Isa. 30 - Bhaibheri Rakachena muChindau

Chitenderano Chisikadetseri neVaEgipite

¹ “O vana vanoita mbengo,” unoronza Mambo Mwari, “Avo vanoita urongwa, asi haiwa hwangu; avo vanoita chitenderano, asi vanorwisana nomweya wangu, kututsira chishaishi padera pechishaishi;

² avo vanohamba kudzaka Egipite, vasikazi kukumbira kupanga kwangu, kuti vahware mukungwaririka kwaFaro, nokutsvaka kuhwara mubvute reEgipite!

³ Ndizvo kungwarira kwaFaro kunozoita kutsveruka kwenyu, nokuhwara kwenyu mubvute reEgipite kukangaidzwa kwenyu.

⁴ Ngokuti kunyazwi vakuru vake vari muZoani, nevaemereri vake vanoguma Hanesi,

⁵ weshe unopinda mukutsverudzwa kubudikidza ngevanhu vasikakoni kuvadetsera, avo vasikakoni kuvadetsera nokuti kuvapa chiro, asi kutsverudzwa nokushoorwa.”

⁶ Izwi guru rinoereketa ngendaa yezvikara zvomubani. “Kubudikidza ngenyika yokutambudzika nokurwadziwa, panobva mhondoro nemhondoro hadzi, rowambira, nenyoka inoukaira kakurutu inombururuka, vanotwara upfumi hwavo pamishana yembongoro hadzi, nemare yavo padera penunda dzemangamera kuenda kunevanhu vasikavapi chiro.

⁷ Ngokuti rudetso rwevaEgipite arudetseri narwo aruna chiro; ndizvo ndaidudza kuti, ‘Rahabhi uwo unogara aripo.’ ”

Vanhu Vasikapurutani

⁸ Zvino enda, zvinyore pamberi pavo, padera porusamba, uzvinyore mubhuku, kuti zviite zvomukuwo unouya kudai ngechapupu chemhera nariini.

⁹ Ngokuti vanhu vanembengo, vana vasikagondeki, vana vanoramba kuzwa kudzidzisa kwaMambo Mwari;

¹⁰ avo vanoronza kuvaoni kuti, “Musaona;” nokuvaprofeti kuti, “Musaprofeta kwetiri zvegwinyiso, ereketai kwetiri zviro zvakaserera, profetai zvokuchengedzera.

¹¹ Ibvai munjira, paukai kubva mugwara, itai kuti tisachazwa zvakawanda ngendaa yoUwo Wakachena waIsuraeri.”

¹² Ndizvo izvi ndizvo zvinoronza Uwo Wakachena waIsuraeri, “Ngokuti munoramba izwi iri, mwechigonda mukutambudza nomukuchengedzera, mwechitseama pezviri;

¹³ ndizvo uku kushata kunozoitika kwomuri kudai ngendutwe huru iri parukumbati rwakareba, yamweka kudzaka rwoda kuwa, kupwanyika kwarwo kunouya ngokukasira ngomukuwo mudoko.

¹⁴ Kuputsika kwarwo kwakadai ngokuputsika kwehari yomuumbi, iyo inoputswa ngehasha kuita zvigurwa, ndizvo akuzooneki pakati pezvigurwa zvayo chiwenda chokudusa ndicho muriro kubva pachoto, nokuti chokuchera ndicho mvura kubva muchinyuka.”

¹⁵ Ngokuti izvi ndizvo zvinoronza Mambo Mwari, Uwo Wakachena waIsuraeri, “Ngokuhwirira nomukuzorora munozoponeswa; mukunyarara nomukugonda munozoita simba renyu. Asi mwaramba

¹⁶ mwechiti, ‘Haiwa; tinozotiza tiri padera pemahachi.’ Ndizvo munozotiza! Nemwi mwati, ‘Tinozogadha zvinohambisa.’ ” Ndizvo avo vanomurumbirira vanozorumbisisa!

¹⁷ Gumi remazana rinozotiza ngokukaraidzwa ngoumwe, ngokukaraidzwa ngavashanu munozotiza, metsa musiiwe mwadai ngomujeki padera pemagumo omutunhu, kudai ngomujeki padera pechimutunhu.

