Isa. 19 - Bhaibheri Rakachena muChindau

Mwari Unozoorora Egipite

¹ Izwi guru ngendaa yeEgipite. Ringirai, Mambo Mwari unogadha padera pegore rinohambisa, naye unouya Egipite; miedzaniso yokudira yeEgipite inozohuta ngokuapo kwake, nemwoyo yevaEgipite inozonyunguruka mukati mwavo.

² “Neni ndinozomusa vaEgipite kumukira vaEgipite; navo vanozorwisana umwe neumweni, muakirwana nomuakirwana wake, dhorobha nedhorobha, umambo noumambo.

³ Mweya wevaEgipite unozopera mukati mwavo, neni ndinozoparadza urongwa hwavo; navo vanozobvunza kumiedzaniso yokudira nokumweya yevakafa nezvipoko naavo vanobudirwa nomweya inoziikanwa.

⁴ Ndinozopira vaEgipite munyara yamambo unoushungu; mambo unotyisa unozotonga padera pavo,” unoronza Mambo Mwari wehondo.

⁵ Mvura yeNaire ichapwa, norwizi runozoita makandwa nokuoma;

⁶ migero yarwo inozonuhwa, matai erwizi Naire anozopwa nokuoma, tsanga nenhokwe zvinozofota.

⁷ Kuchaapo ndau dzisina chiro pasinde peNaire pamahumbikumbi eNaire; nazvo zveshe zvinosimwa pasinde peNaire zvinozooma, zvechitorwa, azvichazoapopi.

⁸ Avo vanobata hove vanozotsumba, navo veshe vanokandira zviyedzo muNaire vanozochema, naavo vanotambanudza zvitaa padera pemvura vanozopera simba.

⁹ Vashandi vanoshanda murukangaza runofenurwa vanozopera simba, varuki nevanoruka tambo yakanakisa vanozotsverudzwa.

¹⁰ Varuki vawo vanozopera simba, naavo veshe vanoshandira muthuso vanozosvipiswa mwoyo.

¹¹ Vatongi veZoani mapenzi emene; vapangi vakangwara vaFaro vanopa kupanga kwoupenzi. Mungaita maronzerenyi kunaFaro kuti, “Ndiri umwe weavo vakangwara, mubarirwana wemadzimambo ekare?”

¹² Vari pari zvino vanhu vako vakangwara? Ngavakuronzere nokuita kuti zviziikanwe kweuri icho Mambo Mwari wehondo chaakaronga ngendaa yeEgipite.

¹³ Vatongi veZoani vaita mapenzi, nevatongi veNofi vakachengedzerwa; avo vari buwe repakhona remadzinza ayo vakapaukisa Egipite.

¹⁴ Mambo Mwari wakadurura mweya wokukangaidza mukati mwavo; navo vaita kuti Egipite ithethereke kumishando yeshe yayo, kudai ngomunhu unoraradza unopeyama peyama mumarutsi ake.

¹⁵ Auzoapo mushando weEgipite ungaitwa ngesoro nokuti muswe, dai romubvumo nokuti tsanga ringakona kuitira Egipite chiro.

Egipite Unozodira Mambo Mwari

¹⁶ Ngeiro zuva vaEgipite vanozodai ngavakadzi, nokuhuta ngokutya pamberi penyara yaMambo Mwari wehondo, yaanomirudza kurwa navo.

¹⁷ Nenyika yaJudha inozoita inotyisa kuvaEgipite; weshe kwaari uwo unochironzerwa unozotya mukati mwake ngendaa yourongwa hwaMambo Mwari wehondo, waanoronga ndivo.

¹⁸ Ngeiro zuva anozoapo madhorobha mashanu munyika yeEgipite anoereketa ndimi yevaKhenani, nokupika kunaMambo Mwari wehondo. Rimwe reaya rinozodudzwa kuti Dhorobha reZuva.

¹⁹ Ngeiro zuva rinozoapo arita raMambo Mwari pakati penyika yeEgipite nesika kunaMambo Mwari kumiganu yayo.

²⁰ Nayo inozoita chioniso nechapupu kunaMambo Mwari wehondo munyika yeEgipite; apo pevanochemera kunaMambo Mwari ngendaa yevatambudzi, naye unozovatumira muponesi nomuvikiri; naye unozovanunura.

²¹ Mambo Mwari unozoita pachake kuti aziikanwe kuvaEgipite, navaEgipite vanozozia Mambo Mwari ngeiro zuva, vanozoita mubairo nomudiro; navo vanozopika mhiko kunaMambo Mwari nokudziita.

²² Mambo Mwari unozochaya Egipite, kuchaya nokuponesa; vanozopetuka kunaMambo Mwari, naye unozopurutana mikumbiro yavo, nokuvaponesa.

²³ Ngeiro zuva pato rinozoapo rinobva Egipite kuenda Asiria, nevaAsiria vanozouya kuEgipite, nevaEgipite kuenda Asiria; nevaEgipite vanozodira nevaAsiria.

²⁴ Ngeiro zuva Isuraeri rinozoita rechitatu; pamwepo Egipite neAsiria, nechifumiso pakati penyika,

²⁵ avo vaafumisa Mambo Mwari wehondo echiti, “Ngavafumiswe vaEgipite vanhu vangu, nevaAsiria mushando wenyara dzangu, nevaIsuraeri nhaka yangu.”