Isa. 54 - Bhaibheri Rakachena muChindau

Rudo rwaMambo Mwari kuVaIsuraeri

¹ “Emba, O ngomwa iwewe usikazi kubereka; putika kuemba, unase kudaidzira, iwewe usikazi kurwadziwa! Ngokuti vana vomukadzi wakarambwa vakapinda kuwanda kunevana vomukadzi wakaroorwa,” unoronza Mambo Mwari.

² “Kudza ndau yetende rako, machira ougaro hwako ngaatambanudzwe; usatsonza; rebesa tambo dzematende ako, ugwinyise mbambo dzako.

³ Ngokuti unozowandira kumudyo nokumuoshwe; nemibarirwana yako inozogara nhaka yemadzinza, nokuita kuti madhorobha akaita matongo agarwe.

⁴ Usatya, ngokuti auzotsverudzwi; usapera simba, ngokuti auzopindi mukutsverudzwa; ngokuti unozoriyarwa kutsverudzwa kwoutsva hwako, auchazokarakadzizve kushoorwa kwoushirikadzi hwako.

⁵ Ngokuti Musiki wako ndiye mwamuna wako, Mambo Mwari wehondo ndiro zina rake; Wakachena waIsuraeri ndiye Muripiri wako; unozodaidzwa kuzwi, Mwari wenyika dzeshe.

⁶ Ngokuti Mambo Mwari wakakudaidza kudai ngomukadzi uwo wakarekerwa unotambudzika mumweya, kudai ngomukadzi uwo wakaroorwa ari mutsva, apo arambiwa,” unoronza Mwari wako.

⁷ “Kwomukuwo mudoko ndakakusiya, asi ngenyasha huru ndinozokuunganidza.

⁸ Ngoushungu hunofashukira ndakafisha hope yangu kubva kwouri mukuwo mudoko; asi ngenyasha dzangu dzisikaperi ndinozokukungurira,” unoronza Mambo Mwari, Muripiri wako.

⁹ “Ngokuti ichi chakadai ngemazuva aNoa kwendiri; kudai ngezvendakapika kuti, ‘Ndambi yaNoa aichazoapozve padera penyika;’ ndizvo ndapika kuti andizokutsenekeri nokuti kukutuka.

¹⁰ Ngokuti mitunhu inozobva nezvimitunhu zvechiduswa; asi nyasha dzangu dzinorudo adzizoperi kwouri, nechitenderano changu chokunyarara achizoduswi,” unoronza Mambo Mwari, uwo unenyasha kwouri.

Jerusarema Richauya

¹¹ “O unotambudzwa nokukandirwa apo naapo ngomubvumo.” “Usikaembedzerwi, ringira, ndinotsimisa mapuwe ako ngemiara yakanaka, nokuisa matsikiro ako ngemapuwe esafire.

¹² Ndinozoita zvatsungu zvako ngemarubhi, misiwo yako ngemapuwe anongaikira, eshe marukumbati ako ndinozoaisa mapuwe anomutengo mukurutu.

¹³ Vana vako veshe vanozodzidziswa ndiMambo Mwari; nokubudirira kwevana vako kunozoita kukurutu.

¹⁴ Mukururama unozoemeswa; nokutambudzwa kunozoita kuretu kubva kwouri; auzotyi; kutyisa kunozoita kuretuzve, ngokuti akuzouyi pasinde pako.

¹⁵ Kudai aripo unomusa bope, aribvi kwendiri; kunyazwi ndiani unozomusa bope newe, unozowa ngendaa yako.

¹⁶ Ringira, ndini ndakasika mupfuri uwo unovhutira masimbe omuriro, naye unoita chikhayo chinonakira mushando wacho; ndakasika muparadzi kuti aparadze.

¹⁷ Apana chokurwa ndicho chakanasirirwa kurwa newe chinozobudirira, ndii dzeshe dzinozokumukira mukutongwa unozodzinyisa. Iyi ndiyo nhaka yevaranda vaMambo Mwari, nokururamiswa kwavo kunozobva kwendiri,” unoronza Mambo Mwari.