Isa. 26 - Bhaibheri Rakachena muChindau

Mwari Uchapa Vanhu vake Kunyisa

¹ Ngeiro zuva nduyo iyi inozoembiwa munyika yaJudha: Tine dhorobha rakagwinya; Mwari unozoemesa kunyisa kudai ngemarukumbati nemarusvingo.

² Beurai misiwo kuti dzinza rakarurama iro rinongwarira kugondeka ripoteremwo.

³ Uwo unemwoyo wakagwinya unomungwarira mukunyarara kwakaperera, mukunyarara, ngokuti unogonda mweuri.

⁴ Gonda munaMambo Mwari mhera nariini, ngokuti munaMambo Mwari, Mwari, unebuwe remhera nariini.

⁵ Ngokuti unodzasa pashi avo vanogara pakakwirira; dhorobha rakakwirira unoriputsira pashi pamavhu. Unoridzasa pakadzaka pamavhu, unorikandira pabukuta.

⁶ Tsoka dzinoritsikatsika, tsoka dzevarombo nezvitsiko zvevanotama.

⁷ Njira yevakarurama yakaserera; O Wakarurama, munosereresa njira yevakarurama.

⁸ Munjira yokutonga kwako, O Mambo Mwari, tinokugarira; zina rako nokukarakadzwa kwako ndikwo kudisisa kwomweya yedu.

⁹ Mweya wangu unokushuwira usiku; mweya wangu mukati mwangu unokutsvakisisa yaamho. Ngokuti apo kutonga kwako kuri munyika, vanogara munyika vanodzidza zvakarurama.

¹⁰ Kudai nyasha dzanyaitirwa vakashata, avadzidzi kururama; munyika mwezvakarurama vanoita zvakashata, navo avaoni umambo hwaMambo Mwari.

¹¹ O Mambo Mwari, nyara yako yakamirudzwa mudenga, asi avaioni. Ita kuti vaone kugwinyisira kwako ngendaa yevanhu vako, vatsveruke. Muriro wewakanasirira magaa ako ngauapedze.

¹² O Mambo Mwari, muchatiemesera kunyarara, ngokuti ngegwinyiso zveshe zvetakaita, ndiwe wakatiitira.

¹³ O Mambo Mwari, Mwari wedu, madzimambo amweni ngokubanze kwako akatonga padera pedu, asi isusu tinoremeredza zina rako rega.

¹⁴ Vakafa avaponi; vakafa avamiruki, ngokuti wakavaorora nokuvaparadza, wakatsukutidza kukarakadzwa kwavo.

¹⁵ Asi wawanza dzinza, OMambo Mwari, wawanza dzinza, unoirikidzwa; wakudza miganu yeshe metsa kumagumo enyika.

¹⁶ O Mambo Mwari, mukutambudzika vakakutsvaka, vakadurura mukumbiro apo kuorora kwako kwaiya padera pavo.

¹⁷ Kudai ngomukadzi unemimba, unobinyauka nokuchema mukurwadziwa kwake, apo mukuwo wake waapasinde, ndizvo zvetaiya taita pamberi pako, O Mambo Mwari.

¹⁸ Isusu taiya taanemimba, takabinyauka nokurwadziwa, asi takabereka kwega dutu. Atizi kunyisa panyika; napo apana naumwe wakabarwa kugara munyika.

¹⁹ Vakafa vako vanozopona, miiri yavo inozomuka. Mukai muembe ngokudakara, imwimwi munogara mubukuta! Ngokuti beto renyu rakadai ngebeto remangwanani, nenyika inozobudisa vakafa.

Kutonga noKupetudza

²⁰ Uyai, vanhu vangu, poterai mumakamera enyu, mukonye misiwo yenyu, mudzifishe mukuwo mudoko metsa kutseneka kwapinda.

²¹ Ngokuti, ringira, Mambo Mwari unobuda kubva kundau yake kuorora avo vanogara munyika ngendaa yokushaisha kwavo; nyika inozoduhumura ngazi yakaparadzirwa padera payo, aichazofukidzizve vakaurawa vayo.