Isa. 43 - Bhaibheri Rakachena muChindau

Mwari Unogondisa Kununura Vanhu vake

¹ Asi zvino, izvi ndizvo zvinoronza Mambo Mwari uwo wakakusika, O Jakobe, uwo wakakurura, O Isuraeri: “Usatya, ngokuti ndakuripira; ndakudaidza ngezina, uri wangu.

² Naapo wechiambuka ngomumvura, ndinozoapo newe; peunopinda mundwizi adzizokunzvaidzi; naapo peunopotya mumuriro, auzopishwi, nomurazvu auzokupedzi.

³ Ngokuti inini ndini Mambo Mwari, Mwari wako, Wakachena waIsuraeri, Muponesi wako. Ndinopa Egipite kuita muripiro wako, Ethiopia neSebha.

⁴ Ngokuti iwewe unomutengo mukuru mukuona kwangu, unoremeredzeka, neni ndinokuda; ndizvo ndinozoisa vanhu ndau yako, nemadzinza pandau yokupona kwako.

⁵ Usatya, ngokuti ndinewe; ndinozounza mibarirwana yako kubva kumabvazuva, nokubva kumabirirazuva ndinozomuunganidza.

⁶ Ndinozoti dera, ‘Varekere;’ nokubani, ‘Usavarambidza;’ unzai vakororo vangu kubva kuretu, nevanasikana vangu kubva kumagumo enyika,

⁷ kunyazwi ndiani unodaidzwa ngezina rangu, uwo wendakasikira uthende hwangu, uwo wendakasika nokuita.”

Isuraeri Chapupu chaMambo Mwari

⁸ Unzai vanhu mapofu, asi vane madziso, madziiranzee, asi vane nzee.

⁹ Madzinza eshe ngaaungane pamwepo, nevanhu vashongane. Ndiani pakati pavo wakatironzera izvi nokutionisa zviro zvekare? Ngavaunze zvapupu zvavo kuti zvivapembedze; ngavazwe, varonze kuti, “Igwinyiso.”

¹⁰ “Imwimwi muri zvapupu zvangu,” unoronza Mambo Mwari, “Nomuranda wangu wendakatsanangura, kuitira kuti muzie, munditende, muzwisise kuti ndini aye. Pamberi pangu apana mwari umweni wakaumbwa, akunazve unozoapo ngesure kwangu.

¹¹ Inini, inini ndini Mambo Mwari, ngepabanze pangu apana muponesi.

¹² Ndakadaidzira, ndakaponesa, ndakachumaira, apo paiya pasina chimwari chipara pakati penyu; nemwi muri zvapupu zvangu,” unoronza Mambo Mwari.

¹³ “Ndini Mwari nokubvira nyamashi ndinogara ndiri aye; akuna naumwe ungamusunhura kubva munyara yangu; ndinoshanda, ndiani ungandirambidza?”

Mwari Unobudisa VaIsuraeri Kubva Bhabhuroni

¹⁴ Izvi ndizvo zvinoronza Mambo Mwari, Muripiri wenyu, Wakachena waIsuraeri, “Ngendaa yenyu ndinozotumira kuBhabhuroni, nokupwanyira pashi migogo yeshe, nokudaidzira kwevaKharadhea kunozopinduka kuita kuchema.

¹⁵ Ndini Mambo Mwari, Wakachena wenyu, Musiki waIsuraeri, Mambo wenyu.”

¹⁶ Izvi ndizvo zvinoronza Mambo Mwari, uwo unoita njira muruandhle, negwara mukati mwemvura inesimba,

¹⁷ uwo unounza ngoro nemahachi, ngwazi yehondo; vanowa pashi pamwepo, avakoni kumuka; vaparadzwa, vadzimwa kudai ngethonje.

¹⁸ “Musapinimidza zviro zvokutanga, nokuti kupinimidza ngezviro zvekaretu.

¹⁹ Ringirai, ndinozoita chiro chitsva; zvino chinobuda, amuchizii here? Ndinozoita njira mushango, nendwizi murubaya.

²⁰ Zvikara zvomurubaya zvinozondiremeredza, makava nemhowani, ngokuti ndinopa mvura mushango, ndwizi murubaya, kupa kumwa kuvanhu vangu vakatsanangura,

²¹ vanhu vendakadzisikira kuti vadaidzire kukudzwa kwangu.”

Chishaishi chaIsuraeri

²² “Asi auzi kudaidza kwendiri, iwewe Jakobe, asi wakarembeswa ndini, iwewe Isuraeri.

²³ Auzi kuunza kwendiri makwai omudiro wako wokupisha; auzi kundiremeredza ngemidiro yako. Andizi kukutambudza ngezvipo zvemidiro, nokuti kukurembesa ngomutombo unegwema rakanaka.

²⁴ Auzi kunditengera muhwarungu ngemare, nokuti kundigutisa ngemafuta emidiro yako. Asi wakaita kuti ndiremerwe ngezvishaishi zvako, wandirembesa ngokushata kwako.

²⁵ Inini, ndini aye uwo unotsukutidza zvishaishi zvako ngokuda kwangu, neni andichazokarakadzi ngezvishaishi zvako.

²⁶ Ndikarakadzise; ngatiphikisane, isa ndaa yako pamberi kuti upembedzwe.

²⁷ Baba ako vokutanga vakashaisha, navadudziri vako vakashaisha pamberi pangu.

²⁸ Ndizvo ndakatuka vakuru vendau iyo yakachena, ndakaita kuti Jakobe aparadzwe, naIsuraeri kuti atsverudzwe.”