Isa. 56 - Bhaibheri Rakachena muChindau

Vanhu vaMwari Vanoerengwa mukati mweMadzinza Eshe

¹ Izvi ndizvo zvinoronza Mambo Mwari, “Ngwarirai kutonga kwakarurama nokuita zvakarurama, ngokuti ruponeso rwangu ruri pasinde pokuuya, nokuripira kwangu kunozooniswa.

² Unomuchena munhu unoita izvi, nouwo unozvingwarira, nouwo unongwarira Sabatha kuti asarisvipisa, nokungwarira nyara yake kuti isaita zvakashata.”

³ Musatendera mupara, uwo wakashonganiswa kunaMambo Mwari, kuti aerekete echiti, “Mambo Mwari ngegwinyiso unozondiparadzanisa kubva kuvanhu vake:” nokusikatendera mutenwa kuti ati, “Ringira, ndiri muti wakaoma.”

⁴ Ngokuti izvi ndizvo zvinoronza Mambo Mwari, “Kumitenwa inongwarira maSabatha angu, avo vanotsanangura zviro zvinondidakadza nokungwarira chitenderano changu,

⁵ ndinozopa mumhatso yangu, nomukati mwemarukumbati rwangu, muedzaniso nezina rakanaka kupinda vakororo nevanasikana; ndinozovapa zina risikaperi risikazogurwi.

⁶ Nevapara vanodzibatanidza kunaMambo Mwari, kuti vamushandire, kuda zina raMambo Mwari, nokuita varanda vake, veshe avo vanongwarira Sabatha kuti vasarisvipisa, nokungwarira chitenderano changu,

⁷ ava ndinozovaunza kumutunhu wangu wakachena, nokuvaita kuti vadakare mumhatso mwangu mwokukumbira; midiro yavo yokupisha nemibairo yavo inozoashirwa padera pearita rangu; ngokuti mhatso yangu inozodaidzwa kuti imhatso yokudira yevanhu veshe.”

⁸ Izvi ndizvo zvinoronza Mambo Mwari, Mwari uwo unounganidza vakarashwa vaIsuraeri, unoti, “Ndichazounganidza vamweni kwevari, ngapabanze paavo vakaunganidzwa.”

Vatungamiriri vaIsuraeri Vanoitirwa Ndaa

⁹ Imwimwi mweshe zvikara zvomushango, imwimwi mweshe zvikara zviri mugwasha uyai mudye.

¹⁰ Varindi vake mapofu, veshe avana ruziyo, imbwa dziri zvimbungumbungu, dzisikaukuri; dzinorota hope, nokuata pashi dzechidisa kukutsira.

¹¹ Imbwa dzinokara kudya, dzisikagutswi. Vaushi vasikakoni kuzwisisa; veshe vatokunukukira kunjira dzavo, umwe ngaumwe unotsvaka kuuyirwa kwake.

¹² Vanoti, “Uyai, ndinomuunzira vhini, ngatidzigutise ngokumwa kunoradzisa. Namangwani unozodai ndinyamashi, kunyazwi kupinda kuwanda.”