Isa. 37 - Bhaibheri Rakachena muChindau

Mambo Unokumbira Kupangwa ndiIsaya

¹ Naapo mambo Hezekia azwa izvi, wakatatura machira ake, akadzifukidza ngejira resaka, naye wakaenda mumhatso yaMambo Mwari.

² Naye wakatuma Eriakimu uwo waiya mukuru wengome naShebhina munyori nevapristi vakuru, vakafuka machira emasaka kumuprofeti Isaya mukororo waAmozi.

³ Vakati kwaari, “Izvi ndizvo zvinoronza Hezekia, ‘Zuva iri izuva rokutambudzika nerokukaraidza nokutuka; vana vaguma mukuwo wokuberekwa, asi apana simba rokuvabereka.

⁴ Pamweni Mambo Mwari, Mwari wako, wazwa mazwi aRabhishake, uwo mambo wake, mambo weAsiria wakatumira kuti atsverudze Mwari wokupona, nokurambidza mazwi awo Mambo Mwari, Mwari wako, aakazwa; ndizvo mirudza izwi rako rokukumbira ngendaa yevakasara vakasiiwa.’ ”

⁵ Naapo varanda vamambo Hezikia vauya kunaIsaya,

⁶ Isaya wakati kwevari, “Ronzai kunamambo wenyu kuti, ‘Izvi ndizvo zvinoronza Mambo Mwari,’ ‘Usatya ngendaa yemazwi ewazwa, awo varanda vamambo weAsiria evakandituka ndiwo.

⁷ Ringirai, inini pachangu ndinozoisa mweya mwaari, kuitira kuti azozwa makuhwa, nokupetuka kunyika yake; neni ndinozoita kuti awe ngeshoti munyika yake.’ ”

VaAsiria Vanotumira Kutyisidzira Kumweni

⁸ Rabhishake wakapetuka, akaona mambo weAsiria echirwa naRibhina; ngokuti waiya azwa kuti mambo waiya abva Rakhishi.

⁹ Zvino mambo wakazwa ngendaa yaThirihaka, mambo weEthiophia echiti, “Unouya koorwa newe.” Naapo azvizwa, wakatuma vatumwa neizwi kunaHezekia echiti, “Izvi ndizvo zvomunozoereketa kunaHezekia,

¹⁰ mambo wevaJudha mwechiti, ‘Usatendera Mwari wako uwo wounogonda kukuchengedzera, ngokukugondisa echiti Jerusarema arizopuwi munyara dzamambo weAsiria.

¹¹ Ringira, mwakazwa zvakaitwa ngemadzimambo eAsiria kunenyika dzeshe kudziparadza yaamho. Imwimwi munozosunhurwa here?

¹² Zvimwari zvemadzinza zvakavanunura here madzinza aparadzwa ngemadzibaba angu, Gozani, Harani, Rezefi, nevanhu veEdheni avo vaiya muTherasa?

¹³ Uri pari mambo weHamathi, mambo weAriphadhi, mambo wedhorobha reSefavhaimu, mambo weHena, nokuti mambo weIvha?’ ”

¹⁴ Hezekia wakaashira tsamba kubva munyara yevatumwa, akaidzidza; zvino Hezekia wakakwira kumhatso yaMambo Mwari, akaibeura pamberi paMambo Mwari.

¹⁵ NaHezekia wakakumbira kunaMambo Mwari echiti,

¹⁶ “A Mambo Mwari wehondo, Mwari waIsuraeri, uwo wakagara padera pemakherubi, iwe uri Mwari, iwewe wega, muumambo hwenyika dzeshe; iwe wakasika denga nenyika.

¹⁷ Kotamisa nzee yako, O Mambo Mwari, uzwe; beura madziso ako, O Mambo Mwari, uone; izwa mazwi eshe aSenakheribhi, awo aakatumira kuti atsverudze Mwari Unopona.

¹⁸ Ngegwinyiso, O Mambo Mwari, madzimambo eAsiria akaparadza madzinza eshe nenyika dzawo,

¹⁹ nokukandira zvimwari zvavo mumuriro, ngokuti zvaiya zvisiri Mwari, asi mishando yenyara dzevanhu, miti nokuti mapuwe, ndizvo vakazviparadza.

