Isa. 50 - Bhaibheri Rakachena muChindau

¹ Izvi ndizvo zvinoronza Mambo Mwari, “Iri pari tsamba yamai ako yokugura muchado, iyo yendakavarasha ndiyo? Nokuti kunaani wevakweretesi vangu wendakakutengesa kwaari iwewe? Haiwa, ngendaa yezvishaishi zvako wakatengeswa, ngendaa yokupauka kwako mai ako akarambwa.

² Ngenyi paiya pasina naumwe apo pendakagumapo? Ngenyi paiya pasina naumwe wokundipingura apo pendakadaidza? Nyara yangu yakafupiswa kuti aingakoni kuripira here? Nokuti andina simba rokusunhura here? Ringira, ngokukaraidza kwangu ndinoomesa ruandhle, ndinoita kuti ndwizi dziite rubaya; hove dzadzo dzinonuhwa, ngokuti apana mvura, nadzo dzinofa ngendaa yenyota.

³ Ndinopfekesa matenga ngokusvipa, neni ndinoita kuti zvokusimira zvawo zviite machira emasaka.”

Kupurutana kwoMuranda waMambo Mwari

⁴ Mambo Mwari, Mwari wandipa rurumi rwomudzidzisi, kuti ndizie kugwinyisa ngokuereketa izwi kwaari unoremba. Unondimusa mangwanani ngemangwanani, unomusira nzee dzangu kuti ndipurutane kudai ngevakadzidziswa.

⁵ Mambo Mwari, Mwari wakabeura nzee dzangu, neni andizi kuita unomukira, nokuti kupetuka sure.

⁶ Ndakafuratira mushana wangu kunevakandichaya, netsaya dzangu kuneavo vakabvita ndebvu; andizi kufisha hope yangu kubva mukutsverudzwa nokupfirwa mata.

⁷ Mambo Mwari, Mwari unondidetsera; ndizvo andizi kutsverudzwa; ndizvo ndaemesa hope yangu kuti idai ngebuwe rakakonza, neni ndinozia kuti andizotsverudzwi.

⁸ Uri pasinde uwo unondipembedza. Ndiani unozophikisana neni? Ngatieme pamwepo. Ndiani gaa rangu? Ngaakwedzere kwendiri.

⁹ Ringirai, Mambo Mwari, Mwari unondidetsera; ndiani uwo unozondiitira ndaa? Veshe vanozotsakara kudai ngezvokufuka; unundu hunozovadya.

¹⁰ Ndiani pakati penyu unotya Mambo Mwari, unopurutana izwi romuranda wake, uwo unohamba muchidima, naye asina kujeka, asi unogonda zina raMambo Mwari, nokutseyama panaMwari wake?

¹¹ Ringirai, imwimwi mweshe murivabasi vomuriro, munodzitendenedza ngetsatsi. Hambai mukujeka kwomuriro wenyu, nomukati mwetsatsi dzemwakabasa. Ichi ndicho chomunozoashira kubva kunyara yangu: munozoata pashi mukutambudzika.