Isa. 14 - Bhaibheri Rakachena muChindau

Vanopetuka Kubva kuUsungwa

¹ Asi Mambo Mwari unozoitira Jakobe nyasha, uchazotsanangurazve Isuraeri, nokuvaisa munyika mwavo; nevapara vanozobatana navo, vanozodzibatanidza pachavo kumhatso yaJakobe.

² Madzinza anozovatora nokuvaunza kundau dzavo; nemhatso yaIsuraeri inozogara navo kuvaita hloko vamuna nevakadzi munyika mwaMambo Mwari; vanozobata avo vaiya vakavabata nokuvaita hloko; navo vanozotonga padera paavo vakavanesa.

Mambo weBhabhuronia muNyika yeVakafa

³ Naapo Mambo Mwari amupa kuzorora kubva mukusvipa mwoyo kwenyu, nokubva mukutya kwenyu, nokubva mukushanda kwakakonza kwemwakamanikidzwa kuita,

⁴ munozotora uku kusvereredzwa kunamambo weBhabhuroni mwechiti, “Mutambudzi waita mapererenyi! Kutambudzwa kwaita mapererenyi!

⁵ Mambo Mwari wakagura mudondoro wavakashata, nendonga yevatongi,

⁶ iyo yakaponda vanhu ngoushungu ngokuponda kusikagumi, uwo wakatonga madzinza muushungu nokutambudza, kusina unomununurira.

⁷ Nyika yeshe iyazorora, yanyarara; vanotanga kuemba.

⁸ Misayiprusi inodakara ndiwe, misidhari yeRebhanoni yechiti, ‘Kubvira apo pewakarigwa pashi, akuna mutemi naumwe unokwira kutitemera pashi.’

⁹ “Sheori ngapashi rinomuswa, kushongana newe apo pounouya; rinokumusira vakafa kukuchingamidza veshe vaiya vakuru venyika; rinomirudza madzimambo eshe emadzinza kubva pamadendemaro avo.

¹⁰ Veshe vavo vanozomupingura, vanozoti kweuri, ‘Newewo wakatama simba kudai tisu! Iwewe wadai tisu!

¹¹ Kudzikudza kwako kwadzaswa pashi muSheori, nebope rechimadangira chako; honye ndiwo mubhedhi uri pashi pako, nehonye ndicho chokufuka chako.’ ”

¹² O, kuwanyi kwewakaita kubva mudenga, iwewe nyeredzi yemasikati, mukororo wemambakwedza! Kutemerwanyi kwako pashi pamavhu, iwewe wakarigira pashi madzinza!

¹³ Iwewe wakaronza mumwoyo mwako wechiti, “Ndinozokwira mudenga, ndinozokwidzidza dendemaro rangu padera penyeredzi dzaMwari; ndinozogara padera pomutunhu womushongano, kuretu kumarupande emagumo edera.

¹⁴ Ndinozokwira padera pemakore; ndinozodziita pachangu wakadai ngoUwo-uri-padera-pazveshe.”

¹⁵ Asi wadzaswa pashi muSheori, muudzamu hwokugumisira hwerindi.

¹⁶ Avo vanokuona vanozokuringisisa, nokupinimidza ndiwe vechiti, “Uyu ndiye here munhu wakaita kuti nyika ihute, uwo wakazungunyisa umambo,

¹⁷ uwo wakaita nyika kuti idai ngerubaya, wakaparadza maguta ayo, usikazi kuda kusunhura mabhanditi ake kuti vaende kanyi?”

¹⁸ Eshe madzimambo emadzinza anoata muuthende, umwe ngaumwe muiba mwake.

¹⁹ Asi warashwa kubanze kubva muiba rako, kudai ngenhai inonyangadza, yakafukidzwa ngevakaurawa, avo vakabaiwa ngeshoti, avo vanodzaka pashi pamapuwe omurindi, kudai ngomuiri wakafa watsikwatsikwa pashi petsoka.

²⁰ Auzoshonganiswi navo mukuikwa, ngokuti waparadza nyika yako, wauraya vanhu vako. Mibarirwana yevanoita zvakashata aizokarakadzwi mhera nariini.

²¹ Nasirirai kuurawa kwevakororo vake ngendaa yokushaisha kwemadzibaba avo. Usavatendera kuti vamuke, vagare nhaka yenyika, nokuti vazadze hope yenyika ngemadhorobha.

Mwari Unozoparadza Bhabhuroni

²² “Ndinozomiruka, ndirwisane navo,” unoronza Mambo Mwari wehondo. “Ndinozogura kubva Bhabhuroni zina raro, nevakasara, dzinza nemibarirwanwa,” unoronza Mambo Mwari.

²³ “Ndinozoriita ndau inogara mazizi, nemakandwa emvura; neni ndinozoritsvaira ngomutsvairo unouraya,” unoronza Mambo Mwari wehondo.

Mwari Unozoparadza vaAsiria

²⁴ Mambo Mwari wehondo wapika echiti, “Ngegwinyiso kudai ngezvendapinimidza, ngokudaro zvinozoitika; nokudai ngezvendaemesa, ndizvo zvinozoitika.

²⁵ Ndinozogura vaAsiria munyika mwangu, napadera pemitunhu yangu ndinozomutsikatsika pashi petsoka; joka rake rinozobviswa kubva kwevari, nomutwaro wake kubva pamakhadza avo.

²⁶ Uhu ndihwo urongwa hwakarongwa ngendaa yenyika yeshe; neiyi ndiyo nyara yakatambanudzwa padera pemadzinza eshe.”

²⁷ Ngokuti Mambo Mwari wehondo wakazvironga, ndiani ungazvikunukudza? Nyara yake inotambanudzwa, ndiani ungaipfinyisa?

Mwari Unozoparadza vaFiristia

²⁸ Mugore raakafa mambo Ahazi, izwi iri guru rakauya.

²⁹ Musadakara, imwimwi mweshe vaFiristia, kuti ndonga yakamuponda yaguka, ngokuti kubva kunzinde yenyoka kunozobuda buura, nechinoberekwa ndiro chinozoita nyoka yomuriro inombururuka.

³⁰ Dangwe romurombo rinozodya, nouwo unotama unozoata pashi mukungwaririka; asi ndinozoita kuti nzinde dzako dzife ngenzara, nevanosara vako ndinozovauraya.

³¹ Boorera, O iwewe musiwo; chema, iwewe dhorobha; nyunguruka mukutya, iwewe nyika yeshe yeFiristia. Ngokuti chiushi chinobva dera; akuna unozopauka kubva pandau yake yaakaemeserwa.

³² “Umwe unozopingurenyi kwevari vatumwa vedzinza? Mambo Mwari wakaemesa Zioni, nevarombo pakati pevanhu vake vanozohwaramwo.”