunouwo uri pasinde,” unoronza Mambo Mwari; “Neni ndinozomurapa.

²⁰ Asi vakashata vakadai ngoruandhle rusikakoni kuterama, urwo mvura yarwo inobudisa matope nemavhundu.

²¹ Akuna kunyarara kunevakashata,” unoronza Mwari wangu.