Isa. 17 - Bhaibheri Rakachena muChindau

Mwari Unozoorora Aramu neIsuraeri

¹ Izwi guru ngendaa yeDhamasekusi. “Ringirai, Dhamasekusi rinozoemeswa kuti risachaita dhorobha, naro rinozoita murwi wematongo.

² Madhorobha aAroeri anozotizwa mhera nariini; anozoita ndau dzemafuro ezvifuyo, awo anozoata pashi, akuna naumwe unozoita kuti atye.

³ Bako richabviswa kubva muEfuremu, noumambo kubva Dhamasekusi; nevanosara veAramu vanozodai ngouthende hwevana vaIsuraeri,” unoronza Mambo Mwari wehondo.

⁴ “Ngeiro zuva uthende hwaJakobe hunozotsonzwa, nokukora kwenyama yake kunozoonda.

⁵ Nokudai ngaapo mucheki paanounganidza zviyo zvakaema, nomuoko wake unocheka mitsonzoti, nokudai ngaapo umwe echiunganidza zviyo mubani reRefaimu.

⁶ Hwarakwatwa dzemaorivhi dzinozosiyiwamwo apo miti yemaorivhi yazungunyiswa, michero miiri nokuti mitatu inozosara kumagumo edai redera, mirongomuna nokuti mishanu kumagumo ematai anobereka kakurutu,” unoronza Mambo Mwari, Mwari waIsuraeri.

⁷ Ngeiro zuva vanhu vanozoringira kunoMuiti wavo, nemadziso avo anozoringira Wakachena waIsuraeri.

⁸ Avazoringiri kumaarita, mushando wenyara dzavo, navo avazoringiri izvo zvakaitwa ngezvinwe zvavo, nokuti kuchimwari Ashera, nokuti maarita okupisha mitombo inegwema rakanaka.

⁹ Ngeiro zuva madhorobha avo akagwinya anozodai ngendau dzakatizwa dzevaHivhi nevaAmori, idzo dzevakatiza ngendaa yevana vaIsuraeri; kunozoapo kuparadzwa.

¹⁰ Ngokuti wariyarwa Mwari woruponeso rwako, auzi kupinimidza ngeBuwe rokuhwara kwako; ndizvo kunyazwi unosima zvisimwa zvinodakadza, unosima zvisimwa zvezvimwari zvisikaziikanwi,

¹¹ kunyazwi unganyazviita kuti zvikure, ngezuva rounozvisima ndiro, nokuita kuti mbeu yako itumbuke mumangwanani ewasima; asi kucheka kunozotiza ngezuva rokutsumba nokusvipo mwoyo kusikabviri.

Magaa eMadzinza Anonyiswa

¹² A, kutinhira kwevanhu vakawanda, vanotinhira kudai ngokutinhira kunoita ruandhle! A, kurira kwemadzinza, anorira kudai ngokurira kwemvura inesimba!

¹³ Madzinza anorira kudai ngokurira kwemvura zhinji, asi Mwari unozoakaraidza, nawo anozotizira kuretu, nokutorwa ngedutu, kudai ngamazungu padera pemitunhu, pamberi pedutu nebukuta rechamupupuri pamberi pedutu guru.

¹⁴ Madeekoni, ringira, kuripo kutyiswa! Kusati kwaedza apachina. Ndicho chikoaniswa chaavo vanotishaishira, nokuthuswa kwaavo vanotichakata.