Isa. 2 - Bhaibheri Rakachena muChindau

Kunyarara Kusikaperi

¹ Izwi raakaona Isaya mukororo waAmozi ngendaa yaJudha neJerusarema:

² Mumazuva achauya, mutunhu wemhatso yaMambo Mwari unozoemeswa kuita wakarebesa kupinda mitunhu yeshe, nawo unozomirudzwa padera pezvimitunhu; madzinza eshe anozoerera kuuya kwouri.

³ Vanhu vazhinji vanozouya vechiti, “Uyai, ngatikwire kumutunhu waMambo Mwari, kumhatso yaMwari waJakobe, kuti atifundise njira dzake, nesu tihambe mumakwara ake. Ngokuti mupango unozobuda kubva muZioni, neizwi raMambo Mwari kubva Jerusarema.”

⁴ Unozotonga pakati pemadzinza, unozokaraidza vanhu vazhinji; navo vanozopfura mashoti avo kuita miromo yemapadza, nemikhondo yavo kuita mapanga okutongora; dzinza arizomirudziri dzinza shoti, avachazofundiswi hondo nariini.

⁵ A mhatso yaJakobe, uyai, ngatihambe mukujeka kwaMambo Mwari!

Kudzida Kuchaparadzwa

⁶ Ngokuti wasiya njira yevanhu vako, O mhatso yaJakobe. Ngokuti vakazara ngemishuma inobva kumabvazuva, vafemberi kudai ngevaFiristia, navo vanobatana nyara nevana vevapara.

⁷ Nyika yavo yakazara ngesirivha nomukore, upfumi hwavo auperi; nyika yavo yakazara ngemahachi, ngoro dzavozve adzina magumo.

⁸ Nyika yavo yakazara ngemiedzaniso yokudira; vanogwadama pashi kudira mishando yenyara dzavo, kune chakaitwa ngezvinwe zvavo.

⁹ Ndizvo munhu unopfaiswa, nevanhu vanodzaswa pashi; ndizvo usavarekerera.

¹⁰ Potera mubuwe, uhware mubukuta, kubva mukutyisa kwaMambo Mwari, kubva muuthende hwoumambo hwake.

¹¹ Kuringirika kwokudzikudza kwevanhu kunozoiswa pashi, nokudzikudza kwevanhu kunozopfaiswa, naMambo Mwari ega unozokuriswa ngeiro zuva.

¹² Ngokuti rinozoapo zuva raMambo Mwari wehondo padera pavo veshe vanodzikudza, naavo vanehasha, nepadera pavo veshe vanodzimirudza; navo vanozoiswa pashi,

¹³ nepadera pemisidhari yeshe yeRebhanoni, iyo yakareba nokukwirira, nepadera pemiokhi yeshe yeBhashani;

¹⁴ nepadera pemitunhu yeshe mirebu, nepadera pezvimitunhu zveshe zvakakwirira;

¹⁵ nepadera pamarusvingo eshe marebu, nepadera pemarukumbati eshe akashosherwa;

¹⁶ nepadera pengarava dzeshe dzeTharshishi, nepadera pemikhumbi yeshe inodakadza.

¹⁷ Nokudzikudza kwavanhu kunozopfaiswa, nokudzikudza kwevanhu kunozodzaswa pashi; naMambo Mwari ega unozokuriswa ngeiro zuva.

¹⁸ Nemiedzaniso yokudira inozopera yaamho.

¹⁹ Vanhu vanozopinda mumapako emapuwe, nomumirindi yemavhu, kubva pakutyisa kwaMambo Mwari, kubva muuthende hwoumambo hwake, naapo paanomiruka kutyisa nyika kakurutu.

²⁰ Ngeiro zuva vanhu vanozorasha kunhuta nokuzviremwaremwa miedzaniso yavo yokudira yesirivha, nemiedzaniso yavo yokudira yomukore, yevakadziitira pachavo kudira,

²¹ kupinda mumapako emapuwe, nokuti mundutwe dzemawere, kubva pakutyisa kwaMambo Mwari, kubva muuthende hwoumambo hwake, apo paanomiruka kutyisa nyika kakurutu.

²² Kunukuka kubva kuvanhu avo vane kufema kwavo kuri mukati mwemiro dzavo, ngokuti vanozoerengwa kuitenyi?