Isa. 24 - Bhaibheri Rakachena muChindau

Mambo Mwari Unozoorora Nyika

¹ Ringira, Mambo Mwari waakuda kuparadza zveshe zviri munyika nokuisiya isina chiro, naye unozopeta padera payo, nokuparadzira vanhu vanogara mukati mwayo.

² Zvino kudai ngezvinoitirwa vanhu, ndizvo zvinozoitirwa vapristi; kudai ngezvinoitirwa hloko, ndizvo zvinozoitirwa mambo; kudai ngezvinoitirwa murandakadzi, ndizvo zvinozoitirwa vahosi; kudai ngezvinoitirwa mutengi, ndizvo zvinozoitirwa mutengesi; kudai ngezvinoitirwa mukwereti, ndizvo zvinozoitirwa mukweretesi; kudai ngezvinoitirwa unobhara chibharo, ndizvo zvinozoitirwa mubharisi.

³ Nyika inobvisirwa zveshe nokusiyiwa isina chiro, ngokuti Mambo Mwari wakaereketa izwi iri.

⁴ Nyika inooma nokuzeketera, nyika inopera simba nokuzeketera; vanhu vakuru venyika vanopera simba:

⁵ Nyika inosvipiswa pashi paavo vanogara mukati mwayo; ngokuti vadarika mipango, vashaishira zviemeso, vagura chitenderano chemhera nariini.

⁶ Ndizvo kutukwa kwapedza nyika, naavo vanogara mukati mwayo vanotambudzika ngokushaisha kwavo; ndizvo vagari vomunyika vanopera, vashomani ndivo vasaramwo.

⁷ Vhini idzva rinooma, muvhini unopera simba, veshe vanemwoyo inodakara vanogomera.

⁸ Kudakara kwembira kunopera, bope raavo vanodakara rinopera, kudakara kwechidangari kunopera.

⁹ Avachamwi vhini vechiemba; kumwa kunoradzisa kunovava kwevari vanokumwa.

¹⁰ Dhorobha renyongano rinoputsirwa pashi; mhatso yeshe inokonywa kuti munhu asazopotera.

¹¹ Kuripo kuchemera vhini kukurutu mumapato ngokuti akuna vhini; kweshe kudakara kwaguma kumagumo, kudakara kwenyika kwapera.

¹² Dhorobha rasara raita dongo, misiwo yedhorobha yaputsirwa mumatongo.

¹³ Ngokuti izvi zvinozodaro panyika, nepakati pemadzinza evanhu, kudai ngeapo panozungunyiswa mukukukurwa kwomuorivhi, kudai ngezvimavhini zvinosarira apo kukukura kwapera.

¹⁴ Vanomirudza mazwi avo, vanoemba ngendaa yokudakara; vanodaidzira kubvira kumabirirazuva ngendaa youmambo hwaMambo Mwari.

¹⁵ Ndizvo mumabvazuva kudzai Mambo Mwari; muzviwi zvoruandhle kudzai zina raMambo Mwari, Mwari waIsuraeri.

¹⁶ Kubvira kumagumo enyika tinozwa nduyo dzokukudzwa kweWakarurama. Asi ndinoti, “Ndinopera simba, ndinopera simba. Ihehe kwendiri!” Ngokuti vachengedzi vaita ngokuchengedza; vachengedzi vanochengedzera kakurutu.

¹⁷ Kutya, hunza nomurau, zviri padera pako, iwewe unogara panyika.

¹⁸ Kunyazwi ndiani uwo unotiza bope rokutya unozowira muhunza; kunyazwi ndiani unokwira kubva muhunza unozobatwa ngomurau. Ngokuti mafasitera edenga akabeuka, nemadzeyo enyika anozungunyika.

¹⁹ Nyika yagurwa yaamho, nyika yatatuka ngepakati, nyika yazungunyiswa ngokushata kukurutu.

²⁰ Nyika inothethereka kudai ngomunhu wararadza, inozungunyikazve kudai ngechitumba; nokupauka kwayo kunozorema padera payo, nayo inowa, isikachamukizve.

²¹ Ngeiro zuva Mambo Mwari unozoorora hondo yomudenga mudenga, nemadzimambo enyika ari padera penyika.

²² Vanozounganidzwa pamwepo, kudai ngemabhanditi anounganidzwa muhunza; vanozokonyerwa mutirongo, ngesure kwemazuva akawanda vanozoororwa.

²³ Zvino mwedzi unozokangaidzwa, nezuva rinozotsverudzwa, ngokuti Mambo Mwari wehondo unozotonga paMutunhu weZioni nomuJerusarema, nepamberi pevasharuka vake uchaonisa uthende hwake.