Isa. 55 - Bhaibheri Rakachena muChindau

Chipo cheNyasha chaMwari

¹ Izwai! Mweshe munenyota, “Uyai kumvura; nouwo usina mare, uya, utenge udye! Uya, utenge vhini nomukaka musina mare nokuti mutengo.

² Ngenyi wechipedza mare yako ngeizvo zvisiri kudya, nomushando wako weizvo zvisikagutsi? Nasa kupurutana kwendiri, udye izvo zvakanaka, nemweya yako ngaudakadzwe ngezvakakora.

³ Kotamisira nzee yako, uuye kwendiri; purutana, kuti mweya wako upone. Ndinozoita chitenderano newe chemhera nariini, nyasha dzangu dzinorudo, rudo rwegwinyiso rwakagondiswa Dhavhidha.

⁴ Ringira, ndakamuita kuti aite chapupu kuvanhu, mutungamiri nomupangi wevanhu.

⁵ Ringira, unozodaidza madzinza ousikazii, nemadzinza asikakuzii anozorumba echiuya kwouri ngendaa yaMambo Mwari, Mwari wako, Wakachena waIsuraeri, ngokuti wakukurisa.”

⁶ Tsvaka Mambo Mwari achaoneka, mudaidze achipasinde.

⁷ Wakashata ngaasiye njira yake, nomunhu usikazi kururama mipinimidzo yake; ngaatenderukire kunaMambo Mwari, naye unozomuitira nyasha, nokunaMwari wedu, ngokuti unozomukungurira yaamho.

⁸ “Ngokuti ndangariro dzangu adzisiri ndangariro dzenyu, nokuti njira dzenyu njira dzangu,” unoronza Mambo Mwari.

⁹ “Ngokuti kudai ngematenga akanyanya kukwirira kupinda nyika, ndizvo njira dzangu dzakakwirira kupinda dzenyu, nendangariro dzangu dzakakwirira kupinda ndangariro dzenyu.

¹⁰ Ngokuti kudai ngemvura inonaya nechando zvinobva mudenga, zvisikahwiriremwo metsa zvanyakatisa nyika, kuti imerese zviyo, kuti izvipe mbeu kumukushi nokudya kuvadyi,

¹¹ ndizvo zvinoita izwi rangu iro rinobuda kubva pamuromo wangu; arizopetuki kwendiri risina chiro, asi rinozopedza icho chendinoda, nokubudirira kwendinorituma.

¹² Ngokuti munozobuda ngokudakara, mwechitungamirwa kupetuka mukunyarara; mitunhu nezvimitunhu pamberi penyu inozoputika mukuemba, nemiti yeshe yeshango inozoembera nyara dzayo.

¹³ Pandau yomuti weminzwa panozomera muti womusaiprasi, pandau pegwananguruwe panozomera mumitiri; neichi chinozoita chikarakadziso kunaMambo Mwari, nechioniso chisikaperi chisikazogurwi.”