Isa. 48 - Bhaibheri Rakachena muChindau

Mwari ndiMambo Mwari weZvichauya

¹ Izwai izvi, O mhatso yaJakobe, avo vanodaidzwa ngezina raIsuraeri, neavo vanobva kuchinyuka chaJudha, avo vanopika ngezina raMambo Mwari, vechipupura ndiMwari waIsuraeri, asi haiwa ngegwinyiso nokuti ngokururama.

² Ngokuti vanodzidaidza pachavo kuita vagari vedhorobha rakachena, nokudzigwinyisa ndiMwari waIsuraeri; Mambo Mwari wehondo ndiro zina rake.

³ Zviro zvekaretu ndakazvidaidzira karetu, zvakabuda kubva kumuromo wangu, neni ndakaita kuti zviziikanwe; zvino ndakazviita ngokukasira, nazvo zvakaitika.

⁴ Ngokuti ndinozia kuti uri wakakonza, nomutsipa wako unemurunda wakagwinya kudai ngesimbi, nehuma yako yakadai ngethusi,

⁵ ndizvo ndakazvironza kwouri izvi kubvira karetu; zvisati zvaitika ndakazvidaidzira kweuri, kuti usazoronza kuti, “Muedzaniso wangu wokudira wakazviita, miedzaniso yangu wakatsetswa newakaumbwa ndiyo yakazvipanga.”

⁶ Mwazwa, onai izvi zveshe zvino; nemwi amuzozvidaidziri here? Kubvira panguva ino kuenda mberi ndinokuita kuti uzwe zviro zvitsva, zvakafishika zviro zvomusikazi kuzia.

⁷ Zvakasikwa zvinopano, haiwa karetu; amuzi kuzvizwa zuro nyamashi asati aguma, kuitira kuti usazoronza kuti, “Ringirai, ndaizvizia.”

⁸ Ausati wazwa, ausati wazia; kubvira pamukuwo wekaretu nzee dzako adzizi kubeurwa. Ngokuti ndakazia kuti waizoita ngokuchengedzera kakurutu, nokuti kubvira pakubarwa wakadaidzwa kuzwi mupanduki.

⁹ Ngendaa yezina rangu ndanonosa ushungu hwangu, ngendaa yokukudzwa kwangu, ndinoubatira iwewe kuti ndisakurasha.

¹⁰ Ringira, ndakupereresa, asi haiwa kudai ngesirivha, ndakuedza mukati mwechoto chokutambudzika.

¹¹ Ngendaa yangu, ngendaa yangu, ndinozviita, ngokuti zina rangu ringasvipiswa ngenyi? Uthende hwangu andizohupi umweni.

Sairusi Mutungamiriri Wakatsanangurwa ndiMambo Mwari

¹² Purutana kwendiri, O Jakobe, naIsuraeri wendakadaidza: “Ndini aye; ndini wokutanga, neni ndiri wokugumisira.

¹³ Nyara yangu yakaisa tsikiro renyika, nenyara yangu yokumudyo yakatambanudza matenga; apo ndechizvidaidza, zvinomiruka kuema kutidzi.

¹⁴ Unganai, imwimwi mweshe muzwe. Ndiani pakati pavo wakadaidzira zviro izvi? Mambo Mwari unomuda. Unozoita kuda kwake padera peBhabhuroni, nomuoko wake unozorwisa vaKharadhea.

¹⁵ Inini, kunyazwi inini, ndaereketa nokumudaidza. Ndamuunza, naye unozoita kuti njira yake ibudirire.

¹⁶ Kwedzerai kwendiri, muzwe izvi. Kubvira pakutanga andizi kuereketa mukufishika, kubvira pamukuwo wechakaemeswa, ndaiyapo.” Nazvino Mambo Mwari, Mwari wandituma nomweya wake.

Urongwa waMambo Mwari ngeVanhu vake

¹⁷ Izvi ndizvo zvinoronza Mambo Mwari, Muripiri wenyu, Wakachena waIsuraeri: “Ndini Mambo Mwari, Mwari wenyu, uwo unomudzidzisa kuti muuyirwe; uwo unomutungamirira munjira inosisa kuti muhambe ndiyo.

¹⁸ O kudai mwaipurutana mipango yangu! Zvino kunyarara kwenyu kwaizodai ngerwizi, nokururama kwenyu kwaizodai ngemafungo oruandhle.

¹⁹ Mibarirwana yako yaizodai ngejecha, nevana vako vaizodai ngomicheche yaro; zina ravo arizobviswi, nokuti kuparadzwa kubva pamberi pangu.”

²⁰ Budai kubva Bhabhuroni, tizai kubva kuvaKharadhea, daidzirai izvi ngeizwi rokudakara, daidzirai, tumirai nokumagumo enyika; ronzai kuti, “Mambo Mwari waripira muranda wake Jakobe.”

²¹ Avazi kuzwa nyota apo paakavatungamirira murubaya; wakavaitira kuti mvura ierere kubva mubuwe; wakamwesa buwe, nemvura yakapopoma.

²² “Akuna kunyarara kunowakashata,” unoronza Mambo Mwari.