Isa. 53 - Bhaibheri Rakachena muChindau

¹ Ndiani watenda mushumo wedu? Nomuoko waMambo Mwari waoniswa kunaani?

² Ngokuti wakakura pamberi pake kudai ngomuningwi wechisimwa, nokudai ngenzinde inobuda mumavhu akaoma; aana muemo wakanaka nokuti umambo, naapo tinozomuona akuna unaku hwetingamuda ndihwo.

³ Wakashoorwa nokurambwa ngevamweni; munhu wamadambudziko, nowokurovedzera kusvipo mwoyo; kudai ngeumwe uwo vanhu vakafisha hope dzavo kubva kwaari; wakashoorwa, nesu atizi kumuremeredza.

⁴ Ngegwinyiso wakatwara kusvipo mwoyo kwedu, akatwara nhenda dzedu; asi isusu takamuerenga ari wakatambudzwa, wakachaiwa ndiMwari, nokutambudzwa.

⁵ Asi wakaremadzwa ngendaa yezvishaishi zvedu, wakaitwa mizvimbiri ngendaa yokushata kwedu; kuororwa kwokunyarara kwedu kwakaa padera pake, ngemizvimbo yake tinoponeswa.

⁶ Isusu teshe takarashika kudai ngemakwai, takapauka umwe ngaumwe kunjira yake; naMambo Mwari wakaisa padera pake kushaisha kwedu kweshe.

⁷ Wakashononeswa, akatambudzwa, asi aazi kubeura muromo wake; wakaunzwa kudai ngegwai mukuurawa, nokudai ngegwai rinonyarara pamberi pomugundi waro, ndizvo aazi kubeura muromo wake.

⁸ Ngokuangiridzwa kutongwa wakatorwa. Ndiani uwo unozoereketa ngemibarirwana yake? Ngokuti iye wakagurwa kubva munyika yevanopona, wakatambudzwa ngendaa yokupauka kwavanhu vangu.

⁹ Vakaita iba rake nevakashata, nomukufa kwake nomupfumi; kunyazwi asikazi kuita zvakashata, paiya pasina kuchengedza mumuromo wake.

¹⁰ Asi kwaiya kuda kwaMambo Mwari kumuparadza ngokurwadziwa apo unoita kupona kwake mudiro wokushaisha, unozoona mubarirwana wake, unozorebesa mazuva ake; kubudikidza ndiye kuda kwaMambo Mwari kunozobudirira munyara yake.

¹¹ Ngesure kwokurwadziwa unozoona michero yokutambudzika kwomweya wake, naye unozogutiswa; kubudikidza ngokuzia kwake muranda wangu wakarurama unozopembedza vazhinji; naye unozotwara zvishaishi zvavo.

¹² Ndizvo ndinozomupa chikoaniswa chake pakati pevakuru, naye unozokoanisirana zvakachakatwa nevanesimba; ngokuti wakadurura mweya wake metsa pakufa, akaerengwa pamwepo nevashaishi; asi wakatwara kushaisha kwevazhinji, wakakumbirira kukungurirwa kwevapauki.