Isa. 5 - Bhaibheri Rakachena muChindau

Ngoma yoMunda weMivhini

¹ Ndinozoembera mudikani wangu ngoma yomudikani wangu ngomunda wake wemivhini: Mudikani wangu waiya nomunda wemivhini pamutunhu unendimo kwayo.

² Wakaurima, akadusa mapuwe, akausima mavhini akanakisisa, wakaaka thawa pakati pawo, wakaita pokukamira vhini pakati pawo; wakaugarira echida kuti ubereke mavhini, asi wakabereka mavhini omushango.

³ Zvino, imwimwi vagari vomuJerusarema nevanhu vaJudha, tongai, ndapota, pakati pangu nomunda wangu wemivhini.

⁴ Chiinyi chendaisisira kuitirazve munda wangu wemivhini, chendisikazi kuita mukati mwawo? Ndizvo, apo ndakaringira kuti ubare mavhini, wakabara mavhini omushango ngenyi?

⁵ Zvino izwai, ndinozomuronzera chendinozoita kumunda wangu wemivhini. Ndinozodusa rushosha rwawo, nawo uzodyiwa; ndinozoputsa rukumbati rwawo, nawo unozotsikwatsikwa pashi.

⁶ Ndinozouparadza, auzotonongorwi nokuti kushakurwa; asi unozomera makato neminzwa; ndinozopangazve makore kuti asanayisa mvura padera pawo.

⁷ Ngokuti munda wemivhini waMambo wehondo imhatso yaIsuraeri, nevanhu vaJudha muti wake unodakadza; naye wakakarira kuona kutonga kwakanaka, asi wakaona kuparadza ngazi; kuona kururama, asi wakaona kuchema.

Zvishaishi Zvinoitwa ngeVanhu

⁸ A imwimwi munotutsira mhatso nemhatso, munobatanidza munda nomunda metsa pasisina ugaro hwomunhu, asi imwimwi munogara mwega pakati penyika.

⁹ Mambo Mwari wehondo unopika mukuzwa kwenzee dzangu, “Ngegwinyiso mhatso dzakawanda dzinozoita matongo, dzakakura nokunaka, dzisina vanhu.

¹⁰ Mahekitha gumi omunda wemivhini anozobudisa maritha masere ega evhini. Zana nemakumi masere emaritha embeu anozobudisa maritha gumi nemasere ega ezviyo.”

¹¹ A, imwimwi munofumira kumiruka ngokukasira mangwanani, kuteera zvokumwa zvinoradzisa; munonzerereka pakati pousiku, metsa vhini ramuradzisa;

¹² kumadhiri enyu munoridzwa gitari, chidangari, ngoma yesimbi, munanzi nevhini, asi amupinimidzi ngomushando waMambo Mwari, amuzi kuringira mushando wenyara dzake.

¹³ Ndizvo vanhu vangu vanoenda muubatwa ngokutama kuzia, nevanhu vavo vanoremeredzwa vanofa ngenzara, nechiunga chavo chinopera ngenyota.

¹⁴ Ndizvo Sheori rakakudza kudisisa kwaro, nokushama muromo waro zvisina chipimo; vakuru vomuJerusarema nevazhinji vavo vanodzakamwo, chiunga charo naavo veshe vanodzikudza mukati mwaro.

¹⁵ Munhu unokotamiswa pashi, nomunhu weshe unozodzaswa pashi; nemadziso evanodzikudza anozopfaiswa.

¹⁶ Asi Mambo Mwari wehondo unokudzwa mukutonga kwakanaka, naMwari Wakachena unozodzionisa kuti wakachena ngokururama.

¹⁷ Zvino vana vemakwai vanozodya kudai ngepambusho pawo, akakodzwa nevana vemakwai anozodya ari pakati pematongo.

¹⁸ A, imwimwi munokweya kushata ngemapote ezvisina shwiro, munokweya zvishaishi kudai ngevanokweya ngebote rengoro,

¹⁹ avo vanoti, “Ngaakasire, ngaakasire nomushando wake, kuti tiuone; nourongwa hwoUwo Wakachena waIsuraeri ngahukasire kuzadzisika, kuti tihuzie!”

²⁰ A, imwimwi munodaidza kushata kuti kunaka, nokunaka kuti kushata; munoisa chidima pandau yokujeka, nokujeka pandau yechidima; munoisa chinovava pandau yechinotapira, nechinotapira pandau yechinovava!

²¹ A, imwimwi vakangwara mumadziso enyu, munokona mukuona kwenyu!

²² A, imwimwi munoita ngwazi dzokumwa vhini, vamuna vanesimba mukukumanidza zvokumwa zvinoradzisa,

²³ imwimwi munopembedza vakashata ngendaa yokutengerwa, munodusa maruramiro ewakarurama!

²⁴ Ndizvo zvino, kudai ngomurazvu womuriro unodya matsotso, nokudai ngomurazvu unopisha matsengwe akaoma, ndizvo nzinde dzawo dzinoita dzakaora neruwa ravo rinozopwititika kudai ngebukuta; ngokuti varamba kupanga kwaMambo Mwari wehondo, nokushoora izwi roUwo Wakachena waIsuraeri.

²⁵ Ndizvo ushungu hwaMambo Mwari hunobaswa kuvanhu vake, naye unotambanudza nyara yake kwevari kuvachaya; mitunhu inozungunyika, nemiiri yaavo yakafa inoita kudai ngemarara mukati mwemapato. Ngeizvi zveshe ushungu hwake ahuzi kupera, nenyara yake ichakatambanudzwa nazvino.

²⁶ Unozomirudza mujeki kumadzinza ari kuretu, unozoridza kweya kwevari vari kumagumo enyika; ringira, vaapano vanorumba nokukasira.

²⁷ Apana naumwe wavo unoremba nokuti umwe unopumhunwa; apana naumwe unokutsira nokuti kuata; apana bhande remuchiunu rakasunhurika, apana rusinga rwemagwada runodambuka.

²⁸ Misee yavo yakapinza, nembita dzavo dzeshe dzakakungwa; makumbo emahachi avo anoringirika akadai ngebuwe rinokonza rinemiara, nemavhiri awo akadai ngechipupuri.

²⁹ Kurira kwawo kunodai ngemhondoro, vanorira kudai ngemhondoro itsva; vanobhonga nokubata mhuka, vanoitwara kuenda nayo, pasina naumwe unonunura.

³⁰ Vanozoiririra ngeiro zuva kudai ngokuungumira kworuandhe. Nokudai umwe echiringira kunyika, uchaona chidima nokutambudzika, nokujeka kunosvipiswa ngemakore.