Isa. 31 - Bhaibheri Rakachena muChindau

Mwari Unozongwarira Jerusarema

¹ Ihehe kwevari vanodzaka Egipite koodetserwa, avo vanogonda mahachi; avo vanogonda ngoro dzokurwa, ngokuti dzakawanda, nomuvagadhi vemahachi, ngokuti vakagwinya kukurutu; asi avaringiri kunoUwo Wakachena waIsuraeri, nokuti kubvunza Mambo Mwari!

² Asi nayewo wakangwara unounza zvakashata; aapetudzi sure mazwi ake, asi unozomiruka kurwisa mhatso yevanoita zvakashata, nokurwisa vadetseri veavo vanoita kushaisha.

³ VaEgipite vanhu, haiwa Mwari akadi; mahachi avo inyama, aasiri mweya akadi. Naapo Mambo Mwari paanotambanudza nyara yake, mudetseri unozopumhunwa nouwo unodetserwa unozowa, navo vanozoparadzwa pamwepo.

⁴ Ngokuti izvi ndizvo zvakaronza Mambo Mwari kwendiri, “Kudai ngemhondoro nokuti mhondoro itsva inobhongera nyama yayo, naapo chiunga chevaushi chingadaidzwa kuirwisa, aizokarudzwi ngokudaidzira kwavo, nokuti kupfaiswa ngendaa yebope ravo, ndizvo Mambo Mwari wehondo unozodzaka koorwa padera poMutunhu Zioni, nepadera pechimutunhu charo.

⁵ Kudai ngeshiri dzinombururuka padera pemasoro, ngokudaro Mambo Mwari wehondo unozovhikira Jerusarema; unozorivhikira nokurinunura, kuriponesa nokuringwarira.”

⁶ Petukai kwaari uwo wemwakamukira, imwimwi vana vaIsuraeri.

⁷ Ngokuti ngeiro zuva mweshe munozorasha miedzaniso yenyu yokudira yesirivha, nemiedzaniso yenyu yokudira yomukore, yomwakadziitira mukushaisha ngenyara dzenyu.

⁸ “Zvino muAsiria unozowa ngeshoti, haiwa yomunhu; neshoti, haiwa yomunhu, inozomupedza; unozotiza kubva kushoti, nemajaha ake anozoitwa hloko.

⁹ Buwe rake rinozotiza ngendaa yokutya, nenduna dzake dzinozotiza mukukarudzwa ngomujeki,” unoronza Mambo Mwari, uwo muriro wake uri muZioni, nechoto chake chiri muJerusarema.