Isa. 27 - Bhaibheri Rakachena muChindau

¹ Ngeiro zuva Mambo Mwari ngeshoti yake yakashata, yakakura, yakagwinya, unozoorora Levhiathani nyoka inotiza, Levhiathani nyoka yakashongoroka, naye unozouraya dragoni iro riri muruandhle.

² Ngeiro zuva embai ngendaa yomunda wakanaka wemivhini.

³ Inini Mambo Mwari ndini mungwariri wawo; ndinoudiridzira mikuwo yeshe. Ndinourinda masikati nousiku kuti kusaapo naumwe ungaushaishira.

⁴ Andina ushungu. Kudai yechindipa minzwa nemakato, ndinozofora kurwa hondo nayo. Inini, ndinozoipisha yeshe ngomuriro.

⁵ Nokuti zve ibatire pendiri, kuti ingwaririke, ngaiite kunyarara neni, eya, ngaiite kunyarara neni.

⁶ Mumazuva awo achauya Jakobe unozoita nzinde, Isuraeri unozotumbuka maruva nokutungira matai matsva; naye unozozadza nyika ngemichero.

⁷ Wavapondera pashi here kudai ngezvaakaponda avo vakavaponda? Nokuti vaurawa here kudai ngevaurayi vavo vakaurawa?

⁸ Ngokudzingwa kwakavapinza muuhloko, wakarwisana navo; wakavafuridza kuvabvisa ngomubvumo wake mukuru ngezuva redutu rokumabvazuva.

⁹ Ndizvo ngendaa iyi kushata kwaJakobe kunozoripirwa; neiyi ndiyo michero yakazara yokuduswa kushaisha kwake; apo paanoita mapuwe eshe earita kuti adai ngemapuwe akapfaa anoputswa kuita zvigurwa, apana sika yokudira nemitombo inonuhwira yepaarita zvinozosara zvakaemapo.

¹⁰ Ngokuti dhorobha rinerusvingo raita matongo, ugaro hwakatizwa nokurambwa kudai ngomurubaya; makonyana anofuramwo, naapo anoata pashi, nokudya mashakani ematai.

¹¹ Naapo matai aoma, anogurwa; vakadzi vanouya nokubasa muriro ndiwo. Ngokuti ava vanhu vasina kuzwisisa; ndizvo uwo wakavaita aazovazwiri urombo, nouwo wakavasika aazovaitiri nyasha.

¹² Ngeiro zuva, Mambo Mwari unozopura zviyo, kubvira pamugero werwizi Yufratesi metsa mubani reEgipite, nemwi munozounganidzwa umwe ngaumwe, imwimwi vanhu vaIsuraeri.

¹³ Ngeiro zuva gwama guru rinozoridzwa, naavo vaiya varashika munyika yeAsiria naavo vakadzingirwa munyika yeEgipite vanozouya koodira Mambo Mwari padera pomutunhu wakacheneswa muJerusarema.