Isa. 47 - Bhaibheri Rakachena muChindau

Kutongwa kweBhabhuroni

¹ Dzaka pashi, ugare mubukuta, iwewe mhandwe, mwanasikana weBhabhuroni! Gara pashi pamavhu pasina dendemaro, mwanasikana wevaKharadhea! Ngokuti auchazodaidzwi kuti wakapfaa nousikabatiki.

² Tora makuyo, ukuye zviyo, dusa vheri rako, dusa jira rako, fukura mirenje yako, ambuka ndwizi.

³ Utitinini hwako hunozooneka, kutsverudzwa kwako kunozooneka. Ndinozounzidzira, andizotsari munhu.

⁴ Muripiri wedu, Mambo Mwari wehondo ndiro zina rake, uwo Wakachena waIsuraeri.

⁵ Gara mukunyarara, uende muchidima, mwanasikana wevaKharadhea! Ngokuti auchazodaidzwizve kuti uri vahosi voumambo.

⁶ Ndakatsenekera vanhu vangu, ndakasvipisa nhaka yangu; ndakavapira munyara yako, auzi kuvaitira nyasha; wakaisa joka rako rinorema padera pevasharuka.

⁷ Wakati, “Ndinozoita vahosi mhera nariini;” ndizvo auzi kuisa izvi zviro mumwoyo mwako, nokuti auzi kupinimidza magumisiro azvo.

⁸ Ndizvo zvino izwa izvi, iwewe wakadzipira mukudisisa kudakara, uwo unogara mukungwaririka, iwe unoti mumwoyo mwako, “Ndini inini, akuna umwenizve ngepabanze pangu; andizogari kudai ngeshirikadzi, nokuti andizozii kurashikirwa ngevana.”

⁹ Zveshe izvi zviro zviiri zvichauya padera pako ngomukuwo mudoko ngezuva rimwe, kurashikirwa ngevana noushirikadzi; mukuzara kwazvo zvinozouya padera pako, kunyazwi huripo uwandu hweman'anga ako, nesimba guru revasaramusi vako.

¹⁰ Iwewe wakazwa wakangwaririka mukushata kwako; wakaronza kuti, “Apana unondiona.” Ungwaru hwako noruziyo rwako zvakurashikisa, newe wati mumwoyo mwako, “Ndini ndega, akuna umweni ngepabanze pangu.”

¹¹ Asi kushata kunozouya padera pako, ukwo kwousikakoni kubvisa peuri ngemasaramuso; nokushata kunozokugumira, newe auzokoni kukudusa; nokuparadzwa kunozokugumira ngokukasira, ukwo kwousikazi kuzia chiro.

¹² Ema zvino mumasaramuso ako neman'anga ako akawanda, awo ewakashandira kubvira muutsva hwako; pamweni zvingaitika kuti ubudirire, pamweni zvingaitika kubudisa kutyisa.

¹³ Unorembeswa ngouwandu hwekubvunzisa kwako; tendera avo vanofunda ngezvomudenga vaeme vakuponese, avo vanoringira nyeredzi, nepamwedzi mutsva vakuronzere ngezvinozokugumira.

¹⁴ Ringira, vanozodai ngemahundi; muriro unozovapisha, avazodzinunuri pachavo kubva kusimba romurazvu. Akuzoiti masimbe okugota, nokuti muriro unogara pamberi!

¹⁵ Ava vanhu vakadai kwouri ngevewakashanda navo, avo vewakatengerana navo kubvira muutsva hwako; vanonzerereka umwe ngaumwe munjira mwake; apana naumwe unozokuponesa.