Isa. 22 - Bhaibheri Rakachena muChindau

Izwi ngendaa yeJerusarema

¹ Izwi guru ngendaa yebani rechioniso. Unoronzenyi ngokukwira kwemwaita mweshe padera pemhatso,

² imwimwi mwakazara ngokudaidzira, dhorobha rinenyongano, guta rinokudakara kukurutu? Vakaurawa vako avazi kuurawa ngeshoti, nokuti kufira mukurwa.

³ Vatongi vako veshe vatiza pamwepo, vakasungwa vasina kushandisa uta. Veshe venyu vakaoneka vakasungwa, kunyazwi vakatizira kuretu.

⁴ Ndizvo ndakati, “Ringirai kuretu kubva kwendiri, ngandicheme ngesimba; musaedza kundiembedzera, ngendaa yokuparadzwa kwevanhu vangu vanodiwa.”

⁵ Ngokuti Mambo Mwari, Mwari wehondo, unaro zuva rokutambudzika nokutsikwa tsikwa pashi nokukangaidzwa mubani rechioniso; zuva rokuputswa kwemarukumbati, nerokuchemera kudetserwa kumitunhu.

⁶ VaEramu vakatwara chikomwe, nengoro dzokurwa dzinevamuna vanogadha mahachi; nevaKiri vakabudisa zvihlangu.

⁷ Mabani ako akapinda kunaka akazara ngengoro dzokurwa, nevamuna vanogadha mahachi vakaema pamisiwo.

⁸ Wadusa chakafukidza Judha. Ngezuva iro wakaringira kune zvokurwa ndizvo zvomumhatso yomugwasha,

⁹ nemwi mwakaona ndau zhinji dzakapwanyika mudhorobha raDhavhidha, mwakaunganidza pamwepo mvura yegandwa rokubani.

¹⁰ Mwakaerenga mhatso dzeJerusarema, mwakaputsa mhatso kuti mugwinyise marukumbati.

¹¹ Mwakaita gandwa pakati pemarukumbati mairi kutora mvura yegandwa rekaretu. Asi amuzi kuringira kwaari uwo wakaita izvi, nokuti kuremeredza uwo wakazvironga karetu.

¹² Muiro zuva Mambo Mwari wehondo wakadaidza kuchema nokutsumba, nokuita mhanza nokusimira machira emasaka.

¹³ Asi kwaiyapo kudakara nemadhiri, kuuraya kabi, kuuraya makwai, kudya nyama nokumwa vhini vechiti, “Ngatidye nokumwa, ngokuti mangwani tinozofa.”

¹⁴ Mambo Mwari wehondo wakazviziisa pachake munzee dzangu. “Chokwadi uku kushata akuzoduswi kubva kwomuri metsa mufe,” unoronza Mambo Mwari, Mwari wehondo.

Nyowedzo kuShebhina

¹⁵ Izvi ndizvo zvinoronza MamboMwari, Mwari wehondo, “Uya, enda kumungwariri wemare uyu, kunaShebhina, uwo unobata mhatso, wechiti,

¹⁶ ‘Maruramiro ako ari pari? Unani pano hama yako, kuti udzitsetsere iba pachako, kudai ngouwo unodzitsetsera iba pakakwirira, nokudzitsira pokugara muruware?

¹⁷ Ringira, Mambo Mwari uchakukandira kuretu kubva kundau yako ngesimba, hama yangu. Ucharamba akakubata ngesimba,

¹⁸ unozokutenderedza ngesimba, nokukukandira kudai ngebhora kunyika yakapamhama; naapo unozofirapo nengoro dzokurwa dzouthende hwako dzinozoita kutsveruka kwemhatso yamambo wako.

¹⁹ Neni ndinozokuthuthumidza kubva pamushando wako, newe unozodzaswa pashi kubva kundau yako.’

²⁰ “Ngeiro zuva ndinozodaidza muranda wangu Eriakimu mukororo waHirikia.

²¹ Ndinozomupfekesa ngezvokufuka zvako nokumugwinyisa ngebhande rako, ndinozopa kutonga kwako munyara mwake; naye unozoita baba kwevari vagari vomuJerusarema nokumhatso yaJudha.

²² Ndinozoisa pamapfudzi ake kiyi yemhatso yaDhavhidha; unozobeura, akuna naumwe unozokonya; unozokonya, akuna naumwe unozobeura.

²³ Ndinozomukohomera kudai ngehoko pandau yakagwinya; naye unozoita dendemaro routhende kumhatso yababa ake.

²⁴ Navo vanozoturika padera pake kurema kweshe kwemhatso yababa ake, mibarirwana yake, nezvidziyo zveshe zvakatsonga kubvira kuzvidziyo zvetsani, kuguma kuzvidziyo zveshe zvemabiya.

²⁵ Ngeiro zuva,” unoronza Mambo Mwari, Mwari wehondo, “Hoko yakakohomerwa pandau pakagwinya inozobviswa; nayo inozogurwa yechiwa pashi, nomutwaro uwo waiya padera payo unozopera,” ngokuti Mambo Mwari wazviereketa.