Isa. 28 - Bhaibheri Rakachena muChindau

Kunyowedzwa kwoUmambo hweDera

¹ A dzungudza rokudzikudza rezviradza zvaEfuremu, nokufota kwounaku hwouthende hweruva, riri pasoro peavo vanogutiswa ngokudya kwakawanda, avo vanonyiswa ngevhini!

² Ringira, Mambo Mwari unaye umwe wakagwinya, unesimba; unozoriga pashi ngenyara yake kudai ngomubvumo unematsanza, mubvumo unoparadza kudai ngomubvumbi wemvura inesimba, inokukuza.

³ Dzungudza rokudzikudza rezviradza zvaEfuremu rinozotsikwa tsikwa pashi petsoka.

⁴ Kufota kwouthende kwounaku hweruva riri padera pesoro reavo vanogutiswa ngokudya kwakawanda kunodai ngomuchero womuonde wokutanga kuibva risati raguma zienza; kunyazwi ndiani uwo unouona unoudya ngokukasira, apo waguma munyara mwake.

⁵ Ngeiro zuva Mambo Mwari wehondo unozoita dzungudza routhende, nodzungudza rounaku, kunevanhu vake vakasara;

⁶ nokuita mweya wokutonga kwakanaka kwaari unogara pakutonga, nokugwinyisa avo vanopetudza hondo pamisiwo.

Isaya neVaprofeti Vakararadza vaJudha

⁷ Avowo vanokweiwa ngokumwa vhini, vanothethereka ngezvokumwa zvinoradzisa; mupristi nomuprofeti vanokweiwa ngokumwa zvinoradzisa, vanokangaidzwa ngevhini, vanothethereka ngokumwa zvinoradzisa; vanokorera muchioniso, vanopumhunwa mukugura ndaa.

⁸ Matafura eshe akazara ngemarutsi anonyenyesa; apana ndau yakasukika.

⁹ Ndiani waanozodzidzisa ruziyo, nokunaani kwaanozonasa kududzira izwi? Avo vakarumurwa kubva pamukaka, naavo vakaduswa kubva pamazamo?

¹⁰ Ngokuti mupango padera pomupango, nomupango padera pomupango; musara padera pomusara, nomusara padera pomusara; pano pane kadoodoko, naapo pane kadoodoko.

¹¹ Ngegwinyiso ngomuromo unokakama norurumi rwomupara unozoereketa kuvanhu ava,

¹² kwevari kwaakati, “Ndikwo kuzorora; ipa kuzorora kuneavo vakaremba; nouku ndikwo kuzorora;” asi vakaramba kuzwa.

¹³ Ndizvo izwi raMambo Mwari rinozoita kwevari mupango padera pomupango, nomupango padera pomupango; musara padera pomusara, nomusara padera pomusara; pano pane kadoodoko, naapo pane kadoodoko, kuitira kuti vaende, vawe ngegotsi, vaguke, vabatwe ngomurau, vatorwe.

Buwe repaKhona reZioni

¹⁴ Ndizvo izwai izwi raMambo Mwari, imwimwi vadadi avo vanotonga ava vanhu muJerusarema.

¹⁵ Ngokuti mwati, “Taita chitenderano norufu, neSheori tinechitenderano; naapo kupondwa kwakakurisa kwapinda, akuchazouyi kwetiri; ngokuti takaita kuti manyepo aite ndau yedu yokutizira, nomukunyepa takahwaramwo.”

¹⁶ Ndizvo izvi zvinoronza Mambo Mwari, “Ringira, ndinoradzika muZioni buwe rokuita dzeyo, buwe rakaedzwa, buwe rinomutengo mukurutu repakhona, dzeyo rakagwinya; uwo unorigonda aazokaruki.

¹⁷ Neni ndinozoita kutonga kwakanaka musara, nokururama kuti kuite chipimo; matsanza anozotsvaira utiziro hwemanyepo, nemvura inozokukuza ndau yokuhwara.

¹⁸ Zvino kutenderana kwenyu norufu kunozodzimwa, nokutenderana kwenyu neSheori akuzoemi; naapo kupondwa kwakakurisa kwapinda, munozoponderwa pashi ndikwo.

¹⁹ Mukuwo weshe wekunopinda, kunozomutora, ngokuti mangwanani ngemangwanani kunozopinda, masikati nousiku; kuzwisisa mashoko aya kunozouya kutya kwega.”

²⁰ Ngokuti mubhedhi wakanyanya kufupika kuti munhu atambarare padera pawo, nechokufuka chakanyanya kutsonga kuti adzifukidze ndicho.

²¹ Ngokuti Mambo Mwari unozomiruka kudai ngepaMutunhu wePherazimu, unozonyangadzwa kudai ngomubani reGibheoni, kuita mushando wake, kushamisa ndikwo kuita kwake! Nokushanda mushando wake, mupara ndiwo mushando wake!

²² Ndizvo zvino musaita vadadi, kuti zvisungo zvenyu zvisazogwinyiswa; ngokuti ndazwa mutemo wokuparadzwa kwakaemeswa padera penyika yeshe, kunobva kunaMambo Mwari, Mwari wehondo.

Ungwaru hwaMwari

²³ Purutanai, muzwe izwi rangu; purutanai, muzwe kuereketa kwangu.

²⁴ Murimi unogara echirima here? Unogara echirima nokuputsa maondo omunda wake here?

²⁵ Naapo paanosereresa ivhu, aakushi madhiri here, nokuparadza khumini, nokukusha koroni mumisara nebhare kundau dzaro dzakaemeswa, nembeu dzimweni ngokumucheto wawo?

²⁶ Ngokuti wakanasa kudzidziswa, Mwari wake unomudzidzisa.

²⁷ Ngokuti madhiri aapurwi ngechireyi, nevhiri rengoro aritenderudzwi padera pekhumini; asi madhiri anopurwa ngomupuro, nekhumini ngendonga.

²⁸ Zviyo zvezvingwa zvinokuiwa, asi aazopedzi mukuwo echizvipura; unozvipura ngevhiri rengoro yake, nemahachi padera pazvo; asi aazvikuyi.

²⁹ Ichiwo chinobva kunaMambo Mwari wehondo; unoshamisa mukupanga, wakapindisisa kunaka muungwaru.