¹⁸ Ndizvo Mambo Mwari unozogarira kuti amuitire nyasha, ndizvo unozomiruka kuti amukungurire. Ngokuti Mambo Mwari ndiMwari unotonga zvakanaka; vanomuchena veshe avo vanomugarira.

Mwari Unozofumisa Vanhu vake

¹⁹ Ngegwinyiso vanhu vomuZioni, vagari vomuJerusarema, amuchazochemi. Ngegwinyiso unozomuitira nyasha azwa kuchema kwenyu; apo paanokuzwa unozomupingura.

²⁰ Kunyazwi Mambo Mwari akanyamupa chingwa chokukakaseka, nemvura yokutambudzika, asi mudzidzisi wenyu aachazodzifishi nakamwe, asi madziso enyu anozoona mudzidzisi wenyu.

²¹ Naapo munokunukukira kumudyo nokuti kumuoshwe nzee dzenyu dzinozozwa izwi ngesure kwenyu rechiti, “Iyi ndiyo njira, hambai ndiyo.”

²² Zvino, munozosvipisa izvo zvinofukidzira miedzaniso yenyu yakatsetswa yesirivha, nezvinemeso zviri pamiedzaniso yenyu yakanyunguruswa yomukore. Munozoirasha kudai ngenjira risikazi kusukika; munozoti kweiri, “Ibva pano.”

²³ Naapo unozounza mvura kumbeu dzenyu dzemwasima pamavhu; nezviyo zviri michero inobva mumavhu, izvo zvinozonaka nokuwanda. Ngeiro zuva n'ombe dzenyu dzinozofura kumafuro akapamhama.

²⁴ Kabi nembongoro dzinorima mavhu dzinozodya zviro zvakanasirirwa nokuunganidzwa ngefoshoro neforoko.

²⁵ Nepadera pomutunhu weshe wakareba nepadera pechimutunhu cheshe dzinozoapo ndwizi nezvimikova zvinoerera mvura, ngezuva rokuurawa kukurutu, apo panowa marusvingo.

²⁶ Zve, kujeka kwomwedzi kunozodai ngokujeka kwezuva, nokujeka kwezuva kunozopetwa kanomwe, kudai ngokujeka kwamazuva manomwe pamwepo, pazuva iro Mambo Mwari paanosunga maronda evanhu vake, nokuporesa zvironda zvaakavaponda.

Mwari Unozoorora Asiria

²⁷ Ringira, zina raMambo Mwari rinouya rechibva kuretu, rechibaka ngoushungu hwake nomuchiushi chakakora chinokwira kudenga; miromo yake yakazara ngoushungu, norurumi rwake rwakadai ngomuriro unopisha zveshe;

²⁸ femero rake rakadai ngerwizi runofashukira ngemvura inoguma kumutsipa, kusefa madzinza ngesefu yokuparadza, nokuisa matomu mutsaya dzemadzinza evanhu, anoita kuti apauke.

²⁹ Munozoemba nduyo kudai ngezvinoitika usiku apo perinoitwa dhiri rakacheneswa; nokudakara kwomwoyo, kudai ngaapo umwe anoenda nomunanzi kuguma kumutunhu waMambo Mwari, kuBuwe raIsuraeri.

³⁰ NaMambo Mwari unozoita kuti izwi rake rinoumambo rizwike, nokudzaka pashi kwesimba romuoko wake, kuti rioneke mukunyangadzwa kwakashata, nomurazvu womuriro unopedza, nokuputika kwemakore, chamupupuri nematsanza.

³¹ VaAsiria vachakarudzwa ngeizwi raMambo Mwari apo paanoponda ngendonga yake.

³² Kuponda kweshe kwendonga yokuorora kwaanoponda Mambo Mwari padera pake, kunozoita kudai ngokurira kwengoma yesimbi nembira; ngomuoko wakamirudzwa unozorwa naye.

³³ Ngokuti Tofethi yakanasirirwa kare; ngegwinyiso yakanasirirwa mambo; wakaita ndau yakadzama nokupamhama; muriro nehuni dzakawanda; femero raMambo Mwari rakadai ngerwizi rwesorufa rinobaka kuita muriro.