Isa. 32 - Bhaibheri Rakachena muChindau

Mambo Wakarurama

¹ Ringira, mambo unozotonga mukururama, nevatongi vanozotonga ngokururama.

² Umwe unozodai ngendau yokuhwara dutu, pokudzama mubvumo nechamupupuri, kudai ngendwizi dzemvura kundau yakaoma, kudai ngebvute rebuwe guru munyika inorembesa.

³ Zvino madziso aavo vanoona aazotswatiri, nenzee dzaavo vanozwa dzinozopurutana.

⁴ Mwoyo wouwo unechara unozotonga zvakanaka, norurumi rwaavo vanokakamira runozoereketa zvakanaka pamhene.

⁵ Benzi arizombodaidzwi kuti munhu unoremeredzeka, nokuti wakashata kuti adaidzwe kuti munhu unoremeredzwa.

⁶ Ngokuti benzi rinoereketa upenzi, nomwoyo waro unoronga zvakashata, kuita zvinorwisana naMwari, kuereketa zvokunyepa ndiMambo Mwari, kusiya kudisisa kwevanenzara vasina kuguta, nokunyima zvokumwa kunevanozwa nyota.

⁷ Kushata kwevakashata kwakashata: unoronga mazano akashata kuuraya varombo ngamazwi okunyepa, kunyazwi apo kupota kwounotama kwakanaka.

⁸ Asi uwo wakakura unoronga zviro zvakakura; naye unoema ngezviro zvikuru.

Kutonga noKupetudza

⁹ Mirukai, imwimwi vakadzi vakagarisika, izwai izwi rangu; imwimwi vanasikana vasina nhamo, purutanai kuereketa kwangu.

¹⁰ Mumazuva anopinda gore munozohuta, imwimwi musina nhamo; ngokuti mavhini anozokorera kubereka, kukukurwa kwemichero akuzoitiki.

¹¹ Hutai, imwimwi vakadzi vasina nhamo; hutai, imwimwi musina nhamo; mudziite mititinini, musimire machira emasaka pazviunu zvenyu.

¹² Chayayi maditi enyu ngendaa yeminda inodakadza, ngendaa yomuvhini unobereka,

¹³ ngendaa yeivhu ravanhu vangu munomera minzwa nemakato, eya, ngendaa yemhatso dzeshe dzokudakara mudhorobha rokudakara.

¹⁴ Ngokuti ngome inozosiiwa, dhorobha rinevanhu vazhinji rinozotizwa; mutunhu nemarusvingo okurinda zvinozoita mapako mhera nariini, kudakara kwedhuba, kumafuro ezvifuyo,

¹⁵ metsa mweya udururwe padera pedu kubva mudenga, neshango riite munda unobereka zvakanaka, nomunda unobereka unoringirika wakadai ngegwasha.

¹⁶ Zvino kutonga zvakanaka kunozogara mushango, nokururama kunozogara mumunda unobereka.

¹⁷ Mushando wokururama unozoita kunyarara, nemagumo okururama anozoita kunyarara nokugonda mhera nariini.

¹⁸ Vanhu vangu vanozogara muugaro hwokunyarara, nomumhatso dzakagwinya, nomundau dzokuzorora dzinokunyarara.

¹⁹ Naapo matsanza anozowa padera pegwasha, nedhorobha rinozoparadzwa pashi yaamho,

²⁰ munomuchena imwimwi munozokusha pasinde pemvura yeshe, munozotendera kabi nembongoro kuti dzitsikepo.