Isa. 41 - Bhaibheri Rakachena muChindau

Kugondisa kwaMwari kunaIsuraeri

¹ Nyararai, mupurutane pamberi pangu, imwimwi zviwi; vanhu ngavamusirire simba ravo, ngavakwedzere pasinde, ngavaerekete; ngatikwedzere pamwepo mukutongwa.

² Ndiani wakamusa munyisi kubva kumabvazuva, wakamudaidza kumushando wake? Unounza madzinza pamberi pake, unoisa madzimambo pashi petsoka; unovaita kudai ngobukuta ngeshoti yake, kudai ngematsengwe anorashwa ngouta hwake.

³ Unovarumbirira nokupinda ngokungwaririka, asikachagwami pashi ngetsoka dzake.

⁴ Ndiani wachiita nokupedza ichi, echidaidza mibarirwana kubvira pakutanga? Inini, Mambo Mwari, wokutanga, ndinozoapo nowokugumisira; ndini.

⁵ Zviwi zvachiona, nazvo zvinotya; magumo enyika anohuta, akwedzera pasinde, auya.

⁶ Umwe unodetsera umweni echiti, umwe kunoumweni, “Shinga.”

⁷ Mutsetsi unoshingisa mupfuri womukore, nouwo unopfura ngehamera unoshingisa uwo unokohomera patafura resimbi, echiti ngendaa yokunamira, “Zvakanaka;” vanobatanidza ngezvipikiri kuti chisakona kutsukunuswa.

⁸ Asi iwewe, Isuraeri, muranda wangu, Jakobe, uwo wendakatsanangura, mubarirwana waAbrahama, mungani wangu;

⁹ iwewe wendakatsanangura kubva kumagumo enyika, ndikakudaidza kubva kumarupande ayo ari kuretu, ndikati kwouri, “Iwewe uri muranda wangu,” ndakutsanangura, andizi kukurasha akadi;

¹⁰ usatya, ngokuti ndinewe; usaita maharura, ngokuti ndiri Mwari wako; ndinozokugwinyisa, ndinozokudetsera, ndinozokubata ngenyara yangu inonyisa yokumudyo.

¹¹ Ringira, avo veshe vakakutsenekera vanozotsverudzwa nokukangaidzwa; vanozodai ngepasina chiro, naavo vanoambana newe vanozopera.

¹² Unozovatsvaka avo vanoita hasha newe, asi auzovaoni; avo vanorwa hondo newe vanozoita vasina shwiro.

¹³ Ngokuti inini Mambo Mwari, Mwari wako, ndinokubata ngenyara yako yokumudyo, ndini uwo unoti kwouri, “Usatya, ndinozokudetsera.”

¹⁴ “Usatya, iwewe honye Jakobe, neimwimwi vanhu vaIsuraeri! Ndinozomudetsera, unoronza Mambo Mwari, Muripiri wenyu ndiye Wakachena waIsuraeri.

¹⁵ Ringira, ndinozomuitira mupuro mutsva wakapinza, unemazino; munozopura mitunhu nokuiputsa kuiparadza, newe unozoita zvimitunhu kuti zvidai ngamakoto.

¹⁶ Munozozvipepeta, nedutu rinozozvitora, nechipupuri chinozozviparadza. Zvino munozodakara munaMambo Mwari; mune Wakachena waIsuraeri munozokudza.

¹⁷ Apo varombo nevatami vanotsvaka mvura, vasikaioni, rurumi rwavo runoomerwa ngenyota, Inini Mambo Mwari ndinozovapingura, Inini Mwari waIsuraeri andizovasii.

¹⁸ Ndinozonyusa ndwizi dzemvura mumatunhu asina chiro, nezvinyuka mukati mwemapani; ndinozoita rubaya gandwa remvura, nenyika yakaoma zvinyuka zvemvura.

¹⁹ Ndinozosima mushango miti yemisedhare, miakhasia, mimithe nemiorivhi; ndinozosima murubaya miti yemisaipresi, mipraini, mipaini, ndichameresa yeshe pamwepo,

²⁰ kuti veshe vaone, vazie, vapinimidze, vazwisise pamwepo, kuti nyara yaMambo Mwari yakaita izvi, Wakachena waIsuraeri wakazvisika.”

Mambo Mwari Unotuka Zvimwari zvoKunyepa

²¹ Budisai ndaa yenyu, unoronza Mambo Mwari. Budisai zvizatho zvenyu zvinesimba, unoronza Mambo waJakobe.

²² Ngavazvironze nokutironzera zvinozoitika. Ngavatironzere ngezviro zvekare kuti zviinyi, kuti tipinimidze ndizvo, nesu tizie magumo azvo; nokuti vatironzere zviro zvinozouya.

²³ Tironzere zviro zvinozoitika ngesure kweizvi, kuti tizie kuti muri zvimwari; itai zvakanaka nokuti zvakashata, kuti titye nokutyiswa.

²⁴ Ringira, iwewe ngegwinyiso auna shwiro, nomushando wako auna shwiro; kunyazwi ndiani unomutsanangura uri chinyangadzo.

²⁵ Ndamirudza umwe wedera, naye wauya; umwe kubva kumabvazuva, unodaidza ngezina rangu. Unozotsika padera pevatongi kudai ngokutsika dhaka, kudai ngomuumbi unokanya dongo.

²⁶ Ndiani wakazvironza kubvira pakutanga, kuti tizvizie zvisati zvaitika, kuti tironze kuti, wakarurama? Akuna naumwe wakatironzera, akuna naumwe wakazvichumaira, akuna naumwe wakazwa mazwi enyu.

²⁷ Ndini wokutanga wakazvironzera kuZioni, ringirai, varingirei; neni ndinozopa kuJerusarema umwe unounza mashoko akanaka.

²⁸ Asi apo ndakaringira apana naumwe; pakati pavo apana mupangi, uwo apo ndabvunza unopingura.

²⁹ Ringirai, avana shwiro veshe; mishando yavo aidetseri chiro; miedzaniso yavo yakanyunguruswa yakadai ngedutu risina chiro.