Isa. 29 - Bhaibheri Rakachena muChindau

Zvichagumira Jerusarema

¹ A Arieri, Arieri, dhorobha umwo mwaakagara Dhavhidha! Tutsirai gore kugore; madhiri ngaateere njira dzawo.

² Asi ndinozotambudza Arieri, kunozoapo kutsumba nokuchema. Jerusarema rinozoita kudai ngeArieri kwendiri.

³ Nokudai ndiDhavhidha neni ndinozokutendenedza, ndinozokutsiira ngemarukumbati, nokukuemesera rukumbati.

⁴ Zvino unozoereketa kubva muudzamu hwevanhu pashi, unozoereketa kubva muudzamu pashi mubukuta; izwi rako rinozouya rechibva pamavhu rakadai ngeizwi rechipoko rechivherevhedza kubva pabukuta.

⁵ Asi, kuwanda kwemapandu ako kunozodai ngebukuta rakamotseka, nokuwanda kwevanotyisa kunozodai ngemazungu anopwititika. Kunozoitika ngokukasira paripo paripo

⁶ unozohambirwa ndiMambo Mwari wehondo nokutinhira nokuzungunyika kwenyika, nebope gurutu nomubvumo, neguwe nomurazvu womuriro unopisha kakurutu.

⁷ Nouwandu hwemadzinza eshe awo anorwisa Arieri, eshe anorwisana naye nemasvingo ake naavo vanomutambudza, anozodai ngehope dzinorotwa usiku.

⁸ Kunodai ngomunhu unenzara unorota hope echidya, nokumuka achindori nenzara, nokuti munhu unenyota unorota hope, echimwa, nokumuka achine nyota, ndizvo zvinoita zvikwata zvemadzinza eshe awo anorwisana noMutunhu Zioni.

Kuramba Kupangirwa

⁹ Emai, mushame mudzipofomadze pachenyu, muite mapofu! Radzai, asi haiwa ngevhini; thetherekai thetherekai, asi haiwa ngezvinoradzisa!

¹⁰ Ngokuti Mambo Mwari wakadurura padera penyu mweya wehope dzemadzikirira; wakonya madziso enyu, imwimwi vaprofeti, nokufukidza masoro enyu, imwimwi vaoni.

¹¹ Chioniso cheizvi zveshe kwomuri chaita kudai ngemazwi etsamba yakanamirwa. Kudai yechipuwa kunomunhu unokona kufunda ngokupangwa, “Funda ichi, ndapota,” unoti, “Andikoni, ngokuti yakanamirwa.”

¹² Nokuti kudai yechipuwa kwaari usikakoni kufunda vechiti, “Funda ichi, ndapota,” unoti, “Andikoni kufunda.”

¹³ Mambo Mwari wakati, “Ngokuti vanhu ava vanokwedzera kwendiri ngemiromo yavo, nemiromo yavo vanondiremeredza, naapo mwoyo yavo iri kuretu kubva kwendiri, nokundidira kwavo chaita chironzo chomunhu chakadzidziswa kwevari;

¹⁴ ndizvo, ringirai, ndinozoitazve zviro zvinoshamisa pakati paava vanhu, zvinohutisa nokushamisa. Noungwaru hwevanhu vavo vakangwara hunozopera, noungwaru hweavo vakangwara hunozofishika.”

Gonda reZichauya

¹⁵ Ihehe kwevari vanotsvakisisa kufishira Mambo Mwari urongwa hwavo mundau dzakadzama, avo mishando yavo iri muchidima, neavo vanoti, “Ndiani unotiona?” Nokuti, “Ndiani unotizia?”

¹⁶ Munokunukudza zviro kuti zviringire kudenga! Muumbi ungaedzaniswa nedongo here? Chiro chakaitwa chingaereketa here kumuiti wacho kuti, “Auzi kundiita akadi;” nokuti chiro chakaumbwa chingaereketa here kunomuumbi wacho kuti, “Aana kuzwisisa?”

¹⁷ Rebhanoni pamukuwo mudoko arizoiti munda unendimo, nomunda unendimo unozoerengwa kuita gwasha here?

¹⁸ Ngeiro zuva madziiranzee anozozwa mazwi ebhuku, madziso emapofu anozoona kubva muudzamu hwechidima.

¹⁹ Vakapfaa vanozoona kudakara kutsva munaMambo Mwari, nevarombo pakati pevanhu vanozodakara muneUwo Wakachena waIsuraeri.

²⁰ Ngokuti uwo unotyisa aachazoapo akadi, nomudadi unozoparadzwa, navo veshe vanogarira kuita zvakashata vachabviswa,

²¹ avo vanoita kuti munhu ashaishe ngeizwi ravo, vanomuteya ngomurau, uwo unokaraidza pamusiwo, nokupaukisa wakanaka ngechiro chisina shwiro.

²² Ndizvo izvi zvinoronza Mambo Mwari, uwo wakaripira Abrahama, ngendaa yemhatso yaJakobe, “Jakobe aazotsverudzwi, hope yake aizocheneruki.

²³ Ngokuti apo echiona vana vake, mushando wenyara dzangu, pakati pake, vanozochenesa zina rangu; vanozochenesa Uwo Wakachena waJakobe, vanozoema mukutya Mwari waIsuraeri.

²⁴ Naavo vanoshaisha mumweya vanozouya mukuzwisisa, navo vanogunun'una vanozoashira zvidzidziso.”