Isa. 25 - Bhaibheri Rakachena muChindau

Nduyo yoKukudza

¹ O, Mambo Mwari, ndiwe Mwari wangu; ndinozokukudza, ndinozoirikidza zina rako; ngokuti waita zviro zvinoshamisa; urongwa hwakarongwa wekaretu wakagondeka negwinyiso.

² Ngokuti waita dhorobha kuti riite murwi, dhorobha rinorusvingo riite matongo; ngome yevapara arisisiri dhorobha; arizoakwizve.

³ Ndizvo vanhu vakagwinya vanozokuirikidza, madhorobha emadzinza anotyisa anozokutya.

⁴ Ngokuti iwewe wakaita bako kwevari varombo, bako kwevanotama mukutambudzika kwavo; wakaita utiziro hwavo kubva kumubvumo, bvute kubva mukupisha. Naapo kufuridza kwevanotyisa kwaputika kunodai ngomubvumo wepachando parukumbati,

⁵ bope revapara kudai ngokupisha kwendau yakaoma, munodzima kupisha ngebvute regore; nduyo yevapara vanotyisa inozonyaradzwa.

Mambo Mwari Unonasira Dhiri

⁶ Pamutunhu uyu Mambo Mwari wehondo unozoitira vanhu veshe dhiri gurutu, nokudya kwakanaka, dhiri revhini sharuka, zvakakora zvakazara ngemwongo, vhini sharuka rakanasa kusefiwa.

⁷ Naye unozoparadza pamutunhu uyu chifukidziro chakafukidza padera pevanhu veshe, nejira iro rakatambanudzwa padera pemadzinza eshe.

⁸ Unozomedza kufa mhera nariini. Zvino Mambo Mwari unozopukuta masodzi kubva kuhope dzeshe, naye unozodusa kushoorwa kwevanhu vake kubva padera penyika yeshe; ngokuti Mambo Mwari waereketa.

⁹ Zvichazozwi pairo zuva, “Ringirai, uyu ndiye Mwari wedu; takamugarira, kuitira kuti atiponese. Uyu ndiye Mambo Mwari uyo wetaigarira; ngatidakare nokudakadzwa muruponeso rwake.”

Mwari Unozoorora Moabhi

¹⁰ Ngokuti nyara yaMambo Mwari inozozorora pamutunhu uyu. VaMoabhi vanozotsikwatsikwa pashi pandau yavo kudai ngemahlanga anotsikwa tsikwa pashi murindi remadisa.

¹¹ Kunyazwi akanyatambanudza nyara dzake pakati pavo, kudai ngomuhlambiri unotambanudza nyara dzake kuhlambira, kudzikudza kwake kunozodzaswa pashi, kunyazwi echiedza ngenyara dzake.

¹² Ukwiriri hwemarukumbati ake huchaputsirwa pashi, kuukandira pashi pamavhu, kunyazwi nokubukuta.