Isa. 38 - Bhaibheri Rakachena muChindau

Kurwara noKupona kwaMambo Hezekia

¹ Mazuva awo Hezekia wakarwara ari pasinde pokufa. Isaya muprofeti mukororo waAmozi wakauya kwaari, akati kwaari, “Izvi ndizvo zvinoronza Mambo Mwari, ‘Rongedza zvakanaka mhatso yako, ngokuti unozofa, auzoponi akadi.’ ”

² Zvino Hezekia wakatenderudza hope yake kurukumbati, akakumbira kunaMambo Mwari.

³ Akati, “Karakadza zvino, O Mambo Mwari, ndinokupota, kuhamba kwendakaita pamberi pako mugwinyiso nomwoyo wakaperera, ndakaita zvakanaka mukuona kwako.” NaHezekia wakachema kakurutu.

⁴ Zvino izwi raMambo Mwari rakauya kunaIsaya rechiti,

⁵ “Enda, wooti kunaHezekia, izvi ndizvo zvinoronza Mambo Mwari, Mwari wababa ako Dhavhidha, ‘Ndazwa kukumbira kwako; ndaona masodzi ako; ringira, ndinozotutsira makore gumi namashanu okupona kwako.

⁶ Ndinozokununura nedhorobha iri kubva munyara yamambo weAsiria, ndinozorwira dhorobha iri.

⁷ Ichi chinozoita chioniso kwouri chinobva kunaMambo Mwari, kuti Mambo Mwari unozoita ichi chiro chaakagondisa.

⁸ Ringira, ndinozoita kuti bvute rinoiswa ngezuva roobira pachipimo chaAhazi ripetuke sure ngezvipimo gumi.’ ” Ndizvo zuva rakahwirira sure ngezvipimo gumi kubva peraiya radzaka.

⁹ Kunyora kwaHezekia, mambo wevaJudha, ngesure kwokurwara naapo apona kubva mukurwara kwake.

¹⁰ Ndakati, “Pakati pemazuva okupona kwangu, ndinosisira kuenda; ndakaemeserwa kumisiwo yeSheori eshe makore okupona kwangu.

¹¹ Ndakati, andichazooni Mambo Mwari munyika yevanopona; andichazooni munhu nakamwe pakati pevagari vomunyika.

¹² Ugaro hwangu hwakabvitwa nokuduswa kubva kwendiri, kudai ngetende romuushi. Kudai ngomuruki ndapeta kupona kwangu, unondigura kubva kuchirukiso; kubvira mangwanani kusvikira usiku unondiunza kumagumo.

¹³ Ndinochemera kudetserwa metsa mangwanani; kudai ngemhondoro unopwanya magodo angu eshe; kubvira mangwanani kusvikira usiku unondiunza kumagumo.

¹⁴ Kudai ngemherepere nokuti usore ndinodaidzira, ndinorira kudai ngejuba. Madziso angu akaremba ngokuringira mudenga. O Mambo Mwari, ndinodzimbirwa, ita mungwariri wangu!

¹⁵ Asi ndingatinyi? Ngokuti iye emene waereketa kwendiri, naye pachake wazviita; ndinozohamba ngokudzipfaisa makore angu eshe, ngendaa yokurwadziwa kwomwoyo wangu.

¹⁶ O Mambo Mwari, kubudikidza ngeizvi zviro vanhu vanopona, mukati mweizvi zveshe kuripo kupona kwomweya wangu. O iwewe, ndipetudze mukupona, undiite kuti ndipone.

¹⁷ Ngegwinyiso kwaiya kuitira kuti zvindinakire, izvo zvakaita kuti ndiwe nokurwadziwa kukuru; asi iwewe ngokuda mweya wangu ngorudo wakaununura kubva muhunza yokuparadzwa, ngokuti wakakandira zvishaishi zvangu zveshe sure kwomushana wako.

¹⁸ Ngokuti Sheori aringakubongi, rufu arungakuirikidzi; avo vanoenda pashi muhunza avana gonda regwinyiso rako.

¹⁹ Unopona, unopona, ndiye unokubonga, kudai ngezvendinoita ngeiri zuva. Baba vanozoita kuti vana vazie kugondeka kwenyu.

²⁰ Mambo Mwari unozondiponesa, ndizvo tinozoemba ngoma dzedu ngezvimatende, mukupona kwedu kweshe mumhatso yaMambo Mwari.”

²¹ Zvino Isaya waiya ati, “Ngavatore chikanywa chemaonde, vanamire padera pemota, naye kuti apone.”

²² Hezekia waiya atiwo, “Chiinyi chioniso chendinozoona ndicho kuti ndizie kuti ndizokwira kumhatso yaMambo Mwari?”