Isa. 16 - Bhaibheri Rakachena muChindau

Kupererwa kweMoabhi

¹ Tumirai makwai kumutongi wenyika kubva Sera, ngenjira yomushango, kuguma kumutunhu wemwanasikana weZioni.

² Kudai ngeshiri yabviswa musaki inozungaira, ndizvo zvinoita vanasikana veMoabhi pamazambuko eArinoni.

³ “Pangai, ita kutonga kwakanaka; mumvuri wako ngauite kudai ngousiku pakati pemasikati; fishai avo vakadzingwa; musapira vanotiza.

⁴ Vakadzingwa veMoabhi ngavagare pakati penyu, ita bako kwevari kubva kumuparadzi.” Naapo mutambudzi pasisina, nokuparadzwa kwapera, nevaurayi vapedzwa munyika,

⁵ zvino dendemaro rinozoemeswa munyasha dzinorudo mutende raDhavhidha, naye unozogara padera paro mukugondeka mutongi unotsvaka kutonga kwakanaka, naye echikasira kuunza kururama.

⁶ Takazwa ngokudzikudza kweMoabhi, unodzikudza kakurutu! Kudzitunhumadza kwake, kudzikudza kwake, noushungu hwake, kuganza kwake, akuna shwiro.

⁷ Ndizvo Moabhi ngaacheme, veshe umwe ngaumwe ngaachemere Moabhi. Muchatsumba kakurutu makhekhe emavhini eKirharesethi.

⁸ Ngokuti minda yeHeshibhoni inozofuhuka, nemivhini weSibhima; madzimambo emadzinza akagura miti yakapinda kunaka yayo; akaguma Jaza, akapauka kuenda murubaya; matai ayo akatambarara, akaambuka ruandhle.

⁹ Ndizvo ndinochema kudai ngokuchema kweJaza ngendaa yemivhini yeSibhima; ndinokunyakatisa ngemasodzi angu, iwewe Heshibhoni naEreare; ngokuti kudakara kwemichero yenyu yezienza nokuvhuna kwenyu kwapera.

¹⁰ Kudakara nokudakadzwa kwabviswa kubva kumunda unendimo; nomuminda yemivhini akuna ngoma dzichaembwa, nokuti bope rokudakara; vasvini avazosvini vhini muzvisviniro zvavo; ndanyaradza bope ravo.

¹¹ Ndizvo mwoyo wangu unozorira kudai ngembira ngendaa yeMoabhi, nemarupande angu omukati ngendaa yeKirheresi.

¹² Naapo Moabhi paanodzionisa pachake, apo paanodzitambudza pachake padera pendau yakakwirira, apo paanouya kundau yake yakacheneswa kookumbira, aazonyisi akadi.

¹³ Iri ndiro izwi raakaereketa Mambo Mwari ngendaa yeMoabhi karetu.

¹⁴ Asi zvino Mambo Mwari unoti, “Mumakore matatu, kudai ngokuerengwa kwemakore ewakathorwa kushanda, uthende hweMoabhi hunozodzaswa mukushoorwa, kunyazwi inechiunga chikuru; nevanosara vanozoita vashomani yaamho, vasina simba.”