Isa. 33 - Bhaibheri Rakachena muChindau

Mukumbiro woKuda Kudetserwa

¹ A, iwewe muparadzi, iwewe pachako auzi kuparadzwa; iwewe muchengedzeri, uwo usina naumwe wakakuchengedzera! Apo unopedza kuparadza, unozoparadzwa; naapo unozoreka kuchengedzera, unozochengedzerwa.

² O Mambo Mwari, tiitire nyasha; tinogarira iwewe. Ita muoko wedu mangwanani eshe, ruponeso rwedu munguva yokutambudzika.

³ Ngebope rehohoho vanhu vakatiza; ngokumiruka kwako madzinza akaparadzirwa.

⁴ Zvakachakatwa zvenyu zvinounganidzwa kudai ngokuungana kwegwata; kudai ngokutomuka kwendongwe unotomuka padera pazvo.

⁵ Mambo Mwari unokuriswa, unogara mudengadenga. Wakazadza Zioni ngokutonga kwakanaka nokururama.

⁶ Unozoita kugwinya kwenguva dzenyu, kuwanda kworuponeso, ungwaru noruziyo; kutya Mambo Mwari ndihwo upfumi hwake.

⁷ Purutanai, kuchema kwevakashinga kuri mumapato. Vatumwa vokunyarara vanochema kakurutu.

⁸ Mapato asiiwa, apana uchahambamwo. Chitenderano chagurwa; mhiko dzaro dzashoorwa; aacharemeredzi munhu naumwe.

⁹ Nyika inochema, inopera simba. Rebhanoni ratsveruka, ratemerwa rafota pashi. Sharoni radai ngomurubaya, Bhashani naKharmeri azuwira pashi mashakani ayo.

Mambo Mwari Unonyowedza Magaa ake

¹⁰ “Zvino ndinozomiruka,” unoronza Mambo Mwari. “Zvino ndinozodzimirudza pachangu, zvino ndinozokuriswa.

¹¹ Mimba yenyu ngeyemakoto; munozobereka matsengwe; femero renyu muriro unozomupisha.

¹² Vanhu vanozopishwa kudai ngokupishwa kwemapuwe eraemu. Vanozopishwa mumuriro kudai ngeminzwa yakatemwa kuti ipishwe.”

¹³ Izwai chendaita, imwimwi muri kuretu, nemwi muri pasinde, tendai simba rangu.

¹⁴ Vashaishi vari muZioni vanotya; kuhuta kwavabata vasikadi Mwari. “Ndiani pakati pedu ungakona kugara nomuriro unopisha kusikaperi? Ndiani pakati pedu ungakona kugara nomuriro unobaka mhera nariini?”

¹⁵ Uwo unohamba ngokururama nokuereketa gwinyiso; uwo unoshoora kuuyirwa ngoupfumi ngokuangiridza; unozuwa nyara dzake kuti asaashira zviro zvokutengerwa; unotsiira nzee dzake kuti asazwa ngezviro zvokuparadzwa kwengazi; unotswatira madziso ake kuti asaona zvakashata.

¹⁶ Unozogara pandau dzakakwirira; bako rake rinozoita remapuwe; unozopuwa chingwa, nemvura yake aizoperi.

Kudakadza kweZvichauya

¹⁷ Madziso ako anozoona mambo muuthende hwake; anozoona nyika inopararira kuretu.

¹⁸ Mwoyo wako unozopinimidza ngokutyisa wechiti, “Uri pari munyori? Uri pari mupimi womuthero? Uri pari unoerenga marusvingo?”

¹⁹ Auchazooni vanhu vanodada, vanhu vanendimi dzokuereketa kwomusikakoni kuzwa, vanhu vanokakamira ndimi dzomusikazwi.

²⁰ Ringirai Zioni, dhorobha rakaemeserwa madhiri edu akachena. Madziso enyu anozoona Jerusarema, ugaro hwakanyarara, tende risikaputswi; apana dziro narimwe raro rinozobviswa, apana narimwe rebote rinozodamburwa.

²¹ Asi apapo Mambo Mwari muumambo unozoita wedu ndau yendwizi dzakapamhama nemikova. Apana mukumbi, nengarava huru dzine zvokuhambisa dzinokona kuendamwo.

²² Ngokuti Mambo Mwari ndiye mutongi wedu, Mambo Mwari ndiye muemesi wemitemo yenyika yeshe, Mambo Mwari ndimambo wedu; unozotiponesa.

²³ Mapote enyu arembedzeka. Aachina simba rokugwinyisa sika pandau payo. Aachina simba rokutambanudza matende okuhluza. Zvino mhuka nezvakachakatwa zvakawanda zvichakoaniswa; kunyazwi nezvirema zvinozotora zvakachakatwa.

²⁴ Akuna mugari unozoronza kuti, “Inini ndinorwara.” Vanhu vanogaremwo vanozorekererwa zvishaishi zvavo.