Isa. 21 - Bhaibheri Rakachena muChindau

Chioniso choKuwa kweBhabhuroni

¹ Izwi guru ngendaa yorubaya rworuandhle. Kudai ngezvipupuri zvokubani zvinotsvaira, zvinouya zvechibva murubaya kubva kunyika inotyisa.

² Chioniso chinosvipisa mwoyo chinoronzwa kwendiri; mupiri unopira, muparadzi unoparadza. Kwira, O Eramu, tendenedza ngehondo, O Medhia; kweshe kufemerika kwaakaunza ndinokupedzisa.

³ Ndizvo chiunu changu chazara ngokutambudzika; kurwadza kwandibata kudai ngokurwadziwa kwomukadzi unobereka; ndakotamiswa pashi andikoni nokuzwa; ndakangaidzwa ndizvo andikoni nokuona.

⁴ Mwoyo wangu unoita maharura, kutyisa kwandikarudza; kujeka kwemangwanani kwendinodisisa kwatsandurwa kwendiri kuita kutyisa kunohutisa.

⁵ Vanonasirira tafura, vanochinga magudza, vanodya, vanomwa. Mirukai, imwimwi nduna, mudzodze chihlangu mafuta.

⁶ Ngokuti izvi ndizvo zvaronza Mambo Mwari kwendiri, “Enda, uemese murindi; ngaadaidzire chaanoona.

⁷ Naapo echiona vagadhi, vanhu vemahachi vairi vairi, vagadhi vembongoro, vagadhi vemangamera, ngaanase kupurutana ngokuzwisisa kukurutu.”

⁸ Zvino murindi wakadaidzira kudai ngemhondoro; “O Mambo Mwari, ndinogara ndakaema padera porusvingo rwokurinda ngomukuwo wemasikati, neni ndinoemeswa pandau yangu yokurinda usiku hweshe.

⁹ Ringira, apo vanouya, vagadhi vanhu vemahachi vakaita vairi vairi.” Zvino wakapingura akati, “Rawa, rawa Bhabhuroni; nemiedzaniso yakatsetswa yaro yeshe yezvimwari zvaro yaputsirwa pamavhu.”

¹⁰ O vakapurwa vangu, nezviyo zvembuwa yangu; izvo zvendakazwa kubva kunaMambo Mwari wehondo, Mwari waIsuraeri, ndinozvironza kwomuri.

Izwi ngendaa yeEdhomu

¹¹ Izwi guru ngendaa yeDuma. Umwe unondidaidza kubva Seira, “Murindi, usiku hwakadini? Murindi, usiku hwakadini?”

¹² Murindi unoti, “Kuedza kunouya, nousiku nahwo. Kudai mwechida kubvunza, bvunzai; petukaizve.”

Izwi ngendaa yeArabhia

¹³ Izwi guru ngendaa yeArabhia. Munozogara mugwasha reArabhia, imwimwi zviunga zvinohamba zvevaDhedhani.

¹⁴ Unzirai mvura kune vanenyota, shonganai nevanotiza nechingwa, O vagari vomunyika yeThema.

¹⁵ Ngokuti vatiza kubva kushoti, kushoti dzakashwamurwa, nouta hwakakungwa, nokutyisa kwehondo.

¹⁶ Ngokuti izvi ndizvo zvaaronza Mambo Mwari kwendiri, “Gore risati rapera, kudai ngemakore ouwo wakathorwa kushanda, uthende hweshe kweKhedha hunozopera.

¹⁷ Nevakasara veavo vevanorwa ngouta, ngwazi dzevana veKhedha, vanozoita vashomani;” ngokuti Mambo Mwari, Mwari waIsuraeri, wazviereketa.