Isa. 40 - Bhaibheri Rakachena muChindau

Mazwi oKugonda

¹ “Embedzerai, embedzerai vanhu vangu,” unoronza Mwari wenyu.

² “Ereketai ngokuembedzera kuneJerusarema, daidzirai kweriri, kuti kushanda kwaro kwakakonza kwapera, nokushaisha kwaro kwaripirwa, iro raashira kubva kunyara yaMambo Mwari kwakahwirinzirwa kwokushaisha kwaro kweshe.”

³ Izwi rounodaidzira rechiti, “Nasirirai mushango njira yaMambo Mwari, ruramisai murubaya pato raMwari wedu.

⁴ Mapani eshe anozomirudzwa, nemitunhu yeshe nezvitunhu zvinozodzaswa pashi, nezvakashongoroka zvinozoruramiswa, nendau dzakashata dzinozoserereswa.

⁵ Zvino uthende hwaMambo Mwari hunozooniswa, nomunhu weshe unozozviona pamwepo, ngokuti muromo waMambo Mwari wazviereketa.”

⁶ Izwi rinoti, “Daidzira.” Neni ndakati, “Ndinozodaidzirenyi?” “Munhu weshe wakadai ngemwenje; nokunaka kwake kweshe kwakadai ngoruwa romushango.

⁷ Mwenje unozeketera, noruwa rinofota, apo mweya waMambo Mwari unofemera padera pazvo; ngegwinyiso vanhu mwenje.

⁸ Mwenje unozeketera, noruwa rinofota; asi izwi raMwari wedu rinozoema mhera narini.”

⁹ Kwira padera pemutunhu wakareba, muteketesi wemashoko akanaka, O Zioni; A, iwewe muteketesi wemashoko akanaka, O Jerusarema, mirudza izwi rako ngesimba; rimirudze, usatya; uti kumadhorobha aJudha, “Uripano Mwari wenyu!”

¹⁰ Ringirai, Mambo Mwari, Mwari, unouya nesimba, nenyara yake inomutongera; ringirai, muthuso wake unawo, vanoripirwa vake vari pamberi pake.

¹¹ Unozogutisa zvifuyo zvake kudai ngomuushi, unozounganidza zvimakwai zvake mumaoko ake nokuzvitwara paditi rake, unozotungamirira ngokupfaa vanamai vemakwai.

Mwari waIsuraeri Usina Chingaedzaniswa Naye

¹² Ndiani wakapima mvura zhinji mukati mwenyara yake, nokupima denga ngechipimo, nokuunganidza bukuta renyika muchipimo, nokupima mitunhu nezvimitunhu ngezvipimo?

¹³ Ndiani wakatungamirira Mweya waMambo Mwari, nokuti mupangi wake wakamudzidzisa?

¹⁴ Ndiani wakabvunza kuti azwisise, ndiani wakamudzidzisa njira yokutonga kwakanaka? Ndiani wakamudzidzisa ruziyo, nokumuonisa njira yokuzwisisa?

¹⁵ Ringirai, madzinza akadai ngedonhwe muchidziyo, anoerengwa kudai ngebukuta shomani pachipimo; ringirai, unotora zviwi kudai ngebukuta rakamotseka.

¹⁶ Rebhanoni arizobudisi huni dzinokwana, nemhuka dzirimwo adzikwani kuita mudiro wokupisha.

¹⁷ Eshe madzinza ari pamberi pake akadai ngepasina chiro, akaerengwa kwaari kudai ngechisina shwiro.

¹⁸ Ndizvo ndiani womungaedzanisa naMwari? Chiedzanisonyi chomungaedzanisa naye?

¹⁹ Muedzaniso? Mupfuri unoumba muedzaniso, nomupfuri womukore unoudzodza ngomukore wakanyunguruswa, nokunasira maketani esirivha.

²⁰ Kudai ngechipo, unotsanangura muti, muti usikazoori; zvino unotsvaka mutsetsi wakangwara, kunasira muedzaniso wakagwinya usikazotsukunuswi.

²¹ Amuzi kuzia here? Amuzi kuzwa here? Azvizi kuronzwa kwomuri kubvira pakutanga here? Amuzi kuzwisisa here, kubvira pakusikwa kwenyika?

²² Ndiye unogara padera mukutenderera kwenyika, nevagari vemwo vakadai ngegwata rendongwe; ndiye unotambanudza matenga kudai ngejira, nokuakaka kudai ngetende rokugaremwo.

²³ Unoita kuti vakuru vaite vasina shwiro, nevatongi venyika vaite vasina shwiro.

²⁴ Eya, avazi kusimwa, avazi kukushwa, avameri nzinde mumavhu, naapo paanofuridza padera pavo, navo vanozeketera, nechipupuri chinovatora kudai ngamakoto.

²⁵ “Ndiani womunozondiedzanisa naye, nokuti ndiani wakadai ndini?” Unoronza Uwo Wakachena.

²⁶ Mirudzai madziso enyu mudenga, muone: Ndiani wakasika izvi? Uwo unounza hondo dzavo dzakawanda, nokudzidaidza dzeshe ngemazina adzo; ngokuti wakakura musimba rake, wakagwinya musimba, akuna naumwe unotamika.

²⁷ Ngenyi wechiti, O Jakobe, nokuereketa O Isuraeri, “Njira yangu yakafishika kunaMambo Mwari, nemaruramiro angu aaerengwi ndiMwari wangu?”

²⁸ Amuzi kuzia here? Amuzi kuzwa here? Kuti Mambo Mwari ndiMwari wemhera nariini, Musiki wemagumo enyika yeshe. Aatongodemeri, aarembi, akuna kutsvakisisa kwokuzwisisa kwake.

²⁹ Unopa simba kunevanodemera, unogwinyisa vasina simba.

³⁰ Kunyazwi majaha anozodemera nokuremba, nevamuna vatsva vanozowa pashi ngokuremba.

³¹ Asi avo vanogarira Mambo Mwari vanozomusirirwa simba ravo, vanozombururuka ngemaphaphiro kudai ngemakodzi; vanozorumba vasikarembi, vanozohamba vasikademeri.