²⁰ Ndizvo zvino, O Mambo Mwari, Mwari wedu, tiponese kubva munyara yake, kuti umambo hweshe hwenyika huzie kuti iwewe wega ndiwe Mambo Mwari.”

Izwi raIsaya kunaMambo

²¹ Zvino Isaya mukororo waAmozi wakatumira kunaHezekia echiti, izvi ndizvo zvinoronza Mambo Mwari, Mwari waIsuraeri, ngokuti wakakumbira kwendiri ngendaa yeSenakheribhi mambo weAsiria,

²² iri ndiro izwi raaereketa Mambo Mwari ngendaa yake; “Mhandwe mwanasikana weZioni unokushoora nokukusheka; mwanasikana weJerusarema unodzungudza soro rake sure kwako.

²³ Ndiani wewakasheka nokutuka? Uwo wewakamirudzira izwi rako, nokumirudzira madziso ako padera? Unorwisana noUwo Wakachena waIsuraeri!

²⁴ Ngevaranda vako watuka Mambo Mwari, newe wati, ‘Ngokuwanda kwengoro dzangu ndakwira kuurebu hwemitunhu, kwakakwirisisa kweRebhanoni; ndakatemera pashi misedhare yawo yakarebesa, nemiti yomusaiprusi yakapindisisa kunaka; ndakaguma kumagumo ourebu hwaro, negwasha rakakurisa.

²⁵ Ndakatsa zvinyuka, ndikamwa mvura, pashi petsoka dzangu pakaomesa ndwizi dzeshe dzendau dzeEgipite.’

²⁶ Amuzi kuzwa here karetu njira yendakazviita ndiyo? Ndakazvironga kubvira mazuva ekaretu izvo zvendakaita kuti zviitike kuti iwewe uite unoparadza madhorobha anemarukumbati, kuti aite mirwi yematongo,

²⁷ apo vagari vawo vaiya nesimba rakatsonga, vakashamiswa nokukangaidzwa; vakaita kudai ngechisimwa chomumunda, nokudai ngomwenje mutsva, kudai ngemwenje unokura padera pemhatso, unofuhurwa usati wakura.

²⁸ “Asi ndinozia ugaro hwako, nokubuda kwako nokupotera kwako, noushungu hwako kwendiri.

²⁹ Ngokuti ushungu hwako kwendiri, nehohoho yako zvakazwika munzee dzangu, ndinozoisa chiedzo changu mumiro yako, nematomu angu mumuromo wako, neni ndinozokupetudza sure ngenjira yowakabva ndiyo.”

³⁰ “ ‘Neichi chinozoita chioniso kwouri, gore rino munozodya maburukirwa, negore rechipiri maburikirwa; ngegore rechitatu simai, chekai, simai mavhini, mwechidya michero yayo.

³¹ Vakasara vechipona vemhatso yaJudha vanozotsira pashi nzinde, nokubereka michero padera.

³² Ngokuti kubva muJerusarema kunozobuda vakasara, kubva kuMutunhu weZioni kunozobuda chikwata chevanopona. Kugwinyisira kwaMambo Mwari wehondo kunozoita ichi.’

³³ “Ndizvo izvi zvinoronza Mambo Mwari ngendaa yamambo waAsiria, ‘Aazouyi mudhorobha iri, nokuti kuposhera musee umwo, kuuya pamberi paro nechihlangu, nokuti kuaka rusvingo kweriri.

³⁴ Ngenjira yaakauya ndiyo unozohwirirazve ndiyo; aazouyi mudhorobha iri’ unoronza Mambo Mwari.

³⁵ ‘Ngokuti ndinozorwira dhorobha iri, ndiriponese inini pachangu, nangendaa yomuranda wangu Dhavhidha.’ ”

³⁶ Zvino ngirosi yaMambo Mwari yakabuda ikavauraya mukampa revaAsiria zana nemakumi masere namashanu emakumi emazana; (185,000) naapo vakamuka mangwanani maishi, vakaona, veshe vakaata vafa.

³⁷ Zvino Senakheribhi mambo weAsiria wakabva, akapetuka Ninevhe.

³⁸ Zuva rimweni echidira mumhatso yaNisirokhi, chimwari chake, vakororo vake Adramerekhi naShareza vakamubaya ngeshoti; navo vakatizira kunyika yeArarati. Esarihadhoni mukororo wake wakatonga pandau yake.