Isa. 3 - Bhaibheri Rakachena muChindau

Bope muJerusarema

¹ Ngokuti, ringira, Mambo Mwari, Mambo Mwari wehondo, unotora sika nomudondoro kubva Jerusarema neJudha: zveshe zvinopa ndaramo, chingwa nemvura,

² ngwazi, murwi wehondo; mutongi, muprofeti, mufemberi nevakuru,

³ nduna yemakumi mashanu, munhu unoremeredzwa, gota, ngwazi yokuita masaramuso nomuereketi unemazano.

⁴ Neni ndichaita kuti varumbwana vadoko vaite vatongi vavo, nechiya dzichatonga padera pavo.

⁵ Vanhu vachatambudzana, umwe noumweni, munhu weshe ngomuakirwana wake; mudoko uchashoora mukuru, usina shwiro uchashoora vanoremeredzwa.

⁶ Umweni unozobata hama yake yemhatso yababa ake echiti, “Unezvokusimira, unozoita mutungamiriri wedu, nomurwi uyu wematongo unozoa pashi penyara yako.”

⁷ Asi umweni ngeiro zuva unozodaidzira echiti, “Andizoiti murapi; mumhatso mwangu amuna chingwa nokuti zvokusimira; amuzondiiti mutungamiriri wevanhu.”

⁸ Ngokuti Jerusarema rapumhunwa, Judha rawa, ngokuti kuereketa kwavo nezviito zvavo zvinorwisana naMambo Mwari, zvechiphikisana nouthende hwokuwapo kwake.

⁹ Kuoneka kwehope dzavo kunopupura ndivo; navo vanoronza pamhene zvishaishi zvavo kudai ngeSodhoma, avazvifishi. Ihehe kwevari, kumweya yavo! Ngokuti vadziunzira pachavo zvakashata.

¹⁰ Ronzai kunevakarurama, kuti zvinozovanakira, ngokuti vanozodya michero yezviito zvavo.

¹¹ Ihehe kwevari vakashata! Kushata kuchauya padera pavo, ngokuti muthuso wenyara dzavo unozopuwa kwevari.

¹² Vanhu vangu, vana ndivo vatambudzi vavo, nevakadzi vanotonga padera pavo. A vanhu vangu, vatungamiriri venyu vanomupausa, vanomurasha kubva munjira yemwaisisira kuhamba ndiyo.

Mambo Mwari Unotonga Vanhu Vake

¹³ Mambo Mwari unomiruka kuereketa ndaa yake; unoema kutonga vanhu.

¹⁴ Mambo Mwari unopotera mukutonga nevakuru vevanhu vake, nevatongi vavo: “Ndimwi mwakadya munda wemivhini; zvakachakatwa zvevarombo zviri mumhatso mwenyu.

¹⁵ Munoda kuitenyi mwechiponda vanhu vangu kuita zvigurwa, nokudzengenesa hope dzevarombo?” unoronza Mambo Mwari, Mwari wehondo.

Kungwadzwa kweVakadzi veJerusarema

¹⁶ Mambo Mwari wakati, “Ngokuti vakunda veZioni vanodzikudza, vanohamba nemitsipa yakarebeswa mberi, nemadziso anoemura, vanohamba vechinengama mukuhamba, vechigwinjirika ngetsoka dzavo,

¹⁷ ndizvo Mambo Mwari unozochaya ngemhezi padera pemasoro evakunda veZioni, naMambo Mwari unozofukura pamhene utitinini hwavo.”

¹⁸ Ngeiro zuva Mambo Mwari unozodusa mathuza kubva kutsoka dzavo, nemindanyara mumasoro avo, nendoro yakadai ngomwedzi;

¹⁹ zvinemeso mathivhera, mabhengere, nemachira okusunga pahuro;

²⁰ madhuku akapombwa, mathuza omutsoka, mabhande, mabhokisi emitombo inegwema rakanaka, nousenga;

²¹ ndandazi, nendandazi dzemiro;

²² zvokusimira zvemadhiri, mikapeko, machari, nezvikwama zvokubata panyara;

²³ machira evherevheti, machira orukangaza akanaka, maduku, nemavheri.

²⁴ Kunozoitika kuti pandau yemitombo yakanaka kunozoapo kuora; pandau yebhande, pachaenda bote; pandau pebvudzi rakanasa kurukwa, mhanza; pandau yechokufuka chakanaka, chokufuka chesaka; pandau yokuringirika kwakanaka, madukuswa.

²⁵ Vamuna venyu vanozowa ngeshoti, nengwazi dzenyu muhondo.

²⁶ Nemisiwo yake inozochema nokubonda; mukuparadzwa, unozogara pashi pamavhu.