Isa. 34 - Bhaibheri Rakachena muChindau

Mwari Unozoorora Magaa ake

¹ Kwedzerai pasinde, O madzinza, muzwe. Purutanai, O vanhu. Nyika ngaizwe, nazvo zveshe zviri mukati mwayo; nyika, nazvo zveshe zvinobuda kubva mweiri.

² Ngokuti ushungu hwaMambo Mwari uri padera pemadzinza eshe, noushungu hwake hukuru huri padera pehondo dzavo. Wakavashakera yaamho, akavapira mukuurawa.

³ Vakaurawa vavo vanozokandirwa kubanze. Kunuhwa kwemiiri yavo kunozobuda. Mitunhu inozonyakatiswa ngengazi yavo.

⁴ Hondo dzeshe dzomudenga dzinozoora, nedenga rinozopetwa kudai ngetsamba. Hondo dzavo dzeshe dzinozofota kudai ngokufota kweshakani romuvhini, nokuti muchero unofota pamuonde.

⁵ Naapo shoti yangu yamwa yagutisa mumatenga, ringira, inozodzaka padera peEdhomu, padera pevanhu vendakatuka, kuita kutongwa kwavo.

⁶ Mambo Mwari uneshoti; yagutiswa ngengazi, yakoriswa ngemafuta, ngengazi yemakwai nembudzi, ngemafuta etsvo dzemagondohwe. Ngokuti Mambo Mwari unemubairo muBhozira, nokuurawa kukurutu munyika yeEdhomu.

⁷ Nyati dzinozowa, nemikono midoko nemikuru inozowa. Nyika yadzo inozomwirira ngazi, nevhu ravo rinozokora ngemafuta.

⁸ Ngokuti Mambo Mwari unaro zuva rokuunzidzira, gore rokuhwirinzira kwake ngendaa yezvakaitirwa Zioni.

⁹ Nemikova yeEdhomu inozoita namo, nebukuta rayo rinozoita sorufa. Nenyika inozodai ngenamo inobaka ngomuriro.

¹⁰ Auzodzimwi usiku nemasikati, chiushi chawo chinozopwititika mhera nariini. Kubva kumubarirwana kuenda kumubarirwana inozoita mafusi. Apana unozohamba ndimwo mhera nariini.

¹¹ Asi ngwanga nenungu zvinozogaremwo; zizi negunguwe zvinozogaremwo; naye unozoisa musara wokukangaidza padera payo, nemapuwe okuparadza.

¹² Vanozodaidza vakuru vayo kuumambo, asi apana unozoapo; nevatongi vavo vanozoita vasina shwiro.

¹³ Minzwa inozomera mungome yayo, makato nengwenanguruve zvinozomera mungome nomumarukumbati avo. Inozoita bako rehava, nougaro hwemhowani.

¹⁴ Zvikara zvomushango zvinozoshongana nemapere, gotokoto romushango rinozorira kunomungani waro, nezizi rinozogarapo, nokudzionera ndau yokuzorora.

¹⁵ Zizi rinozodziakira chisaki charo, rinozoika nokutsotsonya mazanda nokufungatira vana varo; naapozve ngwanga dzinozoungana imwe ngaimwe nomukadzi wayo.

¹⁶ Tsvakai, mufunde kubva mubhuku raMambo Mwari; akuna nachimwe cheizvi chinozotamika; akuna nachimwe chinozotama mungani wacho. Ngokuti muromo waMambo Mwari wakapanga kudaro, nomweya wake wakazviunganidza pamwepo.

¹⁷ Wavaitira mabhigidha, nyara yake yagura mugano ngetambo; inozoita yavo mhera nariini, kubva kumubarirwana kuenda kumubarirwana vanozogaramwo.