Isa. 44 - Bhaibheri Rakachena muChindau

Mambo Mwari Ndiye Mwari Ega

¹ “Asi zvino, izwai O Jakobe muranda wangu, Isuraeri uwo wendatsanangura.

² Izvi ndizvo zvinoronza Mambo Mwari uwo wakakusika, uwo wakakuumba mundani, naye unozokudetsera: Usatya, O Jakobe muranda wangu, Jeshuruni uwo wendatsanangura.

³ Ngokuti ndinozodurura mvura padera penyika inenyota, nezvinyuka padera pemavhu akaoma; ndinozodurura mweya wangu padera pemibarirwana yako, nezvifumiso zvangu padera porudzi rwako.

⁴ Vanozomera pakati pomwenje wakasvipira, kudai ngemiti yemichindwi iri pasinde pendwizi dzemvura.

⁵ Umwe uyu unozoti, ‘Inini ndiri waMambo Mwari;’ umweni unozodzidaidza pachake ngezina raJakobe; asi umweni unozonyora panyara yake kuti, ‘Ndiri waMambo Mwari,’ nokudzidudza zina raIsuraeri.”

⁶ Unoronza izvi Mambo Mwari, Mambo waIsuraeri, noMuripiri wake, Mambo Mwari wehondo: “Ndiri wokutanga neni ndiri wokugumisira; ngepabanze pangu apana mwari umweni.

⁷ Ndiani wakadai ndini? Ngavazvidaidzire, ngavazvironze nokuzviemesa pamberi pangu. Ndiani wadaidzira kubvira mukuwo wendakaemesa vanhu vekaretu nezviro zvinouya? Ngavatironzere zvichazouya.

⁸ Musatya nokuti kutyiswa; andizi kumuronzera here kubvira pamukuwo wendakazvidaidzira? Imwimwi muri zvapupu zvangu. Uripo here mwari umweni ngepabanze pangu? Haiwa, akuna buwe rimweni; andizii narimwe.”

Zvimwari Zvinoizwa Zvisina Shwiro

⁹ Veshe avo vanoita miedzaniso yezvimwari yakanyunguruswa avana shwiro nezviro zvevanodakarira zviro zvisina shwiro; zvapupu zvavo azvioni nokuti kuzia. Ndizvo vanotsverudzwa.

¹⁰ Ndiani ungaumba chimwari, nokuti kuumba muedzaniso usikaiti zvakanaka?

¹¹ Ringirai, veshe vanomudira vanozotsverudzwa; ngwazi vanhutuwo. Ngavaunganidzwe veshe pamwepo, ngavaeme; vanozotyiswa, vanozotsverudzwa veshe.

¹² Mupfuri unonasira sanho, echirishandira mumasimbe, unorinasira ngehamera, unorinasira ngenyara yake inesimba; unozwa nzara, nokupera simba rake; aamwi mvura, unodemera.

¹³ Mutsetsi unotambanudza chipimo, unotara muedzaniso ngechinyoreso, unoutsetsa ngembezo, unoupima ngechipimo chokutendenedza; unouita kudai ngomuemo womunhu, nounaku hwomunhu, kuti ugare mumhatso yokudira.

¹⁴ Unotemera pashi miti yemisedhare, nokuti kutsanangura miti yemuhorimu, nokuti yemiokhi, nokuita kuti ikure pakati pemiti yegwasha. Unosima muti womusedhare, nemvura yomudenga inougutisa.

¹⁵ Zvino unozoshandiswa kuitwa huni ngomunhu; unotora rupande rwawo kurugota pachake; unobasa rupande rumweni kuti abike chingwa ndirwo. Zvino unotora rupande rumweni kuita chimwari nokuchidira; unoita muedzaniso wakatsetswa nokuugwadamira.

¹⁶ Unopisha rupande rwawo mumuriro; padera porupande rwawo unokocha nyama, unoidya, naye unogutiswa. Unougotawo pachake echiti, “A, ndadziirwa, ndinokona kuuzwa muriro.”

¹⁷ Ngorupande rwawo rwasara unoita chimwari, chimuedzaniso chake; unochigwadamira nokuchidira, unokumbira kwechiri echiti, “Ndisunhure, ngokuti ndiwe mwari wangu.”

¹⁸ Avazii nokuti kuzwisisa; ngokuti vakapofomadza madziso avo kuti vasaona, nokuti vasakona kuzwisisa.

¹⁹ Apana naumwe unopiminidza, apana unokuzia nokuti kuzwisisa kuronza kuti, “Ndakapisha rupande rwawo mumuriro, ndikabikawo chingwa ngemasimbe awo, ndakakocha nyama ndikadya. Zvino ndinozoita rupande rwawo rwasara kuti chinyangadzo here? Ndinozogwadamira here chiro chakabva kumuti?”

²⁰ Unodya marota, mwoyo wakachengedzerwa wakamuhedhusa, naye aachakoni kudzisunhura pachake nokuronza kuti, “Chiro ichi chiri munyara yangu yomudyo aasiri manyepo here?”

Mambo Mwari Musiki noMuponesi

²¹ Karakadza izvi, O Jakobe, naIsuraeri, ngokuti uri muranda wangu; ndakakurura uri muranda wangu; O Isuraeri, auzoriyarikanwi ndini.

²² Ndatsvairira zvipauko zvako kuretu kudai ngegore, nezvishaishi zvako kudai ngemhute; petuka kwendiri, ngokuti ndakuripira.

²³ Embai, imwimwi matenga, ngokuti Mambo Mwari wazviita; daidzirai, A imwimwi udzamu wenyika; embai, O imwimwi mitunhu, O imwimwi makwasha, nomuti weshe uri mukati mwawo! Ngokuti Mambo Mwari waripira Jakobe, naye unozokudzwa mukati mwaIsuraeri.

²⁴ Izvi ndizvo zvinoronza Mambo Mwari, Muripiri wako, uwo wakakurura mundani: “Ndini Mambo Mwari, wakasika zviro zveshe, uwo ega wakatambanudza matenga, uwo pachake wakatambanudza nyika;

²⁵ uwo unokanyangidza zvioniso zvevanyepi, nokuita kuti manyanga aite mapenzi; uwo unohwirinza sure vamuna vakangwara, nokuita kuti ungwaru hwavo huite upenzi;

²⁶ uwo unogwinyisa izwi romuranda wake, nokuzadzisa kupanga kwenhumwa dzake; uwo unoti ngeJerusarema, rinozogarwa, nemadhorbha aJudha kuti, anozoakiswa, ndinozoakisa ndau dzavo dzakaputsika;

²⁷ uwo unoti kuudzamu, ‘Oma, neni ndinozoomesa ndwizi dzenyu;’

²⁸ uwo unoti kuSairusi, ‘Muushi wangu, unozoita zveshe zvendinoda;’ uwo unoti ngeJerusarema, ‘Rinozoakiswa,’ nokutemperi kuti, ‘Madzeyo ako anozoiswa.’ ”