Isa. 52 - Bhaibheri Rakachena muChindau

Mwari Unozosunhura Jerusarema

¹ Muka, muka, pfeka simba rako, O Zioni! Pfeka machira ako akanaka, O Jerusarema, dhorobha rakachena; ngokuti kubvira zvinopano akuchazouyi kwouri usikazi kuchekwa nousikazi kusukika.

² Dziguwe kubva kubukuta; miruka ugare, O Jerusarema: dzisunhure kubva kuzvisungo zvomutsipa wako, O mwanasikana weZioni mubatwa.

³ Ngokuti izvi ndizvo zvinoronza Mambo Mwari, “Mwakatengeswa ngezvisina shwiro, nemwi munozoripirwa ngepasina mare.”

⁴ Ngokuti izvi ndizvo zvinoronza Mambo Mwari, Mwari: “Karetu vanhu vangu vakadzaka muEgipite koogaramwo vari vanhu vapara; vaAsiriawo vakavatambudza pasina ndaa.

⁵ Ndizvo zvino, ndinoitenyi pano,” unoronza Mambo Mwari, “Ndechiona kuti vanhu vangu vanotorwa pasina ndaa? Vatongi vavo vanovapopotera,” unoronza Mambo Mwari, “Nezina rangu rinoangira kutukwa mazuva eshe.

⁶ Ndizvo vanhu vangu vanozozia zina rangu; ndizvo vanozozia ngeiro zuva kuti ndini unoereketa, ringirai, ndini.”

⁷ A kunakanyi padera pomutunhu kwetsoka dzouwo unodaidzira kunyarara, uwo unouya nemashoko akanaka, uwo unoteketesa ruponeso, uwo unoti kuZioni, “Mwari wako unotonga!”

⁸ Purutana! Varindi vako vanodaidzira; vanoemba veshe pamwepo ngokudarakara; ngokuti pamhene vanoona kupetuka kwaMambo Mwari kuenda Zioni.

⁹ Embai pamwepo kuemba, imwimwi matongo eJerusarema; ngokuti Mambo Mwari waembedzera vanhu vake, waripira Jerusarema.

¹⁰ Mambo Mwari wafukura muoko wake wakachena pamberi pemadziso emadzinza eshe, nemagumo eshe enyika anozoona ruponeso rwaMwari wedu.

¹¹ Ibvai imwimwi, ibvai, budai kubanze kubvapo! Musagwama chiro chinosvipisa; budai kubva pakati paro; mudzichenese, imwimwi munotwara zvidziyo zvaMambo Mwari.

¹² Ngokuti amuzobudi ngokukasira nokuti ngokutiza; ngokuti Mambo Mwari unozoenda pamberi penyu, naMwari waIsuraeri unozoita mungwariri ngesure kwenyu.

Muranda woKutambudzika

¹³ Ringirai, muranda wangu unozobudirira, unozokudzwa nokukuriswa, naye unozokudzwa kakurutu.

¹⁴ Vazhinji vakashamiswa ndiye, (hope yake yakashaishirwa kupinda kunyazwi ngouri munhu, nomuemo wake kupinda womunhu).

¹⁵ Ndizvo anozofafazira madzinza akawanda; madzimambo anozokonya miromo yavo ngendaa yake; ngokuti izvo zvisikazi kumboronzwa kwevari vanozozviona; neicho chevasikazi kumbozwa, vanozochizwisisa.