Isa. 35 - Bhaibheri Rakachena muChindau

Njira yoKucheneswa

¹ Rubaya nenyika yakaoma zvinozodakara, shango rinozodakara nokutumbuka maruwa; kudai ngeruva rakanaka

² rinozotumbuka maruva kakurutu, nokudakadzwa kwokudakara nokuemba. Uthende hweRebhanoni hunozopuwa kweiri, umambo hweKharmeri neSharoni hunozopuwa kweiri. Vanozoona uthende hwaMambo Mwari nounaku hwaMwari wedu.

³ Gwinyisai nyara dzisina simba, mwechigwinyisa mabvi akapera simba.

⁴ Ronzai kuneavo vanomwoyo wokutya, “Gwinyai, musatya! Ringirai Mwari wenyu. Unozouya nokuunzidzira, nokuhwirinzira kunotyisa. Unozouya nokumuponesa.”

⁵ Zvino madziso emapofu anozosvinurwa, nenzee dzemadziiranzee dzinozobeurwa;

⁶ ngouwo mukuwo chirema chinozonyanduka kudai ngeshoma, norurumi rwechimbungumbungu runozoemba ngokudakara. Ngokuti mvura inozonyuka mushango, nendwizi dzinozoerera murubaya;

⁷ jecha rinopisha rinozoita gandwa remvura, nenyika yakaomerwa inozoita zvinyuka zvemvura; bako rehava rinozoita murove, mwenje unozoita tsanga nemajekacheka.

⁸ Inozoapo njira yakapamhama, nayo inozodaidzwa kuti, “Njira yakachena;” vakasvipiswa avazohambi ndiyo, asi inozoita yevanhu vaMwari; haiwa vahambi nokuti mapenzi, avazorashikiswi ndiyo.

⁹ Mhondoro nokuti mhuka inokara azvizokwirimwo, azvizoonekimwo, asi vakaripirwa vanozohamba ndimwo.

¹⁰ Vakaripirwa vaMambo Mwari vanozohwirira nokuuya Zioni vechiemba ngoma; nokudakara kusikaperi kunozowa padera pemasoro avo; vanozoona kudakara nokudakadzwa, kusvipo mwoyo nokuti mahwema zvinozotiza.