Isa. 51 - Bhaibheri Rakachena muChindau

Mazwi oKuembedzera Jerusarema

¹ “Purutanai kwendiri, imwimwi munoteerera kururama, imwimwi munotsvaka Mambo Mwari. Ringirai kuruware iyo kwemwakatemwa, nokumurindi wehunza kwemwakatsiwa.

² Ringirai kunaAbrahama baba enyu, nokunaSara uwo wakamubara; ngokuti waiya umwe wega apo pendakamudaidza, asi ndakamufumisa nokumuwanza.

³ Ngokuti Mambo Mwari unozoembedzera Zioni; unozoembedzera ndau dzaro dzeshe dzakaparadzwa, unozoita kuti shango raro ridai ngomunda weEdheni, rubaya rwaro kudai ngomunda waMambo Mwari; kudakara nokudakadzwa zvinozooneka mukati mwaro, kubonga neizwi rokuemba.

⁴ Purutanai kwendiri, imwimwi vanhu vangu; ndizwei, imwimwi dzinza rangu; ngokuti mupango unozobuda kubva kwendiri, nokutonga kwakanaka kwangu kueme kuita kujeka kwevanhu.

⁵ Kururama kwangu kunokwedzera pasinde, noruponeso rwangu ruri munjira, nemioko yangu inounza kutonga kwakanaka kumadzinza. Zviwi zvinozoringira kwendiri, zvinozogondera kumioko yangu.

⁶ Mirudzai madziso enyu kumatenga, muringire pashi panyika; ngokuti matenga anozongarangaka kudai ngechiushi, nenyika inozotsakara kudai ngejira, naavo vanogaramwo vanozofa ngenjira inotodzana; asi ruponeso rwangu runozogara mhera nariini, nokururama kwangu akuzopedzwi.

⁷ Purutanai kwendiri, imwimwi munozia kururama, imwimwi vanhu vane mupango wangu mumwoyo yenyu; musatya kutsverudzwa ngavanhu vamweni, musatya kusvororedza kwavo.

⁸ Ngokuti unundu hunozovadya kudai ngejira, nehonye dzinozovadya kudai ngemamviri; asi kururama kwangu kunozogara mhera narini, noruponeso rwangu kumibarirwana yeshe.”

⁹ Muka, muka, upfeke simba, O muoko waMambo Mwari! Muka, kudai ngemumazuva ekaretu, mibarirwana yakapinda. Andiwepi uwo wakatematema Rahabhi kuita zvigurwa here, uwo wakabaya chikara chinotyisa?

¹⁰ Andiwepi wakaomesa ruandhle, mvura yakawanda yoruandhle rwakadzama; wakaita njira muruandhle rwakadzama, kuti vakaripirwa vaambuke?

¹¹ Ndizvo vakaripirwa vaMambo Mwari vanozohwirira, navo vanozouya Zioni, vechiemba; nokudakara kusikaperi kunozogara padera pemasoro avo; vanozoona kudakadzwa nokudakara, kusvipo mwoyo nokutsumba zvinozovatiza.

¹² “Inini, ndini aye unokuembedzera; ngenyi zvino wechitya munhu unosisira kufa, munhu unofota kudai ngomwenje?

¹³ Wariyarwa Mambo Mwari, Musiki wako, uwo wakatambanudza matenga, nowakaaka matsikiro enyika. Munoangirira kutya zuva reshe ngendaa youshungu hwomutambudzi, uwo unokotamira kuparadza. Asi huripari ushungu hwomutambudzi?

¹⁴ Mubhanditi unokasira kusunhurwa; aazofi nokudzaka muhunza, nokuti kutama chingwa.

¹⁵ Ngokuti inini ndini Mambo Mwari, Mwari wako, uwo unovhundura ruandhle maungu akaungumira; Mambo Mwari wehondo ndiro zina rake.

¹⁶ Ndaisa mazwi angu mumuromo wako, nokukufisha mubvute renyara yangu, ndechitambanudza matenga, nokuaka matsikiro enyika, nokuti kuneZioni, ‘Muri vanhu vangu.’ ”

Magumo oKutambudzwa kweJerusarema

¹⁷ Mukai, mukai! Miruka, O Jerusarema, iwewe wakamwa panyara yaMambo Mwari tsani youshungu hwake, uwo wamwa masese mujomeya rokuthethereka.

¹⁸ Akuna naumwe wokumutungamirira pakati pevana veshe vaakabereka; apana naumwe unomubata nyara pakati pevana veshe vaakarera.

¹⁹ Izvi zviro zviiri zvakakuwira; ndiani unozokusvipiro mwoyo? Kuchakatwa nokuparadzwa, nzara neshoti; ndinozokuita maembedzerenyi?

²⁰ Vana vako vademera, vanoata ngedera kwemapato eshe, kudai ngeshoma yabatwa mumambure; vakazadzwa ngoushungu hwaMambo Mwari, kukaraidza kwaMwari wako.

²¹ Ndizvo izwa izvi zvino, iwewe unotambudzwa, uwo wararadza, asi haiwa ngevhini.

²² Izvi ndizvo zvinoronza Mambo wako, Mambo Mwari, Mwari wako uwo unoemerera ndaa dzevanhu vake, “Ringira, ndakutorera tsani yokuthethereka kubva munyara yako; auchazomwi masese ejomeya roushungu hwangu.

²³ Asi ndinozoiisa munyara yaavo vanokutambudza, avo vakati kwouri, ‘Gwadama pashi, kuti tihambe padera pako; newe wakaradzika pashi mushana wako kuti udai ngamavhu nokudai ngepato, kuneavo vanohamba padera paro.’ ”