Isa. 42 - Bhaibheri Rakachena muChindau

Muranda waMambo Mwari

¹ “Ringirai muranda wangu, uwo wendinogwinyisa; wakatsanangurwa wangu, uwo mweya wangu unodakara mwaari; ndaisa mweya wangu padera pake; unozounza kutonga kwakanaka kumadzinza.

² Aazodaidziri nokuti kumirudza izwi rake kuti rizwike mumapato;

³ rutsanga rwakapwanyiwa aazoruvhuni, chibani chinopwititika aazochidzimi; unozounza kutonga kwakanaka mugwinyiso.

⁴ Aazoperi simba nokuti kuparadzwa metsa aemese kutonga kwakanaka munyika; nezviwi zvinogarira kudzidzisa kwake.”

⁵ Unoronza izvi Mwari, Mambo Mwari, uwo wakasika matenga akaatambanudza, uwo wakatambanudza nyika, neizvo zvinobuda kubva mukati mwayo; uwo unopa vanhu vanogara padera penyika mweya wokufema, nomweya kuneavo vanohamba mukati mwayo,

⁶ “Inini ndini Mambo Mwari, ndakudaidza mukururama, ndakutora ngenyara nokukungwarira; ndakupira kuti uite chitenderano chevanhu, kuita kujeka kwemadzinza,

⁷ kuti ubeure madziso akapofomadzwa, nokusunhura mabhanditi kubva mutirongo, nokubudisa kubva mutirongo avo vanogara muchidima.

⁸ Inini ndini Mambo Mwari, ndiro zina rangu; uthende hwangu andipi kunoumweni, nokuirikidzwa kwangu andipi kunemiedzaniso yakatsetswa.

⁹ Ringirai, zviro zvokutanga zvaitika, nezviro zvitsva zvino ndinozvidaidzira; ndinomuronzera zvisati zvaitika.”

Nduyo yoKukudza

¹⁰ Embai kunaMambo Mwari ruyo rutsva, nokuirikidzwa kwake kubvira kumiganu yenyika, imwimwi munodzaka kuruandhle, nazvo zveshe zviri mukati marwo, zviwi nevanogara mukati mwazvo.

¹¹ Rubaya nemadhorobha arwo ngaamirudze izwi razvo, maguta awo anogarwa ngavaKhedha; vagari veSera ngavaembe ngokudakara, ngavadaidzire kubva padera pemitunhu.

¹² Ngavakudze Mambo Mwari, ngavadaidzire kuirikidzwa kwake kuzviwi.

¹³ Mambo Mwari unozobuda kudai ngomurwi wehondo; kudai ngengwazi unozomusira ndurumwa dzake; unochema, unodaidzira kakurutu; unodzionisa anesimba kumagaa ake.

Mwari Unogondisa Kudetsera Vanhu vake

¹⁴ “Ndakanyarara mukuwo wakareba, ndakatimwii nokudzibata pachangu; zvino ndinozochema kudai ngomudzimai wodo kubereka, ndinozofemuruka nokugwimba.

¹⁵ Ndinozoparadza matunhu nezvimitunhu, nokuomesa zveshe zvakamerapo; ndinozoita kuti ndwizi dziite zviwi; ndinozoomesa makandwa.

¹⁶ Ndinozohambisa mapofu ngepato revasikazii; ndinozovatungamirira ngenjira dzevasikazi kuzia. Ndinozoita kuti chidima chiite kujeka pamberi pavo, ndau dzisikazi kuserera kuti dziserere. Ndinozoita izvi zviro kwevari, andizovasii akadi.

¹⁷ Vanozohwirinzwa sure, vanozotsveruka kakurutu, avo vanogonda miedzaniso yakatsetswa, navo vanoti kumiedzaniso yakanyunguruswa, muri zvimwari zvedu.”

VaIsuraeri Vanokorera Kudzidza

¹⁸ “Izwai, imwimwi madziiranzee; muringire, neimwimwi mapofu, ringirai, muone.

¹⁹ Ndiani bofu, asi muranda wangu, nokuti dziiranzee kudai ngomutumwa wangu, uwo wendinotuma? Ndiani uri bofu kudai ndiye wakadzipira wangu, nokuti bofu kudai ngomuranda waMambo Mwari?

²⁰ Waona zviro zvizhinji, asi auzviringisisi; nzee dzako dzakabeuka, asi auzwi.”

²¹ Mambo Mwari wakadakadzwa ngendaa yokururama kwake, kuti akurise mipango yake nokuiremeredza.

²² Asi ava vanhu vakabirwa nokuchakatwa; veshe vavo vakabatwa muhunza, vakafishwa mumhatso dzetirongo; vari vokuchakatwa, apana unovasunhura; vakapambwa, apana unoti, “Petudzai.”

²³ Ndiani pakati penyu unozopurutana izvi? Ndiani unozopurutana nokuzwa panguva inouya?

²⁴ Ndiani wakapira Jakobe kuvachakati, naIsuraeri kumambavha? Andiye Mambo Mwari here, wetakashaishira? Avazi kuteera nzira dzake, avazi kupurutana mipango yake.

²⁵ Ndizvo wakadurura padera pake kupisha kwoushungu hwokutseneka kwake, nokutyisa kwehondo; zvakamuisa mumuriro unobaka kumarutii eshe, asi aazi kuzwisisa; nawo wakamupisha, asi aazi kuzviisa mumwoyo mwake.