Isa. 46 - Bhaibheri Rakachena muChindau

¹ “Bheri naNebho vanokotama pashi; miedzaniso yavo yokudira inoita mutwaro padera pemhuka nen'ombe; zviro zvomunotwara zvakarongedzwa kudai ngomutwaro padera pemhuka dzakaremba.

² Vanokotama, vechigwadama pashi pamwepo; avakoni kugumisa mutwaro, asi ivo vemene vanopinda muubatwa.

³ Purutanai kwendiri, O vemhatso yaJakobe, veshe vakasara vemhatso yaIsuraeri, vakabarwa ndini kubvira pakuberekwa, kutwarwa kubvira mundani.

⁴ Kunyazwi muusharuka hwenyu ndiri aye, kunyazwi bvudzi renyu rachena, ndinozomutwara. Ndaita, ndinozotwara; ndinozotwara neni ndinozoponesa.

⁵ Munozonditodzanisa nani, munozondiedzanisa nenyi nokundiita ingateyi takatodzana?”

⁶ Vanomwaradza mukore kubvisa muchikhwama, nokupima sirivha pachipimo, vanotsvaka munyungurusi womukore, uwo unouita chimwari; zvino vanowira pashi, vechiudira.

⁷ Vanochimirudza papfudzi, vanochitwara, vanochiemesa pandau yacho, nacho chinoemapo; achikoni kuhamba kubva pandau pacho. Kudai umwe echidaidzira kwechiri, achikoni kupingura, nokuti kumuponesa kubva mukutambudzika kwake.

⁸ Karakadzai ichi, mupinimidze ndicho, mupinimidzezve ndicho mumwoyo yenyu, imwimwi vapauki,

⁹ Karakadzai zviro zvokutanga zvekaretu; ngokuti ndini Mwari, akuna umweni; ndini Mwari, akuna umweni wakadai ndini,

¹⁰ kudaidzira magumisiro, kubvira pakutangisa nokubvira panguva dzekaretu zviro zvisati zvaitwa ndechiti, chidisiso changu chinozogara chakaema, neni ndinozoita zveshe zvinondidakadzisa,

¹¹ ndechidaidza shiri inokara kubva kumabvazuva, munhu wendakapanga kudisisa kwangu kubva kunyika iri kuretu. Ndaereketa, ndinozochiita; ndaronga, neni ndinozozviita.

¹² “Purutanai kwendiri, imwimwi munemwoyo wakaoma, imwimwi muri kuretu kubva mukununurwa.

¹³ Ndinounza pasinde kununura kwangu, akusiri kuretu, noruponeso rwangu aruzononoki; ndinozoisa ruponeso rwangu muZioni, ngendaa yaIsuraeri uthende hwangu.”