Isa. 45 - Bhaibheri Rakachena muChindau

Mambo Mwari Unoemesa Sairusi

¹ Izvi ndizvo zvinoronza Mambo Mwari kunaSairusi, wakadzodzwa wake, uwo wendabata nyara yake yokumudyo, kuti anyise madzinza pamberi pake, nokusunhura zvokusimira zvoumambo, kubeura misiwo iri pamberi pake, nemisiwo yokupinda mudhorobha aizokonywi.

² “Ndinozoenda pamberi pako, ndechisereresa ndau dzakatunhumara; ndinozopwanya misiwo yethusi kuita zvigurwa nokubadzura ngepakati mipiningidzo yesimbi.

³ Ndinozokupa upfumi hwechidima, noupfumi hwendau dzakafishika, kuti uzie kuti ndini, Mambo Mwari, Mwari waIsuraeri, uwo unokudaidza ngezina rako.

⁴ Ngendaa yaJakobe muranda wangu, naIsuraeri wakatsanangurwa wangu, ndinokudaidza ngezina rako, ndinokupa mutupo wakanaka, kunyazwi aundizii.

⁵ Inini ndini Mambo Mwari, akuna umwenizve; ngepabanze pangu akuna mwari. Ndinokusimidza ngezvokurwa ndizvo, kunyazwi aundizii,

⁶ kuti vazie kubvira kumabvazuva nokubvira kumabirirazuva, kuti akuna umweni ngepabanze pangu. Ndini Mambo Mwari, akuna umweni.

⁷ Ndinoita kujeka nokusika chidima; ndinoita kunyarara nokusika kushata; ndini Mambo Mwari, uwo unoita izvi zveshe.

⁸ Nayai, O matenga kubva mudenga, nemakore ngaadurure pashi kururama; nyika ngaibeuke, kuunza ruponeso, ngaiite kuti kururama kubudewo; inini Mambo Mwari ndakazvisika.”

Mambo Mwari Musiki noMuiti weZviro Zveshe

⁹ Ihehe kwaari unorwisana nomusiki wake, chiwenda nomuumbi! Dongo rinoronza here kune unoriumba kuti, “Unoumbenyi?” Nokuti, “Mushando wako auna zvibato?”

¹⁰ Ihehe kwaari unoti kunababa, “Unoberekenyi?” Nokuti kumudzimai, “Unorwadziwa ngokuberekenyi?”

¹¹ Izvi ndizvo zvinoronza Mambo Mwari, Wakachena waIsuraeri, noMusiki wake; “Unozondibvunza here ngendaa yevana vangu, nokuti kundipanga ngendaa yomushando wenyara dzangu?

¹² Ndakaita nyika, ndikasika munhu padera payo; inyara dzangu dzakatambanudza matenga, neni ndakapanga hondo dzawo dzeshe.

¹³ Ndamirudza Sairusi mukururama, ndinozoruramisa njira dzake dzeshe; naye unozoaka dhorobha rangu, unozosunhura vabatwa vangu kuti vaende, pasina muripo nokuti mutengo,” unoronza Mambo Mwari wehondo.

¹⁴ Izvi ndizvo zvinoronza Mambo Mwari, “Upfumi weEgipite, nezvinotengeswa zveEthiopia, nezvevaSabheani, vamuna vakareba, vanozouya kwouri, navo anozoita vako; vanozoteera sure kwako, vanozouya vakasungwa ngemaketani, vanozokugwadamira. Vanozopota kwouri vechiti, ‘Mwari unewe iwewe wega, akuna umwenizve; akuna mwari ngepabanze pake.’ ”

¹⁵ Ngegwinyiso iwewe uri Mwari unodzifisha pachake, O Mwari weaIsuraeri, Muponesi.

¹⁶ Veshe vavo vanozotsverudzwa nokukangaidzwa, vaiti vemiedzaniso yokudira vanopinda mukukangaidzwa pamwepo.

¹⁷ Asi vaIsuraeri vanoponeswa ndiMambo Mwari ngoruponeso rwemhera nariini; amuzotsverudzwi nokuti kukangaidzwa mhera nariini.

¹⁸ Ngokuti ndizvo izvi zvinoronza Mambo Mwari, uwo wakasika matenga (Mwari emene!) Wakaumba nyika nokuiita, (wakaigwinyisa, aazi kuisikira madambudziko, asi wakaisikira kuti igariwe ngavanhu!) Inini ndini Mambo Mwari, akuna umweni.

¹⁹ Andizi kuereketa mukufishika, munyika yechidima; andizi kuronza kurudzi rwaJakobe kuti, mukukangaidzwa nditsvakenyi. Inini Mambo Mwari ndinoereketa gwinyiso, ndinodaidzira zvakarurama.

Mambo Mwari weNyika neMiedzaniso yeBhabhuroni

²⁰ “Unganidzanai pachenyu muuye pamwepo, kwedzeranayi pasinde, imwimwi mwakapokonyoka kubva mumadzinza! Avana ruziyo avo vanotwara peshe miedzaniso yavo yemiti, vechiangira kukumbira kunechimwari chisikakoni kuponesa.

²¹ Daidzira, ubudise ndaa yako; ngavapangane pamwepo! Ndiani wakaronza izvi karetu? Ndiani wakazvibudisa karetu? Andinipi Mambo Mwari here? Akuna mwari umweni ngepabanze pangu, Mwari wakarurama noMuponesi; akuna umweni ngepabanze pangu.

²² Kunukukirai kwendiri muponeswe, magumo eshe enyika; ngokuti ndini Mwari, akuna umweni.

²³ Inini pachangu ndakapika, pamuromo pangu pakabuda zvakarurama, izwi iro risikazopetuki, kwendiri mabvi eshe anozogwadama, nendimi dzeshe dzinozopika ndini.

²⁴ “Kwega munaMambo Mwari,” zvinozoronzwa ngendaa yangu kuti, “Mune kururama nesimba.” Vanozouya veshe vaimutsenekera vanozotsverudzwa.

²⁵ MunaMambo Mwari rudzi rweshe rwaIsuraeri runozopembedzwa nokuirikidzwa.