Isa. 39 - Bhaibheri Rakachena muChindau

Nhumwa Dzinobva Bhabhuronia

¹ Panguva iyo mambo Merodhakhi-bharadhani, mukororo waBharadhani mambo weBhabhuroni wakatuma vatumwa netsamba nechipo kunaHezekia, ngokuti waiya azwa kuti wairwara, nokuti zvino waiya apona.

² Hezekia wakavaashira, akavaonisa mhatso inogara upfumi hwake, sirivha, mukore, makha, nemafuta anomutengo mukuru, nezvokurwa ndizvo zvake zveshe, nazvo zveshe zvakaoneka mukati mwedura rake. Apana nachimwe mukati mwemhatso yake nomukati mwoumambo hwake chaasikazi kuvaonisa Hezekia.

³ Zvino muprofeti Isaya wakauya kunamambo Hezekia, akati kwaari, “Ava vanhu vatinyi? Vauya kwouri vechibva kuri?” Hezekia wakati, “Vauya kwendiri vechibva kunyika iri kuretu, nyika yeBhabhuroni.”

⁴ Muprofeti wakati, “Vaonenyi mumhatso yako?” Hezekia wakapingura akati, “Vaona zveshe zviri mumhatso yangu; apana nachimwe chiri mudura rangu chendisikazi kuvaonisa.”

⁵ Zvino Isaya wakati kunaHezekia, “Izwa izwi raMambo Mwari wehondo.

⁶ Ringira, mazuva anouya, apo zveshe zviri mumhatso yako, neizvo zveshe zvakaunganidzwa ngemadzibaba ako metsa nyamashi, zvinozotorwa kuenda Bhabhuroni; apana nachimwe chinozosara, unoronza MamboMwari.

⁷ Vamweni vevakororo vako vanobarwa ndiwe, vanozotorwa ndivo; vanozoita mithenwa mungome yamambo weBhabhuroni.”

⁸ Zvino Hezekia wakati kunaIsaya, “Izwi raMambo Mwari rewaereketa rakanaka.” Ngokuti wakapinimidza kuti, “Kunozoapo kunyarara nokungwaririka pamazuva angu.”